Verdadi ta traze ‘spada envês di pas’

1, 2. (a) Ki tipu di pas nu ten gósi? (b) Pamodi ki ka ten pas na mundu interu? (Odja dizenhu na kapa.)

NOS tudu nu krê vive na pas, sen preokupason. Nu ta agradese Jeová txeu pamodi el ta da-nu se pas ki é un kalma ki ta proteje nos pensamentu, asi pa nu ka fika txeu preokupadu! (Fil. 4:6, 7) Pamodi nu da nos vida pa Jeová, tanbê nu ta sta na ‘pas ku Deus’ ô nu ten un bon amizadi ku Deus. — Rom. 5:1.

² Má, inda ka txiga ténpu di Deus traze pas na mundu interu. Nu sta vive na ‘ténpu di fin’, undi ki mundu sta ta pasa pa txeu prubléma i pesoas ta briga pa kalker kuza. (2 Tim. 3:1-4)Tanbê nu meste luta kóntra Satanás i se ensinus falsu. (2 Cor. 10:4, 5) Má kuza ki pode pô-nu más preokupadu é óras ki nos família ki ka ta sirbi Jeová ta fika kóntra nos. Alguns pode faze trosa di nos krénsas, es pode fla ma nu ta dividi família ô es pode amiasa-nu ma nu ta dexa di faze párti di família si nu ka bandona Jeová. Modi ki nu pode nkara kel situason li? Kal ki é midjór manera di lida ku nos família ki ta faze-nu opozison?

MODI KI NU PODE NKARA OPOZISON DI FAMÍLIA

3, 4. (a) Modi ki ensinus di Jizus pode afeta otus? (b) Na ki situason pode ser difísil sigi Jizus?

³ Jizus sabia ma kuzas ki el ta inxinaba ta dividiba pesoas i ma kes ki krê sigiba el tinha ki ten koraji pa nfrenta opozison. Kel opozison li tanbê ta binha di família. Jizus fla: ‘Ka nhos pensa ma N ben poi pas na Téra; é ka pas ki N ben traze, má é spada. Pamodi N ben traze divizon entri ómi ku se pai, fidju-fémia kóntra se mai i nóra kóntra se sógra. Na verdadi, inimigus di un ómi ta ser kes algen di se própi kaza.’ — Mat. 10:34-36.

⁴ Kantu Jizus fla ‘ka nhos pensa ma N ben traze pas’ el mostra ma el kria pa kes algen ki staba ta obi-l ntende kuzê ki podia kontise si es biraba se disiplus. Se mensaji pode dividiba pesoas. É klaru, ki é ka kel-la ki Jizus kreba, sô el kria inxina pesoas kes verdadi sobri Deus. (João 18:37) Má, ta sérba difísil pa se sigidoris kontinua ta sigi se ensinus si ses família ô ses amigus fika kóntra es.

5. Kuzê ki disiplus di Jizus ta pasa pa el?

⁵ Jizus fla ma se sigidoris debe sta prontu pa nfrenta opozison di família. (Mat. 10:38) Pa es prova ma es é sigidoris di Jizus di verdadi, se disiplus tinha ki nfrenta trosa ô ti mésmu opozison di ses família. Má, Jizus promete ma es ta ganhaba mutu más di ki kel ki es perde. — Lé Marcos 10:29, 30.

6. Kuzê ki nu debe lenbra si nos família é kóntra nos adorason pa Jeová?

⁶ Sikrê nos família é kóntra nos adorason pa Jeová, nu ta kontinua ta ama-s, má nu debe lenbra ma nos amor pa Jeová i pa Jizus debe ben primeru. (Mat. 10:37) Tanbê nu meste lenbra ma Satanás ta tenta uza kel amor ki nu ten pa nos família pa pô-nu ta para di sirbi Jeová. Nu ben odja alguns prubléma ki pode kontise pamodi opozison di família i kuzê ki nu pode faze pa lida ku es situason.

