Bira más amigu di nos irmons ku irmans é bon pa nos!

1-2. Kal ki é un di kes kuza más inportanti pa Jeová i kuzê ki el krê pa nu faze?

MODI ki nu ta trata otus algen é un di kes kuza más inportanti pa Jeová. Jizus inxina-nu ma nu debe ama nos prósimu sima nu ta ama nos kabésa. (Mat. 22:37-39) Kel-li ta inklui mostra bondadi ti mésmu pa kes algen ki ka ta kridita na mésmu kuza ki nos. Óras ki nu ta faze si, nu ta imita Jeová Deus ki ta “poi se sol ta sai pa algen mau i pa algen bon. I el ta poi txuba ta kai pa algen justu i pa algen injustu.” — Mat. 5:45.

² Enbóra Jeová ta ama tudu algen, el ta ama prinsipalmenti kes algen ki ta faze kel ki é dretu. (Juan 14:21) El krê pa nu imita-l. El ta insentiva-nu pa nu ten un “amor fórti” pa nos irmons ku irmans. (1 Ped. 4:8; Rom. 12:10) Kel tipu di amor li, debe ser sima kel amor ki nu ta mostra pa kes algen di nos família ki nu ta ama ô pa un algen ki nos é txeu amigu.

3. Kuzê ki nu meste faze pa nos amor kontinua ta omenta?

³ Amor é sima un planta na un jardin ki nu meste kuida di el pa el pode kria. Apóstlu Paulu da kes kriston kel konsedju li: “Nhos kontinua ta ama kunpanheru sima irmon.” (Ebr. 13:1) Jeová krê pa nu kontinua ta dizenvolve nos amor pa otus algen. Na kel artigu li, nu ta ben odja pamodi ki nu debe kontinua ta bira más amigu di nos irmons ku irmans i modi ki nu pode kontinua ta faze kel-li.

PAMODI KI NU DEBE BIRA MÁS AMIGU DI KUNPANHERU?

4. Di akordu ku Salmo 133:1, modi ki nu pode ten serteza ma nu ta kontinua ta da valor pa kel union ki nu ten ku nos irmons ku irmans? (Odja fotus.)

⁴ Lé Salmo 133:1. Nu ta konkorda ku kel salmista ki skrebe ma amizadi di verdadi ku kes ki ta ama Jeová, é ‘bon i sábi dimás’. Má, sima un algen pode dexa di repara na un arvi grandi ki el ta odja tudu dia, nos tanbê nu pode dexa di odja modi ki é bunitu kel union ki ten entri irmons ku irmans. Nu sta sénpri ta odja nos irmons ku irmans, talvês txeu bês na un simana. Modi ki nu pode ten serteza ma nu sta kontinua ta da-s valor? Nos amor pa nos irmons ku irmans ta ba ta kria si nu tra ténpu pa pensa na modi ki kada un di es ten txeu valor pa nos i pa kongregason.

5. Modi ki kel amor ki nu ten pa nos irmons pode afeta otus algen?

⁵ Txeu algen ki ta sisti nos runion pa primeru bês, ta fika txeu dimiradu di odja kel amor ki nu ten pa kunpanheru. Pamodi kel-li, es ta fika konvensidu ma nos é kristons verdaderu pamodi es ta odja kel amor ki nu ten pa kunpanheru. Jizus fla: “Tudu algen ta fika ta sabe ma nhos é nhas disiplu, si nhos ten amor pa kunpanheru.” (Juan 13:35) Odja izénplu di Kátia,a ki é un studanti di universidadi, ki ta studaba ku un Tistimunha di Jeová. El seta un konviti pa ba sisti un kongrésu. Dipôs di sisti kel primeru dia, el fla kel algen ki staba ta studa Bíblia ku el: “Nunka nha pai ku nha mai brasa-m. Má sô na un dia, N resebe 52 abrasu na nhos kongrésu! N xinti ma Jeová uza se povu pa mostra-m se amor. N krê faze párti di kel família li.” Kátia kontinua ta faze prugrésu i el batiza na 2024. Óras ki kes algen ki ta sisti runion pa primeru bês ta odja kes kuza dretu ki nu ta faze, ki ta inklui kel amor ki nu ten pa kunpanheru, es ta xinti motivadu pa sirbi Jeová. — Mat. 5:16.

6. Modi ki bira más amigu di nos irmons ku irmans ta proteje-nu?

⁶ Bira más amigu di nos irmons ku irmans pode proteje-nu. Paulu fla kes kriston: “Nhos kontinua ta da kunpanheru koraji tudu dia... asi pa puder di pekadu ki ta ingana ka poi ninhun di nhos ta fika duru.” (Ebr. 3:13) Si nu fika txeu dizanimadu i nu atxa ma é difísil nu kontinua ta faze kel ki é dretu, Jeová pode poi un irmon ta repara kel-li i da-nu kel ajuda ki nu meste. (Sal. 73:2, 17, 23) Kel tipu di ajuda li é bon pa nos.

