Bu sta ta kuida di bu ‘skudu grandi di fé’?

1-2. (a) Di akordu ku Efésios 6:16, pamodi ki nu meste di un ‘skudu grandi di fé’? (b) Ki perguntas nu sta ben responde na kel studu li?

BU TEN un ‘skudu grandi di fé’? (Lé Efésios 6:16.) É klaru ki bu ten. Sima un skudu grandi ta protejeba kuazi tudu korpu di un trópa, bu fé ta proteje-u di kuzas mariadu di es mundu, sima konportamentu mariadu, violénsia i tudu kes kuza ki é kóntra leis di Deus.

² Má, dja ki nu sta ta vive na ‘ténpu di fin’, nos fé ta kontinua ta pasa pa txeu próva. (2 Tim. 3:1) Pur isu, nu ten ki djobe si nu sta kuida dretu di nos skudu di fé. Modi ki nu pode faze kel-li? I kuzê ki ta djuda-nu pega riju na nos skudu? Nu sta ben sabe respósta di kes pergunta li na kel studu li.

DJOBE KU KUIDADU SI BU SKUDU STA DRETU

3. Kuzê ki trópas ta fazeba ku ses skudu, i pamodi?

³ Na ténpu ki Bíblia skrebedu, txeu bês trópas ta uzaba skudu ki éra kubértu di péli. Kes trópa ta poba ólhu na skudu. Asi kel párti di péli ka ta stragaba i kes párti di féru ka ta ferujaba. Si un trópa fikaba ta sabe ma se skudu sta stragadu, el ta konpoba el lógu. Asi, el ta staba sénpri prontu pa géra. Modi ki kel izénplu li ta aplika na bu fé?

4. Pamodi ki bu debe djobe bu skudu di fé, i modi ki bu pode faze kel-li?

⁴ Sima trópas di ténpu antigu, sénpri bu meste djobe bu skudu di fé i kuida di el. Kel-li ta djuda-u sta sénpri priparadu pa géra. Dja ki nos é kristons, nu sta na un géra spritual i nu ten ki luta kóntra kes spritu mau. (Efé. 6:10-12) Ningen ka pode kuida di bu skudu di fé. Modi ki bu pode sabe ma bu sta priparadu pa lida ku próvas? Primeru, bu meste ora pa Deus djuda-u. Dipôs, bu meste uza Palavra di Deus pa djuda-u odja bu kabésa sima Deus ta odja-u. (Heb. 4:12) Bíblia ta fla: ‘Kunfia na Jeová di tudu bu korason; ka bu kunfia na bu própi ntendimentu.’ (Pro. 3:5, 6) Pensa na kel testu li, i tenta lenbra di alguns disizon ki bu toma ka dura li. Pur izénplu, bu pasa pa un grandi prubléma ki bu staba ta meste di dinheru? Bu pensa na promésa di Jeová na Hebreus 13:5 : ‘Nunka N ka ta dexa-u i nunka N ka ta bandona-u’? Kel promésa li da-u sertéza ma Jeová ta djuda-u? Si bu faze si, kel-li ta mostra ma bu sta ta kuida dretu di bu skudu di fé.

5. Kuzê ki talvês bu ta diskubri óras ki bu djobe bu fé?

⁵ Óras ki bu ta djobe bu fé ku kuidadu, bu pode fika spantadu. Talvês bu pode diskubri frakézas ki nunka bu ka reparaba. Pur izénplu, pode ser ki preokupason dimás, mintiras i dizánimu prujudika bu fé. Si kel-li dja kontise ku bo, kuzê ki bu pode faze pa bu proteje bu fé?

PROTEJE KÓNTRA PREOKUPASON DIMÁS, MINTIRAS I DIZÁNIMU

6. Kal ki é alguns izénplu di preokupason ki é bon pa nos?

⁶ Alguns tipu di preokupason é bon pa nos. Pur izénplu, é bon nu preokupa na agrada Jeová i Jizus. (1 Cor. 7:32) Si nu faze un pekadu gravi, nu ta preokupa na rezolve nos situason ku Jeová. (Sal. 38:18) Tanbê, nu ta preokupa na agrada kel algen ki nu sta kazadu ku el, na kuida di nos família i di nos irmons na fé. — 1 Cor. 7:33; 2 Cor. 11:28.

