STUDU 14

Distaka kes pontu prinsipal

Hebreus 8:1

REZUMU: Djuda kes algen kunpanha diskursu ki bu sta faze i dexa klaru modi ki kada pontu prinsipal sta di akordu ku bu obijetivu i téma di bu diskursu.

MODI KI TA FAZEDU:

Ten un obijetivu. Djobe si obijetivu di bu diskursu é informa, konvense ô motiva kes algen. Nton faze-l di akordu ku kel obijetivu. Djobe dretu si tudu kes pontu prinsipal ta djuda-u txiga na obijetivu di diskursu.

Pergunta bu kabésa: ‘Ki perguntas kes algen pode faze sobri es asuntu? Óras ki es atxa respósta, ki perguntas es ta faze dipôs?’ Nton organiza pontus di bu diskursu di mésmu manera, asi kes algen ta konsigi kunpanha, ntende i seta kel informason.
Distaka téma di diskursu. Óras ki bu ta faze diskursu, ripiti alguns palavra ki ten aver ku asuntu ki bu sta pâpia di el, asi bu ta distaka téma.
Dexa pontus prinsipal di diskursu fika klaru i sinplis. Skodje sô kes pontu prinsipal ki ten aver ku téma di diskursu i ki bu ta konsigi inxina dretu sen pasa ténpu di diskursu. Uza poku pontus prinsipal, fla klaru kada pontu prinsipal, faze pauza entri es i pasa di un pontu prinsipal pa kel otu di un manera suavi.

Na komésu di bu diskursu bu pode fla kes pontu prinsipal pa djuda kes algen kunpanha, ô torna fla kes pontu prinsipal na fin di bu diskursu pa djuda kes algen lenbra di es.