7. Modi ki amor sta ligadu ku union? (Kolosensis 3:13, 14)

⁷ Nu ta faze párti di un grupu di pesoas ki ta sforsa pa mostra amor pa kunpanheru, pur isu nu ten txeu benson. (1 Juan 4:11) Pur izénplu, amor ta pô-nu ta “kontinua ta aguenta kunpanheru” i kel-li ta djuda-nu kontinua unidu ku nos irmons ku irmans. (Lé Kolosensis 3:13, 14; Efé. 4:2-6) Na nos runion ten un anbienti sábi ki nu ka ta atxa na ninhun otu lugar na téra.

DA ÓNRA PA KUNPANHERU

8. Modi ki Jeová ta djuda-nu sta unidu ku nos irmons ku irmans?

⁸ Kel union ki nu ten na mundu interu é un milagri. Jeová poi kel-li ta kontise sikrê nos é inperfeitu. (1 Kor. 12:25) Bíblia ta fla ma ‘Deus sta ta inxina-nu ama kunpanheru.’ (1 Tes. 4:9) Kel-li krê fla ma Jeová ta uza Bíblia pa fla-nu kuzê ki nu meste faze pa nu bira amigu di kunpanheru. Nu ta dexa ‘Deus inxina-nu’ óras ki nu ta studa i nu ta aplika kuzê ki el ta fla-nu. (Ebr. 4:12; Tia. 1:25) I é kel-li ki Tistimunhas di Jeová ta sforsa pa faze.

9. Di akordu ku Romanus 12:9-13, modi ki nu pode da ónra pa kunpanheru?

⁹ Modi ki Palavra di Deus ta inxina-nu bira amigu di kunpanheru? Odja kuzê ki Paulu fla sobri kel asuntu li, ki sta na Romanus 12:9-13. (Lé.) Repara ma el fla ma nu debe “ser primeru na da ónra pa kunpanheru.” Kuzê ki kel-li krê fla? Nu debe djobe oportunidadis pa mostra “amor fórti” pa kunpanheru di txeu manera, sima óras ki nu ta púrdua, nu ta resebe otus algen dretu i nu ta mostra ma nu gosta di da. (Efé. 4:32) Bu ka meste spera pa bus irmons ku irmans bira bu amigu. Bu pode ser “primeru” na faze kel-li. Jizus fla: “Nu ta ser más filís óras ki nu ta da di ki óras ki nu ta resebe.” — Atus 20:35.

10. Modi ki nu pode ser trabadjador óras ki nu ta “da ónra pa kunpanheru”? (Odja fotu.)

¹⁰ É interesanti ma lógu dipôs ki Paulu fla pa nu ser primeru na da ónra pa kunpanheru, el fla-nu pa nu ‘ser trabadjador, ka prigisozu.’ Un algen ki é trabadjador é zelozu i el ta trabadja duru. Óras ki el dadu un trabadju, el ta faze-l ku inpenhu. Provérbios 3:27, 28 ta fla-nu: ‘Ka bu dexa di faze kel ki é dretu pa kenha ki bu debe faze-l, si bu ta konsigi djuda.’ Nton, óras ki nu odja ma un algen meste ajuda, nu ta faze kel ki nu ta pode pa djuda-l. Nu ka ta dexa pa dipôs i nen nu ka ta atxa ma otu algen ta ba djuda-l. — 1 Juan 3:17, 18.

11. Kuzê ki pode djuda-nu fika más amigu di kunpanheru?

¹¹ Otu manera ki nu pode da ónra pa kunpanheru, é púrdua faxi óras ki otus algen ta ofende-nu. Efézius 4:26 ta fla: “Ka nhos dexa sol kanba timenti inda nhos sta xatiadu.” Pamodi? Sima versiklu 27 ta fla, si nu ka faze kel-li nu pode ‘da Diabu un xansi.’ Na se Palavra, Jeová txeu bês ta fla-nu pa nu púrdua kunpanheru. Kolosensis 3:13 ta fla pa nu “kontinua ta... sta sénpri prontu pa púrdua kunpanheru”. Púrdua érus di otus algen é un di kes midjór manera di nu bira más amigu di kunpanheru. Óras ki nu ta faze kel-li, nu ta djuda pa nu ‘mante unidu i na pas ku kunpanheru.’ (Efé. 4:3) É klaru ma óras ki nu ta púrdua otus algen, nu ta djuda organizason di Jeová fika más unidu i na pas.

