Juan tevi vizons

Timenti apóstlu Juan staba prézu na ilha di Pátmus, Jizus mostra-l 16 vizon ô imajis di futuru. Kes vizon mostra modi ki nómi di Jeová ta binha ser santifikadu, modi ki se Reinu ta binha i modi ki el ta binha fazeba se vontadi na Téra i na Séu.

Na un di kes vizon, Juan odja Jeová na se tronu xeiu di glória, serkadu pa 24 ansion bistidu di branku i ku koroas di oru na ses kabésa. Lus di alanpra ku son di strubada ben di tronu. Kes 24 ansion nbaxa dianti di Jeová i es adora-l. Na un otu vizon, Juan odja un monti di algen di tudu nasons, povus i línguas ta adora Jeová. Korderu ki é Jizus Kristu, ta kuida di es i ta leba-s pa agu di vida. Dipôs, na un otu vizon, Jizus kumesa ta governa kómu Rei na Séu, djuntu ku kes 24 ansion. Na kel otu vizon, Juan odja Jizus ta briga ku dragon, ki é Satanás djuntu ku se dimónis. Jizus bota-s di Séu pa Téra.

Dipôs, Juan odja un imaji bunitu di Korderu djuntu ku 144 mil algen skodjedu, na Monti Sion. Tanbê el odja un anju ta bua na vólta di Téra, ta fla tudu algen pa ruspeta Deus i pa da-L glória.

Na kel otu vizon, el odja géra di Armajedon. Duránti kel géra, Jizus ku se trópas vense mundu mau di Satanás. Na kel últimu vizon, Juan odja tudu kuza perfetu na Séu ku na Téra. Satanás ku se disendentis distruídu tudu. Tudu algen na Séu ku na Téra fika ta trata nómi di Jeová di manera santu i ta adora sô el.