ÓRAS KI BU MARIDU Ô MUDJER É KA TISTIMUNHA DI JEOVÁ

7. Modi ki bu debe nkara bu maridu ô bu mudjer ki é ka Tistimunha di Jeová?

⁷ Bíblia ta aviza ma ‘kes ki kaza ta ten difikuldadis na vida.’ (1 Cor. 7:28) Si bu maridu ô mudjer é ka Tistimunha di Jeová, bu pode pasa pa más prubléma na bu kazamentu. Má é inportanti bu odja kuzas sima Jeová ta odja. Si bu maridu ô bu mudjer ka ta sirbi Jeová kel-li é ka motivu pa siparason ô divórsiu. (1 Cor. 7:12-16) Sikrê bu maridu ka ta sirbi Jeová, bu debe ruspeta kel autoridadi ki el ten kómu xéfi di família. Tanbê, sikrê un mudjer ka ta sirbi Jeová, se maridu debe trata-l ku amor sima Bíblia ta fla. — Efé. 5:22, 23, 28, 29.

8. Ki perguntas bu debe faze si bu maridu ô bu mudjer pô-u algun limiti na kel ki bu ta faze pa adora Jeová?

⁸ I si bu maridu ô bu mudjer tenta pô-u alguns limiti na kel ki bu ta faze pa adora Jeová? Pur izénplu, un maridu pode fla se mudjer pa partisipa na pregason sô alguns dia na simana. Si bu sta pasa pa un situason sima kel-li pergunta bu kabésa: “Nha maridu ô nha mudjer sta ta tenta pô-m para di sirbi Deus? Si é ka kel-li ki é se obijetivu, N pode faze kel ki el sta ta pidi?” Óras ki bu ta ser ikilibradu bu pode ivita txeu prubléma na kazamentu — Fil. 4:5.

9. Modi ki sérvus di Jeová pode inxina ses fidju onra un pai ô mai ki é ka Tistimunha di Jeová?

⁹ Iduka fidjus pode ser un dizafiu si bu maridu ô bu mudjer é ka Tistimunha di Jeová. Pur izénplu, bu meste inxina bus fidju obi ku kel lei di Bíblia li: ‘Onra bu pai ku bu mai’. (Efé. 6:1-3) Má i si bu maridu ô bu mudjer ka ta sigi kes lei di Bíblia sobri konportamentu? Onra bu maridu ô bu mudjer asi bu ta da-s izénplu. Konsentra na se bons kualidadi i mostra gratidon pa kel ki el ta faze. Ivita fla kuzas negativu sobri el na frenti di nhos fidjus. Envês di kel-li, splika bus fidju ma kada algen meste disidi si el ta sirbi Jeová. Si bu fidju konporta dretu kel-li pode poi bu maridu ô bu mudjer ta sirbi Jeová.

10. Modi ki pai ô mai ki é Tistimunha di Jeová ta inxina ses fidju kes verdadi ki sta na Bíblia mésmu ki ses maridu ô ses mudjer ka ta sirbi Jeová?

¹⁰ Alvês, bu maridu ô bu mudjer ki é ka Tistimunha di Jeová pode krê pa nhos fidjus partisipa na kes fésta di relijions falsu. Alguns maridu pode proíbi ses mudjer di inxina ses fidju sobri Bíblia. Má simé, un mudjer ki ta sirbi Jeová ta faze kel ki el pode pa el inxina ses fidju kes verdadi ki sta na Bíblia. (At. 16:1; 2 Tim. 3:14, 15) Pur izénplu, un maridu ki é ka Tistimunha di Jeová pode ka dexa-l faze ses fidju pikinoti studu ô leba-l pa runion. El ta ruspeta disizon di se maridu. Má simé, óras ki parse oportunidadi el ta pruveta pa inxina se fidju sobri Jeová i sobri modi ki el pode konporta. (At. 4:19, 20) É klaru ki ku ténpu, se fidju meste toma se própi disizon si el ta adora Jeová ô nau. — Deut. 30:19, 20.a

KES FAMÍLIA KI É KÓNTRA NOS ADORASON PA JEOVÁ

11. Kuzê ki pode pô-u na prubléma ku bu família ki é ka Tistimunha di Jeová?

¹¹ Talvês na komésu, nu ka konta nos família ma nu staba ta studa Bíblia ku Tistimunhas di Jeová. Má sima nos fé ba ta fika más fórti, nu ntende ma nu meste kontaba es kel ki nu staba ta prende. (Mar. 8:38) Si kel-li traze prublémas entri bo ku bu família ki é ka Tistimunha di Jeová, odja alguns kuza ki bu pode faze pa lida ku kel prubléma li i kontinua lial pa Jeová.