12. Modi ki Jeová ta djuda-nu púrdua kunpanheru?

¹² É verdadi ma alvês nu pode atxa difísil púrdua kes algen ki magua-nu. Má nu ta konsigi purdua-s ku ajuda di spritu di Deus. Dipôs di fla-nu pa nu “ten amor fórti pa kunpanheru” i pa nu “ser trabadjador,” Bíblia ta fla-nu: “Nhos dexa spritu santu poi nhos ta ten zelu.” Kel-li krê fla ma spritu santu di Deus pode pô-nu ta fika ku txeu zelu i animadu. (Romanus 12:11.) Nton, spritu santu di Deus pode djuda-nu mostra amor fórti pa kunpanheru i sta prontu pa púrdua kunpanheru. Pamodi kel-li, nu ta inplora Jeová pa djuda-nu. — Luk. 11:13.

“PA KA TEN DIVIZON ENTRI NHOS”

13. Kuzê ki pode kria divizon entri nos?

¹³ Na kongregason ten “tudu tipu di algen” i di kulturas diferenti. (1 Tim. 2:3, 4) Si nu ka toma kuidadu, kes diferénsa li pode kria divizon na asuntus ki kada algen debe skodje, sima modi ki nu ta bisti i konpo, modi ki kada un ta kuida di se saúdi i ki diverson ki nu ta skodje. (Rom. 14:4; 1 Kor. 1:10) Pamodi Deus sta ta inxina-nu ama kunpanheru, nu debe toma kuidadu pa nu ka insisti ma nos disizons é más midjór di kes di otus algen. — Flp. 2:3.

14. Kuzê ki sénpri nu debe sforsa pa faze i pamodi?

¹⁴ Tanbê, nu pode djuda pa ka ten divizon na kongregason óras ki nu ta sforsa pa inkoraja kunpanheru na tudu situason. (1 Tes. 5:11) Na kes últimu ténpu li, txeu algen ki staba inativu ô ki tradu di kongregason, volta otu bês. Nu ta resebe-s ku amor! (2 Kor. 2:8) Odja kuzê ki kontise ku un irman ki volta pa Salon di Reinu dipôs di pasa 10 anu inativu. El fla: “Tudu algen resebe-m ku sorizu i mozada.” (Atus 3:19) Modi ki kes kuza sinplis li ki ta mostra bondadi pô-l ta xinti? El fla: “Kel-li faze-m xinti ma mô di Jeová staba ta djuda-m ser filís otu bês.” Óras ki nu ta sforsa pa inkoraja tudu algen, Jizus pode uza-nu pa nu anima kes algen ki “sta trabadja duru i ki sta kansadu”. — Mat. 11:28, 29.

15. Kal ki é otu manera ki nu pode djuda kongregason sta unidu? (Odja fotu.)

¹⁵ Otu manera ki nu pode djuda pa ten union, é através di kuzas ki nu ta fla. Jó 12:11 ta fla: “Obidu ka ta sprimenta palavras, sima língua ta sprimenta gostu di kumida?” Sima un bon kuzinheru sénpri ta sprimenta se kumida antis di sirbi-l pa otus algen pa el ten serteza ma el sta sábi, nos tanbê nu debe pensa ku kuidadu sobri kuzê ki nu ta fla antis di nu fla-l. (Sal. 141:3) Sénpri nu krê ten serteza ma kuzê ki nu ta fla ta ba inkoraja, anima i “djuda kes ki sta ta obi.” — Efé. 4:29.

16. Prinsipalmenti kenha ki debe sforsa pa pâpia di manera ki ta da algen koraji?

¹⁶ Prinsipalmenti kes ki é maridu i pai ku mai debe sforsa pa pâpia di un manera ki ta inkoraja. (Kol. 3:19, 21; Titu 2:4) Ansions tanbê debe sforsa pa anima i inkoraja kes ovelha di Jeová. (Isa. 32:1, 2; Gál. 6:1) Un provérbiu di Bíblia ta fla-nu: “Un palavra déntu dʹóra é bon dimás!” — Pro. 15:23.

NU DEBE AMA “NA KUZAS KI NU TA FAZE I DI VERDADI”

17. Modi ki nu pode ten serteza ma nos amor pa nos irmons ku irmans é di korason?

¹⁷ Apóstlu Juan ta insentiva-nu pa nu “ama, ka sô ku palavra nen sô ku bóka, má na kuzas ki nu ta faze i di verdadi.” (1 Juan 3:18) Nu krê pa nos amor pa nos irmons ku irmans ben di korason. Modi ki nu pode ten serteza ma nos amor é si? Kantu más ténpu nu pasa ku nos irmons ku irmans, más nu ta fika amigu di kunpanheru i kel amor ki nu ten pa kunpanheru ta fika más fórti. Pur isu, kria oportunidadi pa pasa ténpu ku otus irmon na runion i na pregason. Tra ténpu pa vizita-s. Óras ki nu ta faze si, nu ta mostra ma ‘Deus sta ta inxina-nu ama kunpanheru.’ (1 Tes. 4:9) I nu ta kontinua ta odja ‘modi ki é bon i sábi dimás pa irmons vive djuntu i unidu!’ — Sal. 133:1.