VIVE SIMA UN KRISTON
Midjora bu manera di prega — Pâpia di asuntus ki ta interesa pesoas
PAMODI KI É INPORTANTI: Kes kriston skodjedu ku spritu santu i kes otu ovelha ta konvida pesoas di tudu tipu pa ‘toma agu di vida di grasa.’ (Ap 22:17) Kel agu li ta reprizenta tudu kuza ki Jeová ta faze pa liberta kes algen ki ta obi ku el di pekadu ku mórti. Pa djuda kes algen ki ten kustumu i krénsas diferenti, nu meste pâpia ku es sobri ‘notísias sábi ki ta dura pa tudu ténpu’ di manera ki ta interesa kada un di es. — Ap 14:6.
MODI KI TA FAZEDU:
Skodje un asuntu i un testu ki ta toka korason di kes algen na bu tiritóriu. Bu pode skodje un di kes ideia pa pâpia sobri Bíblia ô algun otu aprizentason ki dja bu uza i ki da bon rezultadu. Ki asuntus i ki testus di Bíblia es gosta más txeu? Ten algun notísia ki kontise ka dura li ki pesoas sta ta pensa ô pâpia na el? Kuzê ki pode interesa un ómi ô un mudjer?
Óras ki bu ta pâpia ku un algen, fla-l mantenha i pâpia ku el di mésmu manera ki pesoas na undi bu ta vive ta kustuma faze. — 2Co 6:3, 4.
Konxe dretu nos publikasons i vídius ki ta faze párti di nos Feraméntas prinsipal pa inxina, pa bu pode oferese-s i mostra-s pa kes algen ki tene interesi.
Diskarega publikasons i vídius na língua di kes algen ki bu pode atxa na bu tiritóriu.
Muda bu aprizentason di akordu ku nisisidadi di kel algen ki bu sta ta pâpia ku el. (1Co 9:19-23) Pur izénplu, kuzê ki bu ta flaba un algen si bu sabe ma ka dura li algen di se família móre?
ODJA VÍDIU I DIPÔS RESPONDE KES PERGUNTA LI:
Ki asuntu kel publikador kumesa ta pâpia ku kel algen?
Kuzê ki kontise na vida di kel algen?
Kal di kes testu di Bíblia éra midjór pa kel situason, i pamodi?
Modi ki bu pode muda bu aprizentason di un manera ki el ta interesa pesoas na bu tiritóriu?