12. Pamodi ki alvês nos família ki é ka Tistimunha di Jeová ta fika kóntra nos, má modi ki nu pode mostra ma nu ta poi na ses lugar?

¹² Ntende bus família ki é ka Tistimunha di Jeová. Timenti nu pode sta uma kontenti ku kes verdadi di Bíblia ki nu sta ta prende, nos família pode atxa ma nu nganadu ô ma nu sta faze párti di un relijion prigozu. Es pode atxa ma nu ka ta ama-s más pamodi nu ka sta ta partisipa na kes fésta djuntu ku es. Es pode fika ku medu ma kel-li ta afeta nos futuru. Óras ki nu ta tenta odja kuzas sima es ta odja i óras ki nu ta obi-s ku atenson pa ntende kuzê ki es sta ta pensa, kel-li ta mostra ma nu sta poi na ses lugar. (Pro. 20:5) Apóstlu Paulu sforsa pa ntende ‘pesoas di tudu nason’ asi pa el pode papiaba notísia sábi ku es. Si nu faze mésmu kuza, kel-li pode djuda-nu tanbê. — 1 Cor. 9:19-23.

13. Modi ki nu debe pâpia ku nos família ki é ka Tistimunha di Jeová?

¹³ Pâpia ku es ku kalma. Bíblia ta fla: ‘Ki nhos palavras ser sénpri sábi’. (Col. 4:6) Nu pode pidi Jeová se spritu santu, asi pa nu pode mostra kel kualidadi li óras ki nu ta pâpia ku nos família ki é ka Tistimunha di Jeová. Nu ka debe tenta diskuti ku es sobri tudu ideias falsu sobri ses relijion. Si es magua-nu pamodi algun kuza ki es fla ô ki es faze, nu pode imita izénplu di kes apóstlu. Paulu skrebe: ‘Óras ki nu ta insultadu, nu ta abensua-s; óras ki nu ta pirsigidu, nu ta aguenta ku paxénxa; óras ki es pâpia mal di nos nu ta responde-s ku brandura’. — 1 Cor. 4:12, 13.

14. Ki rezultadu nu pode ten óras ki nu ta da bon izénplu?

¹⁴ Kontinua ta ten bon konportamentu. Pâpia ku kalma ku nos família ki é ka Tistimunha di Jeová ta djuda txeu, má nos manera di konporta é mutu más inportanti inda. (Lé 1 Pedro 3:1, 2, 16.) Através di bu izénplu, bus família pode odja ma Tistimunhas di Jeová ten kazamentu filís, es ta kuida di ses fidju, es ta leba un vida linpu, es ta konporta dretu i es é filís. Sikrê bu família nunka ka seta verdadi, bu pode xinti kel alegria ki ta ben di faze kuzas ki ta dexa Jeová kontenti.

15. Modi ki nu pode faze planus pa djuda-nu lida ku prublémas ki pode kontise?

¹⁵ Faze planu. Pensa na alguns prubléma ki pode kontise i disidi modi ki bu ta lida ku es. (Pro. 12:16, 23) Un irman di Austrália fla: “Nha sogru éra kóntra verdadi. Antis di nu txoma-l pa sabe modi ki el sta, mi ku nha maridu, nu ta fazeba orason ta pidi Jeová pa djudaba nos responde-l ku kalma óras ki el ta papiaba ku nos mariadu. Nu ta priparaba asuntus pa pâpia ku el asi pa nos konbérsu kóre dretu. Nu ka ta papiaba duránti txeu ténpu, asi pa ivita pâpia di asuntus di relijion ki ta poba nos ta diskuti.”

