Mostra konpaxon pa ‘tudu tipu di algen’

KANTU Jizus inxina se disiplus modi ki es ta prega notísias sábi di Reinu, el aviza-s ma nen tudu algen ta krê obiba es. (Lucas 10:3, 5, 6 ) Mésmu kuza ta kontise ku nos na pregason. Alguns algen ki nu ta atxa é mal idukadu ô violéntu. I óras ki es reaji di kel manera li, ta fika más difísil mostra-s konpaxon i prega pa es.

Un algen ki ten konpaxon ta odja nisisidadis i prublémas di otus, ta xinti péna di es i ta krê djuda-s. Má kuzê ki pode kontise si nu perde konpaxon pa pesoas na nos tiritóriu? Nu pode perde zelu ô nu ka ta xinti vontadi di prega pa es i nen di djuda-s. Nu pode konpara nos zelu ku lumi. Pa lumi ka paga nu ten ki poi más lenha. Di mésmu manera, pa nu ten txeu zelu na pregason, nu meste ten konpaxon. — 1 Tes. 5:19.

Modi ki nu pode kontinua ta mostra konpaxon mésmu na situasons difísil? Nu ben odja izénplu di três algen ki merese pa nu imita-s: Jeová, Jizus i apóstlu Polu.

IMITA KONPAXON DI JEOVÁ

Dja ten monti anu, ki Jeová sta ta aguenta mintiras ki ta papiadu sobri el. Má simé, el ta kontinua ta ser ‘bon ti pa ingratus i maus.’ (Lúkas 6:35, BPK ) Modi ki el ta mostra bondadi? El ten paxénxa ku tudu algen. Jeová krê ‘pa tudu tipu di algen’ salva. (1 Tim. 2:3, 4) Jeová ta ôdia maldadi, má pa el, kada algen ten valor i el ka ta krê pa ningen móre. — 2 Ped. 3:9.

Jeová sabe ma Satanás é bon na poi algen ta kridita na mintira. (2 Cor. 4:3, 4) Txeu algen prende mintira sobri Deus désdi pikinoti. Pur isu, pamodi ses manera di pensa i kuza ki es ta xinti, ta fika más difísil es seta verdadi. Má Jeová tene gana di djuda-s. Modi ki nu sabe?

Pur izénplu, odja modi ki Jeová xinti sobri kes algen di Nínive. Mésmu ki es éra violéntu Jeová fla Jonas: ‘Nton ami tanbê N ka debe xintiba péna di Nínive, kel sidadi grandi, ki ten más di 120 mil ómi, ki nen ka sabe diferénsa entri kel ki é dretu ku mariadu, alén di txeu animal ki es ten?’ (Jonas 4:11 ) Jeová xinti péna di kes algen, ki ka sabia verdadi sobri el. Pur isu, el manda Jonas pa ba aviza-s.

Nu ta xinti mésmu kuza ki Jeová sobri pesoas. Es tanbê es ten valor. Sima Jeová, nu tene gana djuda-s prende verdadi, mésmu óras ki ta parse ma es ka krê.

IMITA KONPAXON DI JIZUS

Sima se Pai, Jizus xinti péna di pesoas ‘pamodi es ta staba foladu i botadu di un ladu pa kel otu sima ovelhas sen pastor.’ (Mat. 9:36) Jizus ta ntendeba pamodi ki es staba na kel situason. Éra pamodi xéfis di relijion ta trataba es mariadu i tanbê ta inxinaba es mintira. Mésmu ki Jizus sabia ma txeu di kes algen ki obi-l ka bira se disiplus pa algun razon, má el kontinua ‘ta inxina-s un monti kuza’. — Mar. 4:1-9.

Un ómi ta responde xatiadu kantu dôs irman konku na se pórta — Ka bu fika dizanimadu si bu atxa un algen ki na komésu ka krê obi-u

Un ómi ka ta responde na pórta kantu Tistimunhas konku na se pórta, má el sta dizanimadu pamodi situason di se vida muda — Óras ki situason na vida muda, un algen pode muda se opinion sobri verdadi

Óras ki pesoas ka krê seta nos mensaji, nu meste tenta ntende pamodi ki es reaji si. Talvês es ta pensa kuza mariadu sobri Bíblia ô sobri kristons pamodi es odja alguns ki ta fla ma es é “kristons” ta faze kuza mariadu. Pode ser ki otus ta kridita na mintiras ki es obi sobri Tistimunhas di Jeová. Inda ten otus ki ten medu pa família ô vizinhus ka faze-s trósa.

Alguns algen ki nu ta atxa na nos tiritóriu, pode dja pasa pa txeu sufrimentu ki marka-s. Un irman misionária fla ma na se tiritóriu ten txeu algen ki skapa di géra i es perde tudu kuza ki es tinha. Es ka ten ninhun speransa pa futuru. Es sta dizanimadu i es ka ta kúnfia na ningen. Na se tiritóriu ten txeu algen ki ka gosta di mensaji di Tistimunhas di Jeová. Un bês, na pregason, un algen na kel tiritóriu ataka-l.

