LISON 32

Reinu di Deus dja sta ta governa!

Formatu di livru na papel

Reinu di Deus kumesa ta governa na Séu na 1914. Tanbê é na kel anu la ki kumesa ténpu di fin, kel ténpu ki govérnus di ómi ta staba kuazi ta kaba. Modi ki nu sabe kel-li? Odja kuzê ki Bíblia dja flaba ma ta ben kontiseba na mundu désdi 1914.

1. Kuzê ki Bíblia dja flaba?

Livru di Daniel dja flaba ma Reinu di Deus ta kumesaba ta governa na fin di un ténpu ki ta txomadu ‘seti ténpu’. (Daniel 4:16, 17) Monti anu dipôs, Jizus txoma kel mésmu ténpu di ‘kel ténpu markadu di nasons’, i el fla ma inda el ka kababa. (Lucas 21:24) Sima nu ta ben odja, kes seti ténpu kaba na 1914.

2. Kuzê ki sta ta kontise na mundu désdi 1914?

Disiplus di Jizus pergunta-l: ‘Na ki ténpu ki kes kuza li ta ben kontise i kal ki é sinal di bu prezénsa i di fin di es sistéma?’ (Mateus 24:3) Na respósta ki Jizus da-s, el fla-s txeu kuza ki ta ben kontiseba dipôs ki el kumesaba ta governa na Reinu di Deus na Séu. Alguns di kes kuza éra géra, fómi i tremor di téra. (Lé Mateus 24:7.) Bíblia tanbê dja flaba ma konportamentu di pesoas na ‘ténpu di fin’ ta poba vida ‘difísil di aguenta’. (2 Timóteo 3:1-5) Désdi 1914, kes kuza li sta ta kontise kada bês más txeu.

3. Pamodi ki mundu sta ta piora désdi ki Reinu di Deus kumesa ta governa?

Poku ténpu dipôs ki Jizus bira Rei di Reinu di Deus, el géra na Séu kóntra Satanás i se dimónis. Satanás perde kel géra. Bíblia ta fla ma ‘el botadu pa baxu pa Téra, i se anjus botadu pa baxu djuntu ku el.’ (Apocalipse 12:9, 10, 12) Satanás sta uma xatiadu pamodi el sabe ma el ta ben distruídu. Pur isu, el tene mundu xeiu di dór i sufrimentu. Kel-li ta djuda-nu ntende pamodi ki mundu sta di kabésa pa baxu! Má Reinu di Deus sta ben kaba ku tudu kes prubléma ki ten na mundu.

SABE MÁS

Odja modi ki nu sabe ma Reinu di Deus kumesa ta governa na 1914, i modi ki nu pode mostra ma nu ta kridita ma Reinu dja sta ta governa.

4. Bíblia ta mostra ma Reinu di Deus kumesa ta governa na 1914

Odja VÍDIU.

VÍDIU: Reinu di Deus kumesa ta governa na 1914 (5:02)

Deus poi Nabukudunuzor, ki éra rei di Babilónia, ta ten un sonhu sobri kuzê ki ta ben kontiseba na futuru. Kuzê ki Nabukudunuzor odja i splikason ki Daniel da sobri kel sonhu, ta mostraba ma kes kuza tinha aver ku vida di Nabukudunuzor i ku Reinu di Deus tanbê. — Lé Daniel 4:17.a

Lé Daniel 4:20-26, i dipôs uza kuadru pa responde kes pergunta li:

(1) Kuzê ki Nabukudunuzor odja na kel sonhu? — Odja versíklus 20 i 21.
(2) Kuzê ki ta kontiseba ku kel arvi? — Odja versíklu 23.
(3) Kuzê ki ta kontiseba na fin di kes ‘seti ténpu’? — Odja versíklu 26.

Kuzê ki kel sonhu sobri arvi ten aver ku Reinu di Deus

PROFESIA (Daniel 4:20-36)

Ta governa

(1) Un arvi grandi

Govérnu para

(2) ‘Nhos bota kel arvi na txon’ i nhos dexa ‘pasa seti ténpu’

Toku di un arvi ki podu sintu di féru ku kóbri.

Govérnu kumesa otu bês

(3) ‘Nhu ta torna dadu reinu di nho otu bês’

Primeru kunprimentu di kel profesia li. . .

(4) Kenha ki kel arvi ta reprizentaba? — Odja versíklu 22.
(5) Ki ténpu ki el para di governa? — Lé Daniel 4:29-33.
(6) Kuzê ki kontise ku Nabukudunuzor na fin di kes ‘seti ténpu’? — Lé Daniel 4:34-36.

PRIMERU KUNPRIMENTU

Ta governa

(4) Nabukudunuzor, rei di Babilónia

Rei Nabukudunuzor sakédu xeiu di orgulhu.