16. Kuzê ki bu pode faze si bu xinti tristi pamodi bu ka sta dexa bu família kontenti?

¹⁶ É klaru, ki bu ka debe spéra ma bu ka ta ten ninhun prubléma ku bus família ki é ka Tistimunha di Jeová. Si kontise prublémas bu pode fika tristi, prinsipalmenti si bu ta ama bus família txeu i sénpri bu sforsa pa faze kuzas ki ta dexa-s kontenti. Si bu ta xinti di kel manera li, lenbra ma bu lialdadi pa Jeová é más inportanti di ki amor pa bu família. Kel disizon li pode djuda bu família ntende modi ki é inportanti obi ku prinsípius di Bíblia. Má tanbê, lenbra ma bu ka ta pode obriga ningen seta verdadi. Envês di kel-li, dexa-s odja kes rezultadu di faze kuzas di manera di Jeová. Sima nos Deus di amor da-nu xansi di disidi ki kaminhu nu krê sigi, tanbê el ta da nos família kel mésmu xansi. — Isa. 48:17, 18.

SI UN DI BUS FAMÍLIA BANDONA JEOVÁ

17, 18. Kuzê ki pode djuda-u si un di bus família bandona Jeová?

¹⁷ Óras ki un di nos família dizasosiadu ô dizasôsia se kabésa di kongregason, kel-li pode due-nu txeu. Modi ki nu pode lida ku kel dór ki nu ta xinti?

¹⁸ Kontinua ta kuida di bu amizadi ku Jeová. Bu pode bira bu fé más fórti óras ki bu ta lé Bíblia sénpri, pripara i sisti runion, partisipa na pregason i óras ki bu ta faze orason pa djuda-u aguenta firmi. (Judas 20, 21) Má i si bu xinti ma bu sta ta faze kes kuza li sô pa faze, ma bu ka sta ta xinti alegria di verdadi? Ka bu dizisti! Un bon amizadi ku Jeová pode djuda-u kontrola manera ki bu ta pensa i xinti. Pensa na skritor di Salmos 73. Pamodi se manera di pensa el perde alegria, má el konsigi koriji se manera di pensa kantu el entra na ténplu di Deus. (Sal. 73:16, 17) Óras ki bu ta adora Jeová di manera fiel, el ta djuda-u faze mésmu kuza ki kel salmista li.

19. Modi ki bu pode mostra ma bu ta ruspeta disiplina di Jeová?

¹⁹ Ruspeta disiplina di Jeová. Ku ténpu disiplina di Jeová ta traze kel midjór rezultadu pa tudu algen, ti mésmu pa ken ki faze kel pekadu, sikrê na komésu el ta traze txeu dór. (Lé Hebreus 12:11) Pur izénplu, Jeová ta fla-nu pa nu ‘para di konvive’ ku kes algen ki faze pekadu i ki ka rapende. (1 Cor. 5:11-13) Sikrê bu sta sufri, bu debe ivita pâpia ku bus família ki dizasosiadu sen nisisidadi, sikrê através di tilifóni, mensájen, kartas, e-mail ô na redi sosial.

20. Ki speransa nu debe ten?

²⁰ Ka bu perde speransa. Amor ta ‘spéra tudu kuza’. Kel-li ta inklui spéra ma kes ki bandona Jeová, pode ben volta pa el. (1 Cor. 13:7) Si bu odja ma bu família ki sta dizasosiadu sta faze algun mudansa na se manera di vive, bu pode faze orason pa Jeová da-l forsa através di Bíblia pa el seta kel pididu di Jeová: ‘Volta pa mi’. — Isa. 44:22.

21. Kuzê ki bu debe faze si bu xinti ma sigi Jizus sta pô-u na prubléma ku bu família?

²¹ Jizus fla má si kalker algen bira más inportanti pa nos di ki el, nu ka merese ser se sigidor. Má, el kunfia ma se disiplus ta tinha koraji pa mante ses lialdadi sikrê ses família fika kóntra es. Si sigi Jizus pô-u na prubléma ku bu família, kunfia ma Jeová ta djuda-u lida dretu ku kes dizafiu. (Isa. 41:10, 13) Bu ta xinti alegria si bu lenbra ma Jeová ku Jizus sta kontenti ku bo i ma es ta abensua-u pamodi bu mante fiel.