7. Di akordu ku Provérbios 29:25, pamodi ki nu ka meste ten medu di ómi?

⁷ Má, preokupason dimás pode straga nos fé. Pur izénplu, talvês nu ta fika sénpri preokupadu na ten ropa i kumida ki nu meste. (Mat. 6:31, 32) Pa kontrola kel preokupason li, talvês nu ta konsentra na ten más kuzas material. I nu pode ti kumesa ta ama dinheru. Si nu dexa kel-la kontise, nos fé na Jeová ta bira fraku i nos amizadi ku el ta fika na prigu. (Mar. 4:19; 1 Tim. 6:10) Otu kuza ki pode prujudika nos fé é preokupa dimás ku kuzê ki otus algen ta pensa di nos. Kel-li pode pô-nu ta fika ku más medu di sufri trósa i pirsigison di ómis, di ki medu di faze algun kuza ki Jeová ka gosta. Pa nu proteje di kel prigu li, nu ten ki inplora Jeová pa da-nu fé i koraji ki nu meste pa nu ka xinti medu di ómi. — Lé Provérbios 29:25; Luc. 17:5.

8. Kuzê ki nu debe faze si nu obi mintiras?

⁸ Satanás é ‘pai di mintira’, i el ta uza kes algen ki el ta kontrola pa spadja mintiras sobri Jeová i sobri nos irmons. (João 8:44 ) Pur izénplu, kes ki bandona i fika kóntra organizason di Jeová ta spadja mintiras sobri se organizason. Pa faze kel-li, es ta uza sites, prugramas di tilivizon, rádiu, jornal i revistas. Kes mintira sta entri kes ‘flexa di lumi’ di Satanás. (Efé. 6:16) Kuzê ki nu debe faze si un algen kumesa ta pâpia ku nos sobri kes mintira li? Nu ka ta obi! Pamodi? Pamodi nu ten fé na Jeová i nu ta kunfia na nos irmons. Nu krê ivita kalker fórma di pâpia ku kes ki bandona i fika kóntra organizason di Jeová. Pur isu, nu ka krê dexa nada ô ningen i nen kuriozidadi, pô-nu ta entra na un diskuson ku es.

9. Kuzê ki dizánimu pode faze ku nos?

⁹ Dizánimu pode bira nos fé fraku. Alvês nu ta xinti dizanimadu pamodi nu ten prublémas. É klaru ki nu ka ta pode finji ma nu ka ten prubléma. Má, nu ka debe dexa nos prublémas kontrola nos manera di pensa. Si nu faze si, nu pode kaba pa skese di kel speransa rei di sábi ki Jeová promete-nu. (Apo. 21:3, 4) Sentimentus di dizánimu pode tra-nu forsa i pô-nu ta dizisti. (Pro. 24:10) Má, kel-la ka meste kontise ku nos.

10. Kuzê ki bu prende ku un karta ki un irman skrebe?

¹⁰ Odja modi ki un irman na Mérka kontinua ku se fé, timenti el ta kuidaba di se maridu ki staba txeu duenti. Na un karta ki el skrebe pa sédi mundial, el fla: “Nos situason alvês ta poi algen ta fika preokupadu dimás i dizanimadu. Má nos speransa é fórti. N ta agradise di korason pa informasons ki bira nos fé fórti i ki anima-nu. Nu meste di kes konsedju i nkorajamentu. Es ta djuda-nu kontinua ta sirbi Jeová i aguenta próvas ki Satanás ta uza pa pô-nu ta bira fraku.” Komentárius di kel irman li ta mostra ma nu ta pode vense dizánimu! Modi? Odja bus prubléma sima un provason di Satanás. Kunfia ma Jeová ta konsola-u. I da valor pa kumida spritual ki el ta da-nu.

11. Pa nu sabe si nos fé meste bira más fórti, ki perguntas nu debe faze nos kabésa?

¹¹ Bu ta konsigi sabe si bu fé meste bira más fórti? Duránti kes mês ki pasa, bu konsigi ivita pa preokupason dimás ka kontrola-u? Bu konsigi ka obi mintiras i nen diskuti ku kes ki bandona i fika kóntra organizason di Jeová? Bu konsigi lida ku dizánimu? Si bu respósta é sin, kel-li ta mostra ma bu fé sta dretu. Má, nu meste kontinua sienti, pamodi Satanás ten otus arma ki el ta tenta uza kóntra nos. Nu ben odja alguns di es.

PROTEJE KÓNTRA AMOR PA KUZAS MATERIAL

12. Kuzê ki pode kontise si nu preokupa dimás ku kuzas material?

¹² Si nu ta ama kuzas material, nos fé pode bira fraku i nu pode faze ménus pa Jeová. Apóstlu Polu fla: ‘Ninhun ómi ki é trópa ka ta mete na asuntus di nogósius di vida, pa el pode agrada kel ki txoma-l pa trópa.’ (2 Tim. 2:4) Trópas di Roma ka podia nvolveba na nogósiu. Kuzê ki ta kontiseba si un trópa ka sigiba kel órdi li?