Govérnu para

(5) Dipôs di 606 A.J., Nabukudunuzor bira dodu i el ka konsigi governa pa 7 anu

Nabukudunuzor xintadu na txon ta kume padja sima animal.

Govérnu kumesa otu bês

(6) Nabukudunuzor bira prontu otu bês i el kumesa ta governa

Rei Nabukudunuzor ku brasu pa riba ta djobe pa séu.

Sugundu kunprimentu di kel profesia li. . .

(7) Kenha ki kel arvi ta reprizentaba? — Lé 1 Crónicas 29:23.
(8) Ki ténpu ki es para di governa? Modi ki nu sabe ma es ka staba ta governa kantu Jizus staba na Téra? — Lé Lucas 21:24.
(9) Na ki ténpu i na undi ki kel govérnu li ta torna governaba?

SUGUNDU KUNPRIMENTU

Ta governa

(7) Reis israelita ki ta reprizenta govérnu di Deus

Govérnu para

(8) Jiruzalen distruídu i kes rei di Israel para di governa pa 2.520 anu

Jiruzalen distruídu na 607 A.J. Kes rei di Israel para di governa pa 2.520 anu.

Govérnu kumesa otu bês

(9) Jizus ki é Rei di Reinu di Deus kumesa ta governa na Séu

Jizus kumesa ta governa la di Séu na 1914. Raiu di lus ta sai di el.

Kantu ténpu ki dura kes seti ténpu?

Ten alguns párti na Bíblia ki ta djuda-nu ntende otus párti. Pur izénplu, livru di Apocalipse ta fla ma três ténpu i meiu ta da 1.260 dia. (Apocalipse 12:6, 14) Seti ténpu é dobru di 1.260 dia, ki ta da 2.520 dia. Alvês na Bíblia un dia ta reprizenta un anu. (Ezequiel 4:6) Mésmu kuza ta kontise ku kes seti ténpu ki livru di Daniel ta pâpia di el: es ta reprizenta 2.520 anu.

5. Mundu muda désdi 1914

Odja VÍDIU.

VÍDIU: Mundu muda désdi 1914 (1:10)

Jizus dja flaba modi ki mundu ta sérba dipôs ki el biraba Rei. Lé Lucas 21:9-11, i dipôs pâpia sobri kel pergunta li:

Kal di kes kuza li bu sta odja ta kontise na mundu oji?

Apóstlu Polu fla modi ki pesoas ta sérba na ténpu di fin, óras ki govérnus di ómi ta staba kuazi ta kaba. Lé 2 Timóteo 3:1-5, i dipôs pâpia sobri kel pergunta li:

Bu sta ta odja pesoas ta konporta di kel manera li?

Dizenhus: Kuzas ki sta kontise na mundu i modi ki pesoas sta ta konporta na ténpu di fin. 1. Un xéfi di trópa na un tribuna ta grita ku se brasu pa riba. 2. Prédius ta kai dipôs di un tremor di téra. 3. Avions di géra. 4. Un monti algen ta anda na rua ku maskra. 5. Kes dôs tori jémiu na Nova York sta pega lumi dipôs di un ataki terorista. 6. Un ómi ta uza dróga. 7. Un maridu ta labanta mô i ta sanha na se mudjer. 8. Alguns tipu di dróga i bebida alkólika. 9. Dôs mudjer ku ropa i ku jóias ki sta na móda ta tra selfie. 10. Un DJ ta poi múzika na un fésta ku monti algen. 11. Un algen ta bota un garafa ku lumi na el.

6. Mostra ma bu ta kridita ma Reinu dja sta ta governa

Lé Mateus 24:3, 14, i dipôs pâpia sobri kes pergunta li:

Ki trabadju inportanti ta mostra ma Reinu di Deus dja sta ta governa?
Modi ki bu pode partisipa na kel trabadju?

Reinu di Deus dja sta ta governa, i sta kuazi ta txiga kel dia ki el ta ben governa Téra interu. Lé Hebreus 10:24, 25, i dipôs pâpia sobri kel pergunta li:

Kuzê ki kada un di nos debe faze ‘sima nu ta ba ta odja kel dia ta txiga’?

Dizenhus: 1. Un studanti di Bíblia ta sisti un runion di Tistimunhas di Jeová. 2. Kel mésmu studanti ta prega pa un algen ki el konxe. — Si bu sabia di algun kuza ki pode djudaba otus i salvaba ses vida, kuzê ki bu ta fazeba?

UN ALGEN PODE PERGUNTA: “Pamodi ki Tistimunhas di Jeová ta pâpia txeu di 1914?”

Modi ki bu ta respondeba?

REZUMU

Kes profesia di Bíblia i kuzas ki sta kontise na mundu oji, ta mostra ma Reinu di Deus dja sta ta governa. Nu ta mostra ma nu ta kridita na kel-li óras ki nu ta prega sobri el i nu ta sisti runion na kongregason.