Kuzê ki pode djuda-nu ten un futuru midjór?

Sima nu odja na kes artigu ki pasa, txeu algen ta kridita ma pa es ten un futuru midjór, es meste kunfia na kuzas sima distinu, bon skóla, rikéza i ser un algen dretu. Má tenta ten un futuru midjór através di kes kuza li, é sima si nu sta tenta uza un mapa ki ta da-nu orientason mariadu, pa nu bai pa un lugar ki nu ka konxe. Má kel-li krê fla ma ka ten ninhun ajuda di kunfiansa pa nu konsigi ten un futuru midjór? Ten sin!

UN AJUDA KI TA BEN DI KEL MIDJÓR ALGEN

Óras ki nu ta toma un disizon, nu ta kustuma pidi ajuda di kes algen más grandi ô ki ten más sabedoria di ki nos. Di mésmu manera, nu pode atxa bons konsedju ki pode djuda-nu ten un futuru suguru, na un Algen ki é mutu más grandi i ki ten más sabedoria di ki nos. Nu pode atxa Se konsedjus na un livru sagradu ki dja ten uns 3.500 anu ki kumesa ta skrebedu. Kel livru sagradu li é Bíblia.

Pamodi ki bu pode kunfia na Bíblia? Pamodi ka ten ningen ki ten más sabedoria di ki se Autor. El ta txomadu di ‘Antigu di Dias’ ki izisti ‘désdi sénpri i pa tudu ténpu’. (Daniel 7:9; Salmo 90:2) El é ‘Kriador di séu i kel Deus verdaderu, kel ki forma Téra’. (Isaías 45:18) El ta fla-nu ma se nómi é Jeová. — Salmo 83:18.

Dja ki Autor di Bíblia é nos Kriador, el ka ta atxa ma un kultura ô un rasa é midjór di ki kel otu. Se konsedjus sénpri ta funsiona i es sta ta djuda algen di mundu interu. Ka ten ninhun livru ki dja traduzidu i distribuidu más di ki Bíblia.a Pur isu, konsedjus di Bíblia pode djuda pesoas di tudu lugar. Kel-li sta di akordu ku kuzê ki Bíblia ta fla:

‘Deus ta trata tudu algen igual, i na tudu nasons, el ta seta ken ki ta ruspeta-l i ki ta faze kel ki é dretu.’ — ATOS 10:34, 35.

Sima un pai ta ama i ta djuda se fidjus, Jeová Deus é un Pai ki ta ama-nu i el ta uza Bíblia, ki é se Palavra, pa djuda-nu. (2 Timóteo 3:16) Bu pode kunfia na Bíblia pamodi Deus é nos Kriador i el sabe kuzê ki é midjór pa nos.

NU PODE KUNFIA NA BÍBLIA

Nu pode kunfia na kuzê ki Bíblia ta fla sobri futuru, pamodi dja ten uns 2.000 anu ki dja el flaba kuzas ki ta ben kontiseba na mundu i modi ki pesoas ta ben konportaba.

KUZAS KI TA BEN KONTISEBA

‘Nason ta ben fika kóntra nason, i reinu kóntra reinu. Ta ben ten grandis tremor di téra, i na un lugar tras di kel otu, ta ben ten falta di kumida i duénsas ki ta spadja’. — LUCAS 21:10, 11.

MODI KI PESOAS TA BEN KONPORTABA

‘Na ténpu di fin, kuzas ta fika konplikadu, difísil di aguenta. Pamodi ómis ta ba ama sô ses kabésa, ta ama dinheru, ta ser konvensidu, orgulhozu, ka ta obi ku pai ku mai, ta ser ingratu, disleal, sen amor pa família, ka ta krê djobe pas ku kunpanheru, ta ser kaluniador, diskontroladu, runhu, ka ta ama kuzas dretu, traidoris, temozus, xeiu di orgulhu, envês di ama Deus es ta krê sô pasa sábi’. — 2 TIMÓTEO 3:1-4.

Pamodi ki Bíblia ta konsigi fla tudu kes kuza ki sta ta kontise oji? Di sertéza bu ta konkorda ku kuzê ki Loen, di Hong Kong, fla: “Dja ten monti anu ki kes profesia di Bíblia skrebedu. Un algen li na Téra ka ta konsigi fla kes kuza tintin pa tintin i pa kontise sima el fla. Di sertéza Bíblia ben di un algen ki ten mutu más sabedoria di ki nos.”

Senténas di profesia ki sta na Bíblia dja kunpri.b Kel-li ta prova ma Bíblia é própi Palavra di Deus. Jeová fla: ‘“Ami é Deus, i ka ten ningen sima mi.” Désdi komésu N ta fla kal ki é fin’. (Isaías 46:9, 10) Pur isu, bu ten bons razon pa kridita na kuzê ki Bíblia ta fla sobri futuru.

KONSEDJUS KI PODE DJUDA-U GÓSI I PA TUDU TÉNPU

Si bu sigi kes konsedju ki sta na Palavra di Deus, bu pode ten bons rezultadu. Odja alguns izénplu.

BON KONSEDJU SOBRI DINHERU I TRABADJU

‘É midjór ten un mô xeiu di diskansu di ki ten dôs mô xeiu di trabadju duru i ta kóre tras di béntu.’ — ECLESIASTES 4:6.

MODI KI NU PODE TEN UN FAMÍLIA FILÍS

‘Tudu nhos, nhos ama nhos mudjer sima nhos ta ama nhos kabésa; i tanbê mudjer debe ruspeta se maridu di korason.’ — EFÉSIOS 5:33.

MODI KI NU PODE DA DRETU KU OTUS ALGEN

‘Dexa raiba pa la i ka bu xatia más; ka bu xatia i ka bu volta pa faze mal.’ — SALMO 37:8.

Si bu faze kel ki Bíblia ta fla, bu ta ten un vida filís gósi i un futuru midjór. Odja alguns kuza sábi ki Bíblia ta promete pa futuru.

TUDU ALGEN TA BEN VIVE NA PAS

‘Es ta ben ten txeu alegria ku txeu pas.’ — SALMO 37:11.

TUDU ALGEN TA BEN TEN KUMIDA I LUGAR DI MORA

‘Es ta ben faze kazas i mora na es; es ta ben planta lugaris xeiu di pé di uva i kume di ses fruta.’ — ISAÍAS 65:21.

MÓRTI KU DUÉNSA TA KABA

‘Ka ta ten más mórti, nen ka ta ten más tristéza, nen txoru, nen dór.’ — APOCALIPSE 21:4.

Kuzê ki bu pode faze pa bu ten kel futuru li? Odja respósta na kel otu artigu.

a Pa más informason sobri traduson i distribuison di Bíblia, bai na www.jw.org na ENSINUS DI BÍBLIA > STÓRIA I BÍBLIA.

b Pa bu sabe más informason, djobe kapítlu 9 di livru A Bíblia — Palavra de Deus ou de Homem? publikadu pa Tistimunhas di Jeová. El sta na internet na www.jw.org. Bai na BIBLIOTECA > LIVROS E BROCHURAS.