Modi ki kel misionária kontinua ta mostra konpaxon mésmu óras ki pesoas ta trata-l mal? Sénpri el ta lenbra di Provérbios 19:11 ki ta fla: ‘Ntendimentu di ómi ka ta dexa-l xâtia faxi’. Óras ki el ta pensa na kuzê ki pesoas di se tiritóriu pasa, kel-li ta djuda-l xinti péna di es. Tanbê é ka tudu algen ki ta trata-l mariadu, i na kel tiritóriu el ten bons revizita.

Nu pode pergunta nos kabésa: ‘Si N ka konxeba verdadi, modi ki N ta reajiba si Tistimunhas di Jeová ben pâpia ku mi?’ Pur izénplu, i si dja N obiba txeu mintira sobri Tistimunhas di Jeová? Talvês nu ka ta krê obiba es i nu ta mesteba pa es trataba nos ku konpaxon. Jizus fla ma nu debe trata otus sima nu ta gostaba di ser tratadu. Pur isu, nu ta tenta ntende modi ki otus sta ta xinti i ten paxénxa ku es, sikrê é difísil. — Mat. 7:12.

IMITA KONPAXON DI APÓSTLU POLU

Apóstlu Polu mostra konpaxon ti pa pesoas ki trata-l ku violénsia. Pamodi? Pamodi el ta lenbraba modi ki el éra. El fla: ‘Antis N ta papiaba mal, N ta pirsigiba i N ta injuriaba. Má, N mostradu mizerikórdia pamodi N ta ajiba ku iginoránsia i N ka tinha fé.’ (1 Tim. 1:13) Polu sabia ma Jeová ku Jizus mostra-l txeu mizerikórdia. El podia ntendeba kes algen ki éra kóntra se pregason, pamodi antis el éra si.

Alvês, Polu ta atxaba pesoas ki ta kriditaba txeu na kes ensinu falsu. Modi ki el ta xintiba? Atus 17:16 ta fla ma kantu el staba na Atenas ‘el fika revoltadu kantu el odja txeu imaji na sidadi.’ (BPK ) Má, Polu uza kes kuza ki xatia-l pa el inxina pesoas. (Atos 17:22, 23 ) Tanbê Polu muda se manera di prega pa el pode papiaba ku algen di tudu tipu. El fla: ‘Pa N salva alguns di tudu manera ki N pode.’ — 1 Cor. 9:20-23.

Óras ki nu ta prega pa pesoas ki ka krê obi nos mensaji ô ki es ta kridita na kuzas ki ka sta na Bíblia, nu pode faze sima Polu ta fazeba. Nu pode uza kuzas ki nu sabe sobri es pa djuda-s prende sobri ‘notísias sábi di kuza midjór’. (Isa. 52:7) Un irman ki txoma Dorothy fla: “Na nos tiritóriu txeu ta kridita ma Deus é mau i ma el ta kastiga algen. N ta ilojia-s pamodi es ta kridita na Deus i N ta mostra-s kualidadis di Jeová i se promésas pa futuru.”

‘KONTINUA TA GANHA MAL KU BEN’

Sima nu ta ba ta txiga más pértu di fin, atitudi di alguns algen ta fika ‘kada bês más piór’. (2 Tim. 3:1, 13) Má nu ka debe perde konpaxon ô alegria pamodi kes kuza li. Jeová pode da-nu forsa pa nu ‘kontinua ta ganha mal ku ben.’ (Rom. 12:21) Un irman pionera ki txoma Jessica fla: “É normal nu atxa pesoas ki ten orgulhu i ki ta pâpia mal di nos i di nos mensaji. Kel-li pode xatia-nu. Nton, óras ki N kumesa ta pâpia N ta ora Jeová déntu mi, i N ta pidi pa el djuda-m odja kel algen sima el ta odja-l.” Kel-li ta djuda Jessica ka konsentra na kuzas ki el ta xinti, má pensa modi ki el pode djuda kel algen.

Un ómi ka ta responde na porta óras ki Tistimunhas di Jeová konku na se pórta — Nu ta kontinua ta djobe kes ki krê atxa verdadi

Un ómi abri pórta kantu Tistimunhas di Jeová toka na kanpainha i el obi ses mensaji — Si nu ten paxénxa, alguns pode seta nos ajuda

Nos tanbê nu pode da nos irmons koraji óras ki nu sta prega djuntu ku es. Jessica fla ma óras ki el ta prega djuntu ku otus irmon i algen trata-s mariadu, el ka ta konsentra na kel-la. Má el ta pâpia sobri valor di nos pregason, mésmu óras ki algen ka krê obi-s.

Jeová sabe di tudu prublémas ki nu ta pasa na pregason. Má el ta fika txeu kontenti óras ki nu ta imita se mizerikórdia. (Lucas 6:36 ) É klaru ki konpaxon i paxénxa di Jeová é ka pa tudu ténpu. Nu ten sertéza ma fin ta ben na óra sértu. Má timenti kel dia ka txiga, pregason é urjenti. (2 Tim. 4:2) Pur isu, nu kontinua ta prega ku zelu i mostra konpaxon di verdadi pa ‘tudu tipu di algen’.