Mante firmi kóntra Diabu

1, 2. Kuzê ki nu meste ntende sobri Satanás ku se dimónis?

VIDA na Paraízu ta ser rei di sábi. Ti ki enfin nu ta ba vive sima Jeová kreba. Má oji nu ta vive na un mundu kontroladu pa Satanás ku se dimónis. (2 Coríntios 4:4 ) Mésmu ki nu ka ta pode odja-s, es ta izisti i es ten txeu puder.

² Na es kapítlu, nu ta ben odja modi ki nu pode ten un amizadi fórti ku Jeová i proteje nos kabésa di Satanás. Má, nu meste ntende kuzê ki Satanás ku se dimónis ta faze pa ngana-nu i ataka-nu.

SATANÁS É SIMA UN LION

3. Kuzê ki Satanás krê faze ku nos?

³ Satanás ta fla ma pesoas ta adora Jeová sô pa interesi i si situason fika difísil dimás es ta para di sirbi-l. (Lé Jó 2:4, 5.) Satanás ku se dimónis ta odja óras ki un algen ta mostra ma el krê prende sobri Jeová i es ta tenta pô-l dizisti. Es ta fika ku raiba óras ki un algen ta da se vida pa Jeová i ta batiza. Bíblia ta fla ma Satanás é sima ‘un lion ki sta ku txeu fómi, ta djobe algen pa el mata.’ (1 Pedro 5:8 ) Satanás krê kaba ku nos amizadi ku Jeová. — Salmo 7:1, 2; 2 Timóteo 3:12.

4, 5. (a) Kuzê ki Satanás ka ta pode faze? (b) Modi ki nu pode ‘fika kóntra Diabu’?

⁴ Má, nu ka meste xinti medu di Satanás ku se dimónis. Jeová pô-s limiti na kuzê ki es pode faze kóntra nos. Jeová promete ma ‘un monti di algen’ ki é kristons verdaderu ta ben skapa di kel ‘grandi tribulason’. (Apocalipse 7:9, 14 ) I ka ten nada ki Diabu pode faze pa inpidi kel-la, pamodi Jeová sta ta proteje Se povu.

⁵ Si nu ten un amizadi fórti ku Jeová, Satanás ka ta konsigi sipara-nu di El. Bíblia ta fla: ‘Jeová ta sta ku nhos timenti nhos sta ku el’. (2 Crónicas 15:2; lé 1 Coríntios 10:13.) Txeu di kes ómi i mudjer fiel di ténpu antigu, sima Abel, Enoki, Sara i Muizes, konsigi fika kóntra Diabu. Pamodi? Pamodi es tinha un amizadi fórti ku Jeová. (Hebreus 11:4-40 ) Nos tanbê nu pode faze mésmu kuza. Bíblia ta promete: ‘Nhos fika kóntra Diabu, i el ta fuji di nhos.’ — Tiago 4:7.

‘NU STA NA UN GÉRA’

6. Modi ki Satanás ta ataka-nu?

⁶ Satanás sabe ma Jeová poi limiti na kuzê ki el pode faze ku nos. Má simé, el ta faze tudu kel ki el pode pa prujudika nos amizadi ku Jeová. Oji, Diabu ta ataka-nu di txeu manera diferenti, má armadilhas ki el ta uza é kes ki sénpri el ta uzaba na ténpu antigu. Kal ki é alguns di es?

7. Pamodi ki Satanás ta ataka povu di Jeová?

⁷ Apóstlu Juan skrebe: ‘Mundu interu sta na puder di Malvadu.’ (1 João 5:19 ) Satanás sta kontrola es mundu mau i tanbê el krê kontrola povu di Jeová. (Miqueias 4:1; João 15:19; Apocalipse 12:12, 17 ) Diabu sabe ma sta falta-l poku ténpu. Pur isu, el sta faze di tudu pa nu ka ser lial pa Jeová. Alvês Diabu ta ataka-nu diretamenti; i otus bês el ta ataka-nu di un manera ki nu ka ta da kónta.

8. Kuzê ki kada kriston meste ntende?

⁸ Efésios 6:12, ta fla: ‘Nos géra é kóntra kes forsa spritual di mal ki sta na séu.’ Kada kriston sta na un géra kóntra Satanás ku se dimónis. Nu meste ntende ma tudu kes ki da ses vida pa Jeová ta entra na es géra. Na karta ki Polu skrebe pa irmons na Éfezu, el fla-s três bês pa es ‘mante firmi’. — Efésios 6:11, 13, 14.

9. Kuzê ki Satanás ku se dimónis ta tenta faze ku nos?

⁹ Satanás ku se dimónis ta tenta ngana-nu di txeu manera. Nu pode skapa di un armadilha di Satanás. Má nu pode kai na un otu tipu di armadilha. Diabu ta tenta djobe nos pontu fraku, pa el pode sabe ki armadilha ki el ta uza kóntra nos. Má si nu krê, Diabu ka ta ngana-nu, pamodi Bíblia ta pâpia di se artimanhas. (2 Coríntios 2:11; djobe párti PRENDE MÁS n^u 31.) Un di kes kuza é fitisaria ô bruxaria.

