Kuzê ki bu pode faze si bu sta preokupadu dimás?

ÓRAS ki nu sta preokupadu dimás, nu pode xinti sima si nu tene un karga pizadu na nos korason. (Pro. 12:25) Dja bu kustuma xinti si? Bu xinti ma bu ka pode aguentaba más? Si kel-li dja kontise ku bo, bu ka sta bo sô. Txeu di nos ta xinti kansadu, preokupadu dimás i dizanimadu pamodi situasons difísil ki nu pasa pa el. Pur izénplu, alguns di nos sta ta kuida di nos família ki sta duenti, otus sta ta sufri pamodi more-s un algen ki es ta ama ô pamodi dizastri na naturéza. Má kuzê ki pode djuda-nu lida ku preokupason?a

Nu pode prende txeu ku izénplu di rei Davidi sobri modi ki nu ta lida ku preokupason. El pasa pa txeu situason difísil i alvês ti se vida staba na prigu. (1 Sam. 17:34, 35; 18:10, 11) Kuzê ki djuda Davidi lida ku kes preokupason? Modi ki nu pode imita se izénplu?

KUZÊ KI DJUDA DAVIDI LIDA KU PREOKUPASON

Davidi pasa pa txeu prubléma omésmu ténpu. Pur izénplu, pensa kuzê ki kontise ku el kantu el staba ta fuji pa rei Saul ka mata-l. Kantu Davidi ku se trópas volta pa kaza dipôs di un géra, es fika spantadu pamodi ses inimigu furta kes kuza ki es tinha, kema ses kaza i leba ses família. Modi ki Davidi reaji? ‘Davidi i se ómis kumesa ta txora riju, ti ki es fika sen forsa pa txora más.’ Davidi fika más dizanimadu inda pamodi se ómis krê mataba el. (1 Sam. 30:1-6) Davidi sta pasaba pa três prubléma difísil omésmu ténpu: se família staba na prigu, se trópas krê mataba el i rei Saul staba se tras pa mata-l tanbê. Nton, imajina modi ki Davidi staba txeu preokupadu!

Kuzê ki Davidi faze? El ‘ganha forsa na Jeová, se Deus.’ Modi ki el faze kel-li? Nu sabe ma Davidi sénpri ta pidiba ajuda di Jeová i el ta pensaba na modi ki Jeová dja djudaba el. (1 Sam. 17:37; Sal. 18:2, 6) Pur isu, el pidi Jeová pa djuda-l sabe kuzê ki el ta fazeba. Dipôs ki Davidi resebe orientason di Jeová, el aji lógu. Nton, Jeová djuda Davidi ku se trópas i es konsigi salva ses família i toma ses kuza. (1 Sam. 30:7-9, 18, 19) Bu repara três kuza ki Davidi faze? El faze orason, el pensa na kuzê ki Jeová dja fazeba pa el i el aji di akordu ku orientason di Jeová. Modi ki nu pode imita Davidi? Odja três manera.

IMITA DAVIDI ÓRAS KI BU STA PREOKUPADU DIMÁS

1. Faze orason. Kalker óra ki bu kumesa ta xinti preokupadu dimás, faze orason pa Jeová i pidi-l pa el djuda-u i pa el da-u sabedoria. Orason pode djuda-nu xinti midjór óras ki nu ta konta Jeová tudu kuza ki sta preokupa-nu. Ô nu pode faze un orason kurtu déntu nos si na kel momentu é sô kel-la ki ta da pa faze. Tudu bês ki nu pidi Jeová pa djuda-nu, nu ta mostra ma nu ta kunfia na el sima Davidi. El fla: ‘Jeová é nha rótxa, nha fortaléza i kel ki ta salva-m. Nha Deus é nha rótxa, é na el ki N ta djobe proteson’. (Sal. 18:2) Orason ta djuda-nu mê? Un pionera ki txoma Kalia, fla: “Sénpri ki N ta faze orason, N ta xinti un pas déntu mi. Orason ta djuda-m pensa sima Jeová ta pensa i kunfia na el más txeu.” Na verdadi, orason é un prezenti di Jeová pa djuda-nu lida ku preokupasons.

2. Pensa. Óras ki bu ta pensa na kes kuza ki kontise ku bo, bu ta konsigi odja ma bu aguenta kes prubléma sô pamodi Jeová djuda-u? Óras ki nu para i nu pensa na modi ki Jeová dja djuda-nu i modi ki el djuda ses sérvu na pasadu, nu ta xinti pas i nu ta kunfia más na el. (Sal. 18:17-19) Un ansion ki txoma Juzué, fla: “N ten un lista di tudu kes orason ki Jeová dja responde-m. Kel lista ta djuda-m lenbra di kes bês ki N pidi Jeová un kuza i el da-m kel ki N mesteba.” Óras ki nu pensa na tudu kuza ki Jeová dja faze pa nos, nu ta konsigi atxa forsa pa nu kontinua ta luta kóntra kes kuza ki ta dexa-nu preokupadu.

3. Aji. Antis di nu disidi kuzê ki nu ta faze na un situason, nu debe djobe kuzê ki Palavra di Deus ta fla. (Sal. 19:7, 11) Txeu algen da kónta ma óras ki es ta piskiza un versíklu di Bíblia, es ta konsigi ntende midjór modi ki kel testu pode djuda-s na ses vida. Un ansion ki txoma Djeródi, fla: “Faze piskiza ta djuda-m prende más sobri un versíklu i ntende kuzê ki Jeová krê fla-m. Kel-li ta djuda-m guarda na korason kuzê ki N prende i sigi kel orientason.” Óras ki nu ta djobe orientason di Jeová i nu ta sigi se konsedju, é más faxi nu lida ku preokupasons.

JEOVÁ TA DJUDA-U

Davidi sabia ma el ta konsigi lidaba ku preokupasons sô ku ajuda di Jeová. El ta daba txeu valor pa ajuda di Jeová, pur isu el fla: ‘Ku forsa di Deus, N ta pode subi un muralha. Deus verdaderu é kel ki ta da-m forsa’. (Sal. 18:29, 32) Alvês nu pode xinti ma nos prubléma é sima un paredi altu ki nu ka ta konsigi subi. Má ku ajuda di Jeová, nu ta konsigi lida ku kalker prubléma ki é sima un paredi. Si nu faze orason, nu pensa na kuzê ki Jeová dja faze pa nos i nu aji di akordu ku se orientason, nu pode ten sertéza ma el ta da-nu forsa i sabedoria pa nu lida ku kalker preokupason!