Óras ki kontise traison na kazamentu

“Kantu nha maridu fla-m ma el staba ta larga-m pa el fikaba ku un mudjer más nova ki mi, da-m gana di móre. Kel-li ta parseba injustu, prinsipalmenti óras ki N ta lenbraba di tudu kes sakrifisiu ki N faze pa el.” — Maria, Spanha.

“Kantu nha mudjer larga-m dirapenti, éra sima si un kuza móre déntu mi. Sonhus ki nu tinha, planus ki nu faze i speransa ki nu tinha kaba tudu. Ten dias ki N ta atxaba ma N staba dretu, má dipôs N ta fikaba tristi otu bês.” — Bill, Spanha.

TRAISON na kazamentu ta kaba ku algen. É verdadi ma alguns algen ta disidi púrdua kel maridu ô kel mudjer ki trai i sforsa pa da dretu otu bês.a Má sikrê kazamentu kontinua ô nau, kel algen ki traídu ta xinti un dór ki ka ta da pa aguenta. Kuzê ki pode djuda un algen na kel situason li lida ku dór?

TESTUS DI BÍBLIA KI PODE DJUDA-U

Sikrê ku txeu dór, un monti di algen ki traídu atxa konsolu na Bíblia. Es prende ma Deus ta odja ses lágua i ma el ta ntende ses dór. — Malaquias 2:13-16.

‘Kantu preokupasons toma kónta di mi, bu konsola-m i bu pô-m ta fika kalmu.’ — Salmo 94:19.

Bill fla: “Kantu N lé kel versíklu li, N imajina Jeová ta alivia nha dór, sima un pai ki ten konpaxon ta faze.”

‘Ku algen lial, bu ta aji ku lialdadi’. — Salmo 18:25.

Karmen, ki se maridu ten uns mês ta trai-l, fla: “Nha maridu trai-m. Má N tinha sertéza ma Jeová nunka ka ta traíba mi. Sénpri N podia kontaba ku el.”

‘Ka nhos fika preokupadu dimás ku ninhun kuza, má na tudu kuza, nhos faze orason ku súplika, pa nhos dexa Deus sabe kuzê ki nhos krê; i pas di Deus, ki ningen ka ta konsigi ntende, ta guarda nhos korason’. — Filipenses 4:6, 7.

Sandra fla: “N lé kel testu li txeu bês. Sima N ba ta faze orason N xinti pas di Deus na nha vida.”

Tudu kes algen ki nu pâpia di el na kel artigu li alvês xinti gana di dizisti, má es kunfia na Jeová i se Palavra da-s forsa. Bill fla asi: “Kantu staba ta parse ma tudu kuza dja kababa, nha fé da-m obijetivu na vida. Nbóra duránti un ténpu N ‘anda na meiu di kel rubera txeu sukuru’, Deus staba ku mi.” — Salmo 23:4.

a Pa sabe más sobri púrdua ô nau, odja Nhos korda! di 22 di abril di 1999, ku téma: “Quando o cônjuge é infiel”.

Modi ki alguns algen lida ku kel situason li

Midita na testus di Bíblia ki ta konsola-u.

Bill fla: “N lé livru di Jó i dipôs N lé Salmo i N sublinha kada párti ki ta parseba ku nha situason. N da kónta ma kes algen ki skrebe Bíblia pasa pa mésmu dór i preokupason ki mi.”

Obi múzika pa konsola-u.

Karmen fla: “Óras ki N ka sta konsigi durmiba di noti N ta obiba múzika, kel-li ta poba mi ta xinti kalmu.” Daniel fla: “N prende toka vióla i múzika djuda-m xinti pas déntu mi.”

Pâpia di kuzas ki bu sta xinti.

Daniel fla: “N ka ta kustuma papiaba di kuzê ki N staba ta xinti. Má N tinha bons amigu i nu ta papiaba tudu dia. N ta xintiba más dretu óras ki N ta papiaba ku es ô N ta skrebeba es karta pa fla-s modi ki N staba ta xinti.” Sandra fla: “Ajuda ki nha família da-m foi rei di inportanti. Nha mai sénpri ta staba prontu pa djudaba mi. Si N krê papiaba, el ta obiba mi. Nha pai tanbê ta poba mi ta xinti suguru i el djuda-m rekupera poku-poku.”

Kontinua ta ora.

Karmen fla: “N ta oraba tudu óra. N ta xintiba ma Deus staba ku mi, ta obi-m i ta djuda-m. Duránti kel ténpu difísil di nha vida, N bira más amigu di Deus.”