FIKA LONJI DI DIMÓNIS

10. (a) Kuzê ki é fitisaria ô bruxaria? (b) Kuzê ki Jeová ta atxa di fitisaria ô bruxaria?

¹⁰ Fitisaria ô bruxaria é óras ki pesoas ta nvolve ku dimónis. Pur izénplu, es ta faze kel-la através di dibinhason, faze algen mal fetu i tenta pâpia ku mortus. Bíblia ta fla ma fitisaria ô bruxaria é un kuza ki Jeová ka gosta. Nu ka pode adora Deus i omésmu ténpu faze fitisaria ô bruxaria. (Deuteronómio 18:10-12; Apocalipse 21:8 ) Kristons debe ivita ô fika lonji di tudu tipu di fitisaria ô bruxaria. — Romanos 12:9.

11. Kuzê ki pode kontise si nu xinti kuriozidadi pa kuzas ki ten aver ku dimónis?

¹¹ Satanás sabe ma si nu xinti kuriozidadi pa kuzas ki ten aver ku dimónis, é faxi el pô-nu ta nvolve ku fitisaria ô bruxaria. Kalker tipu di fitisaria ô bruxaria pode kaba ku nos amizadi ku Jeová.

SATANÁS TA TENTA NGANA-NU

12. Kuzê ki Satanás ta faze pa konfundi-nu kabésa?

¹² Satanás ta tenta konfundi algen kabésa. Poku-poku el ta poi algen ku dúvida, ti ki kel algen ta atxa ma ‘kel ki é bon é mau i kel ki é mau é bon’. (Isaías 5:20 ) Diabu krê pa nu kridita ma konsedjus di Bíblia ka ta sirbi i ma nu ta sérba más filís si nu ka sigiba leis di Deus.

13. Da izénplus di modi ki Satanás ta tenta poi algen dúvida.

¹³ Poi algen dúvida na kabésa é un di kes armadilha di Satanás ki más ta funsiona. Dja ten txeu ténpu ki el ta uza-l. Odja alguns izénplu. Na jardin di Éden, el tenta poi Eva dúvida, kantu el pergunta-l: ‘É si própi ki Deus fla, ma nhos ka debe kume di tudu arvi na jardin?’ (Génesis 3:1) Na ténpu di Jó, Satanás pergunta Jeová na frenti di anjus: ‘É atoa ki Jó ta ruspeta Deus?’ (Jó 1:9 ) Dipôs ki Jizus batiza, Satanás tenta Jizus i el fla-l: ‘Si bo é Fidju di Deus, fla kes pédra pa bira pon.’ — Mateus 4:3.

14. Kuzê ki Satanás ta faze pa el poi algen ku dúvida sobri fitisaria ô bruxaria?

¹⁴ Oji, ti inda Diabu sta ta poi algen dúvida. El ta tenta poi algen ta pergunta si fitisaria ô bruxaria é mariadu mê. El ta poi kuzas ki sta ligadu ku fitisaria ô bruxaria ta parse ma es é dretu. Ti alguns kriston pode atxa ma kes kuza é ka prigozu. (2 Coríntios 11:3 ) Nton, kuzê ki nu pode faze pa nu proteje nos kabésa? Modi ki nu pode ten sertéza ma Diabu ka sta ngana-nu? Nu ben odja dôs manera ki Diabu pode ngana-nu: na diverson i na faze tratamentu di saúdi.

DIVERSON I TRATAMENTU DI SAÚDI

15. Modi ki diversons pode pô-nu ta nvolve ku dimónis?

¹⁵ Oji, txeu filmi, vídius, prugramas di tilivizon, djogus di konputador i pájinas na internet, ta mostra kuzas ki sta ligadu ku dimónis, majia i kuzas ki é ka normal. Txeu algen ta atxa ma ka ten ninhun prigu na dexa dimónis faze párti di ses vida. Tanbê un algen pode kumesa ta nvolve ku dimónis através di kuzas sima síginu, lé mô, bota karta ô bóla di kristal. Diabu ta sukundi prigu di kes kuza la i el ta tenta pô-s ta parse un mistériu, un kuza divirtidu i sábi. Un algen pode pensa ma ka ten prubléma odja un filmi ki sta ligadu ku dimónis, désdi ki el ka faze kes kuza la. Pamodi ki pensa si é prigozu? — 1 Coríntios 10:12.

