Bíblia é un livru di kunfiansa i ki ta pâpia verdadi
Dja ten un monti anu ki pesoas di formason i kultura diferenti, ta atxa ma Bíblia é un livru di kunfiansa i ki ta pâpia verdadi. Oji, milhons di algen ta sigi kuzê ki Bíblia ta inxina. Má, ten otus ki ta atxa ma Bíblia é un livru ki ka ten valor i ki sta xeiu di stórias inventadu. Kuzê ki bu ta atxa? Bíblia ta pâpia verdadi?
PAMODI KI BU PODE KUNFIA NA BÍBLIA
Modi ki bu ta sabe si Bíblia merese bu kunfiansa? Pensa na kel izénplu li: si bu ten un amigu ki duránti un monti anu sénpri konta-u verdadi, di serteza bu ta atxa ma el é un algen di kunfiansa. Bu ta atxa ma Bíblia é sima un amigu ki sénpri ta pâpia verdadi? Odja alguns izénplu.
Skritoris di kunfiansa
Kes algen ki skrebe Bíblia éra sinseru di verdadi. I txeu bês es pâpia di kuzas mariadu ki es faze i ses fadja. Pur izénplu, proféta Jonas skrebe ma un bês el ka obi ku Deus. (Jonas 1:1-3) Na verdadi, na fin di se livru el konta modi ki Deus koriji-l. Má, pa el ka txoma atenson pa se kabésa, el ka fla kuzas dretu ki el ben faze dipôs ki Deus koriji-l. (Jonas 4:1, 4, 10, 11) Sinseridadi di tudu kes algen ki skrebe Bíblia ta mostra ma es ta preokupaba ku skrebe verdadi.
Konsedjus ki ta djuda-nu
Konsedjus di Bíblia inda ta djuda-nu na nos dia-dia? Klaru ki sin! Pur izénplu, repara kuzê ki Bíblia ta fla sobri mante un bon amizadi ku otus algen: “Pur isu, tudu kuza ki nhos krê pa otus algen faze nhos, nhos faze-s tanbê.” (Mateus 7:12) ‘Un respósta mansu ta branda raiba, má un palavra duru ta omenta raiba.’ (Provérbios 15:1) Konsedjus di Bíblia ta kontinua ta djuda-nu oji sima el djuda pesoas na ténpu ki es skrebedu.
Stórias di verdadi
Sima ténpu ba ta pasa, arkiólogus diskubri kuzas ki ta prova ma txeu povu, lugaris i kuzas ki Bíblia ta pâpia di es ta izistiba mê. Pur izénplu, Bíblia ta fla ma na ténpu di Neemias, kes algen di Finísia, di sidadi di Tiru, ta moraba na Jiruzalen i es ‘ta trazeba pexi i tudu tipu di kuzas pa nogósiu’. — Neemias 13:16.
Ten algun próva ki ta konfirma kel testu di Bíblia li? Ten sin. Arkiólogus atxa alguns kuza di Finísia na Israel. Kel-li ta mostra ma kes dôs povu li ta fazeba nogósiu ku kunpanheru. Tanbê, atxadu na Jiruzalen réstu di alguns pexi di Mar Mediterániu. Arkiólogus ta kridita ma éra kes algen ki ta fazeba nogósiu ki leba kes pexi. Dipôs di analiza kes kuza ki atxadu, un studiozu fla: “Kuzê ki sta na Ne[emias] 13:16, ki ta mostra ma pesoas di Tiru ta bendeba pexi na Jiruzalen, é verdadi.”
Verdadi sobri siênsia
Bíblia é un livru ki ta pâpia prinsipalmenti di asuntus ki ten aver ku relijion i stória. Má, mésmu óras ki el ta pâpia di asuntu ki ten aver ku siênsia, el é izatu. Odja un izénplu.
Dja ten uns 3.500 anu, ki Bíblia dja flaba ma ka ten ‘nada’ ki ta susti téra. (Jó 26:7) Kel-li é mutu diferenti di kes stória inventadu ki ta fla ma téra sta ta boia riba di agu ô ma é un tartaruga jiganti ki sta karega-l. Uns 1.100 anu dipôs ki livru di Jó skrebedu, pesoas kontinua ta pensa ma téra ka podia staba sen nada pa susti-l, má el tinha ki staba riba di algun kuza. Sô uns 300 anu atras, na anu 1687, ki un sientista ki txomaba Isaac Newton, lansa se piskiza sobri forsa di gravidadi i el splika ma téra ta kontinua na se lugar na spasu pamodi un forsa ki nu ka ta odja. Kel-li konfirma kuzê ki Bíblia dja flaba más di 3 mil anu antis!
Profesia verdaderu
Nu pode kunfia na profesias di Bíblia? Odja un izénplu. Proféta Izaías dja flaba sobri distruison di Babilónia.
Profesia: Uns 732 anu antis di Kristu, Izaías dja flaba ma un otu nason ta distruíba Babilónia i ku ténpu el ta fikaba sen ningen. El fla kel-li antis di Babilónia bira kapital di un inpériu. (Isaías 13:17-20) Izaías ti fla nómi di kel ómi ki ta kunpriba kel profesia li, ki éra Siru. Tanbê Izaías fla ma rius ta ‘sekaba’. Asi, el mostra kuzê ki Siru ta fazeba pa el distruíba kel sidadi. El fla tanbê ma kes algen di Babilónia ta dexaba portons di sidadi abértu. — Isaías 44:27–45:1.
Kel profesia kunpri: Uns 200 anu dipôs ki Izaías faze kel profesia, un rei di Pérsia ataka Babilónia. Modi ki éra se nómi? Siru. Má éra difísil dimás pa entraba na Babilónia pamodi el tinha paredis altu i Riu Eufratis ki ta pasaba na meiu i na vólta di sidadi. Pur isu, Siru ku se trópas faze un vala pa disvia agu di riu. Kel-li poi agu ta dixi di un manera ki es konsigi trabesa riu ku pé ti txiga portons di sidadi. Pamodi algun motivu, gentis di Babilónia dexa portons ki ta fikaba frenti di riu abértu! Nton, Siru ku se trópas entra na Babilónia i es distrui sidadi.
Má, inda fika ta falta más un kuza: Babilónia fika sen ningen própi? Duránti algun ténpu pesoas kontinua ta mora la. Má oji, kes réstu di distruison di Babilónia, ki ta fika pértu di Bagdá na Iraki, ta prova ma kel profesia di Izaías kunpri tintin pa tintin. Pur isu, nu pode kunfia na Bíblia mésmu óras ki el ta pâpia di kuzas ki ta ben kontise na futuru.