13. Pamodi ki un trópa ka podia nvolveba na nogósiu?

¹³ Imajina kel situason li. Un grupu di trópas ta pasa un palmanhan interu ta trena ku spada. Má un trópa ka ta bai trenu. El sta na sidadi ta bende kumida na merkadu. Di noti, kes trópa ta gasta ténpu ta djobe si ses armadura sta dretu i ta mola ses spada. Má kel trópa ki ta bende kumida ta pasa ténpu ta pripara kes kuza ki el sta ba bende. Na kel otu dia di sédu, trópas inimigu ta ataka sidadi sen ningen sta ta spéra. Kal di kes trópa ki ten más xansi di sta priparadu pa luta i poi se komandanti ta fika kontenti? Kal di kes trópa ki bu ta kria pa staba na bu ladu? Kel ki staba konsentradu i priparadu ô kel ki staba distraídu?

14. Dja ki nos é trópas di Kristu, kuzê ki é más inportanti pa nos?

¹⁴ Sima bons trópa, nu ka ta distrai di nos obijetivu prinsipal, ki é poi nos Komandantis, Jeová ku Kristu, kontenti. Kel-li é mutu más inportanti di ki ganha kalker otu kuza ki mundu di Satanás pode da-nu. Nu ta sforsa pa nu ten ténpu i forsa pa sirbi Jeová i kuida dretu di nos skudu di fé i di tudu kes otu párti di nos armadura spritual.

15. Ki avizu Polu da-nu, i pamodi?

¹⁵ Nu krê sta sénpri sienti! Pamodi? Apóstlu Polu aviza ma ‘kes ki sta disididu na fika riku’ ta ‘disvia di fé’. (1 Tim. 6:9, 10) Palavra ‘disvia’ ta mostra ma si nu tenta ten kuzas material ki nu ka meste, nu pode fika distraídu. Nu ta kóre risku di abri nos korason pa ‘txeu dizeju mariadu i ki ta prujudika’. Envês di dexa kes dizeju entra na nos korason, nu debe odja ma es é armas di Satanás pa bira nos fé fraku.

16. Kel stória ki sta na Marcos 10:17-22 debe pô-nu ta pensa na ki perguntas?

¹⁶ Talvês dinheru ki nu ten ta txiga pa nu kunpra un monti kuza. É mariadu kunpra kuzas ki nu krê, má ki nu ka meste? Talvês nau! Má pensa na kes pergunta li: Sikrê nu ten dinheru pa kunpra un kuza, nu ten ténpu i forsa pa uza i kuida di kel kuza? Nu pode kumesa ta ama dimás kes kuza material? Kel amor pa kuzas material pode pô-nu ta aji sima kel jóven ki ka seta konviti di Jizus di faze más pa Deus? (Lé Marcos 10:17-22.) Di sertéza é mutu más midjór ten un vida sinplis i gasta nos ténpu i nos forsa na faze vontadi di Deus!

KONTINUA TA PEGA RIJU BU SKUDU DI FÉ

17. Kuzê ki nunka nu ka debe skese?

¹⁷ Nunka nu ka debe skese ma nu sta na un géra. Nu ten ki sta priparadu pa luta tudu dia. (Apo. 12:17) Nos irmons ka pode karega nos skudu di fé pa nos. Nu meste kontinua ta pega-l riju.

18. Pamodi ki trópas na ténpu antigu ta pegaba riju na ses skudu?

¹⁸ Na ténpu antigu, un trópa ki mostraba koraji na géra, ta ganhaba onra. Má, éra un vergónha, si el voltaba pa kaza sen se skudu. Un storiador di Roma, ki txomaba Tácito, skrebe: “Bandona skudu é piór dizonra.” É pur isu ki trópas tinha ki ten sertéza ma es sta ta pegaba riju na ses skudu.

19. Modi ki nu pode kontinua ta pega riju na nos skudu di fé?

¹⁹ Nos tanbê nu ten ki kontinua ta pega riju na nos skudu di fé. Nu ta faze kel-li óras ki nu ta sisti tudu runion i pâpia sobri nómi di Jeová i se Reinu pa otus algen. (Heb. 10:23-25) Tanbê, nu ten ki lé Bíblia tudu dia i faze orason pa Jeová djuda-nu sigi se konsedju i orientason na tudu kuza ki nu ta faze. (2 Tim. 3:16, 17) Si nu faze si, ninhun arma di Satanás ka ta pode prujudika-nu pa tudu ténpu. (Isa. 54:17) Nos ‘skudu grandi di fé’ ta proteje-nu. Nu ta fika firmi, na ladu di nos irmons. I nu ta faze más di ki ganha nos géra di dia-dia. Nu ta ten ónra di odja Jizus ta ganha géra kóntra Satanás i se sigidoris. — Apo. 17:14; 20:10.