16. Pamodi ki nu ka debe divirti ku kes kuza ki sta ligadu ku dimónis?

¹⁶ Satanás ku se dimónis ka ta pode lé nos pensamentus. Má, es pode sabe kuzê ki nu gosta i modi ki nu ta pensa, pa kuzas ki nu ta skodje pa nos i pa nos família, ti mésmu diverson. Si nu skodje filmis, múzikas, ô livrus ki ta pâpia sobri majia, bruxaria, fitisaria, vanpirus, dimónis ki ta entra na algen i otus kuza sima kes-li, Satanás ku se dimónis ta sabe ma nu gosta di kes kuza la. Es pode tenta pô-nu ta nvolve inda más na kes tipu di kuza la. — Lé Gálatas 6:7.

17. Modi ki Satanás ta pruveta di nos dizeju di krê ten bon saúdi?

¹⁷ Satanás tanbê pode pruveta di nos dizeju di krê ten bon saúdi. Oji, txeu algen ta sufri pamodi prublémas di saúdi. Talvês un algen pode faze txeu tipu di tratamentu, má el ka sta midjora. (Marcos 5:25, 26 ) Kel algen pode fika dizusperadu i tenta faze tudu kel ki el pode pa el midjora. Má nos ki ta sirbi Jeová, nu debe toma kuidadu pa nu ka skodje tratamentus ki ta nvolve ‘uza puder pa faze majia’. — Isaías 1:13.

18. Ki tipu di tratamentu di saúdi un sérvu di Jeová debe ivita?

¹⁸ Na ténpu antigu, alguns israelita ta ‘uzaba puder pa faze majia’. Pur isu, Jeová fla-s: ‘Óras ki nhos ta stika nhos mô pa mi, N ta tra nhas odju di nhos. Mésmu ki nhos faze txeu orason, N ka ta obi’. (Isaías 1:15 ) Jeová disidi na ka obi ses orason pamodi es ta uzaba puder di majia! Nu ka krê faze nada ki ta prujudika nos amizadi ku Jeová i ki ta pô-nu perde se ajuda, i inda más óras ki nu sta duenti. (Salmo 41:3 ) Si nu sta pensa faze algun tipu di tratamentu, nu ten ki sabe primeru si el ka sta ligadu ku fitisaria ô bruxaria. (Mateus 6:13 ) Si nu da kónta ma kel tratamentu pode sta ligadu ku kel-la, nu debe ivita-l. — Djobe párti PRENDE MÁS n^u 32.

STÓRIAS SOBRI DIMÓNIS

19. Kuzê ki ta poi txeu algen ku medu di Diabu?

¹⁹ Alguns algen ta atxa ma Diabu ku dimónis ka ta izisti. Otus sabe ma es izisti, pamodi kuzas ki kontise ku es. Txeu algen ta vive ku medu di spritus mau i es é skravu di kes agoru ô indís. Otus ta poi algen ta fika ku medu di dimónis, pamodi es ta konta stórias di kuzas prigozu ki es faze. Txeu bês, pesoas ta fika dimiradu ku kes stória i lógu es ta krê konta otus algen. Kes stória ta poi txeu algen ku medu di Diabu.

20. Modi ki nu pode spadja mintiras di Satanás?

²⁰ Pensa na kel-li, Satanás krê pa algen fika ku medu di el. (2 Tessalonicenses 2:9, 10 ) El é mintirozu i el sabe modi ki el ta ngana kes algen ki gosta di fitisaria ô bruxaria i el ta pô-s ta kridita na kuzas ki ka é verdadi. Talvês kes algen ta konta stórias di kuzas ki es ta atxa ma es obi ô es odja. Si es kontinua ta konta kes stória, es pode fika ta izajera na konta-s. Pur isu, nu ka krê fika ta ripiti kes stória pa nu ka djuda Satanás poi otus algen ku medu. — João 8:44; 2 Timóteo 2:16.

21. Envês di nu fika ta konta stórias sobri dimónis, di kuzê ki nu pode pâpia?

²¹ Si un sérvu di Jeová dja kustuma pasa pa algun situason ki ten aver ku dimónis, el ka debe fika ta konta kes stória pa divirti otus. Povu di Jeová ka meste fika ku medu di nada ki Diabu ku se dimónis pode faze. Má, nu meste mante konsentradu na izénplu di Jizus i na puder ki Jeová da-l. (Hebreus 12:2 ) Jizus nunka ka konta se disiplus ninhun stória di dimónis pa divirti-s. El konsentra na mensaji di Reinu i na ‘kuzas grandi di Deus’. — Atus 2:11, BPK; Lucas 8:1; Romanos 1:11, 12.

22. Kuzê ki bu sta disididu na faze?

²² Nu ka pode skese ma obijetivu di Satanás é kaba ku nos amizadi ku Jeová. El ta tenta faze di tudu pa kel-la kontise. Má, nu konxe armadilhas di Diabu i nu sta disididu na ka faze nada ki ten aver ku fitisaria ô bruxaria. Ka nu ‘da Diabu ninhun xansi’ di frakise nos disizon. (Lé Efésios 4:27.) Si nu fika kóntra Diabu, nu ta fika livri di se armadilhas i Jeová ta proteje-nu. — Efésios 6:11.