Un novu ménbru di Grupu Enkaregadu di Óbra

KUARTA-FERA di palmanhan, dia 24 di janeru di 2018, família di Betel di Mérka ku di Kanadá, fika kontenti di obi un notísia spesial: irmon Kenneth Cook, Jr., kumesa ta faze párti di Grupu Enkaregadu di Óbra di Tistimunhas di Jeová.

Irmon Kenneth Cook nase i kria na stadu di Pensilvánia, na Mérka. El prende verdadi ku un koléga di skóla, kantu el staba kuazi ta finda liséu. El batiza dia 7 di junhu di 1980 i el kumesa sirvisu di pioneru fíksu dia 1 di setenbru di 1982. Dipôs di dôs anu ta sirbi di pioneru, el konvidadu pa trabadja na Betel di Wallkill, Nova York, dia 12 di otubru di 1984.

Irmon Kenneth Cook pasa 25 anu ta faze txeu tipu di trabadju, sima na lugar di inprimi publikasons i na Skritóriu di Betel. Na anu 1996 el kaza ku un irman ki txoma Jamie, ki bai trabadja djuntu ku el na Betel di Wallkill. Na dizénbru di 2009, irmon Cook ku se mudjer mandadu pa Betel di Patterson, Nova York. La, irmon Cook diziginadu pa trabadja na Departamento de Correspondência da Redação. Es torna volta pa Betel di Wallkill pa poku ténpu, i na abril di 2016 es mandadu pa Betel di Brooklyn, Nova York. Sinku mês dipôs, es muda pa sédi mundial na Warwick, Nova York. Na janeru di 2017, irmon Cook skodjedu pa ser un di kes ajudanti di Comissão de Redação di Grupu Enkaregadu di Óbra.