1925 — Dja pasa 100 anu

UN SPERANSA KI DIMORA PA REALIZA

Na anu di 1925, txeu Studanti di Bíblia staba ta spera ma téra ta ben biraba un paraízu. Pamodi? Irmon Albert Schroeder, ki dipôs sirbi na Grupu Enkaregadu di Óbra, splika: “Nu ta kriditaba ma na anu di 1925 kes kriston skodjedu ku spritu santu ta baba pa séu pa es ba fazeba párti di Reinu i kes ómi fiel, sima Abraon, Davidi i otus, ta ben resusitadu pa sérba prínsipis i pa governaba dibaxu di Reinu di Deus.” Nton kantu kel-li ka kontise alguns irmon ku irmans fika diziludidu. — Pro. 13:12.

Sikrê kes Studanti di Bíblia fika diziludidu, maioria kontinua okupadu na trabadju di pregason. Es kumesa ta da kónta ma prega sobri Jeová éra kel kuza más inportanti ki es tinha ki faze. Pur izénplu, nu ben odja modi ki es uza rádiu pa prega pa más algen.

TISTIMUNHAS DI JEOVÁ FAZE MÁS STASON DI RÁDIU

Dja ki na kel anu antis txeu algen staba ta obi kel stason di rádiu WBBR, nton na anu di 1925 Studantis di Bíblia faze otu stason di rádiu pértu di Chicago, na Illinois. Nómi di kel novu stason éra WORD. Ralph Leffler ki djuda na faze kel stason fla: “Na kes noti friu di invérnu, pesoas di txeu lugar lonji ta obiba kel stason WORD.” Pur izénplu, un família ki ta moraba más di 5 mil kilómetru (3 mil milha) di distánsia, na sidadi di Pilot Station, na Alaska obi un di kes primeru prugrama. Dipôs kel família skrebe un karta pa kes algen ki ta trabadjaba na kel stason di rádiu pa agradese-s pa kel prugrama ki da-s koraji i djuda-s prende más sobri Deus i sobri Bíblia.

Sentinéla di 1 di dizenbru di 1925 splika pamodi ki txeu algen di lugaris txeu lonji konsigi obi kel prugrama. El fla: “WORD é un di kes midjór stason ki ten na Mérka. Pesoas ta pode obi kel stason di rádiu li di lésti pa oésti di Mérka, na Kuba i na nórti di Alaska. Txeu algen ki nunka ka obiba verdadi krê prendeba más pamodi prugrama ki es obi na rádiu.”

Duránti kel ténpu kes Studanti di Bíblia tanbê krê fazeba un stason di rádiu pa prega notísias sábi na Kanadá. Na anu di 1924, stason di rádiu CHUC fazedu na Saskatoon, na Saskatchewan. Kel-li é un di kes primeru stason di rádiu ki tinha asuntus di relijion na Kanadá. Na anu di 1925, es tevi ki djobe un lugar más grandi pa poi kel stason di rádiu. Pur isu, organizason kunpra i konpo un tiatru antigu na Saskatoon i es muda stúdiu pa la.

Grasas-a kel stason li, txeu algen ki ta moraba na sidadis pikinoti i na lugaris izoladu na Saskatchewan obi notísias sábi pa primeru bês. Pur izénplu, na un sidadi izoladu, un sinhora ki txomaba Graham skrebe ta pidi publikasons ku bazi na Bíblia dipôs ki el obi un di kes prugrama. Irmon George Naish fla: “Se pididu di ajuda ta parseba txeu urjenti, pur isu nu manda-l tudu kes livru Studu di Skrituras.” Déntu poku ténpu sinhora Graham staba ta pâpia di notísias sábi na lugaris más lonji.

UN NOVU INTENDIMENTU

Revista Sentinéla di 1 di marsu di 1925, tinha un artigu inportanti ku téma: “Nasimentu di un nason”. Pamodi ki kel artigu éra txeu inportanti? Kes Studanti di Bíblia sabia ma Satanás ta governa kes dimóni, relijion falsu, govérnu i komérsiu li na téra. Através di kel artigu li, “skravu fiel i prudenti” djuda irmons ku irmans intende ma Jeová tanbê ten sérvus na séu i na téra ki sta unidu. Es sta siparadu di mundu di Satanás, es ta trabadja djuntu pa apoia Jeová i es é kóntra Satanás i kes ki ta apoia-l. (Mat. 24:45) Tanbê, skravu splika ma Reinu di Deus kumesa ta governa na anu di 1914 i ma é na kel anu ki ‘kumesa un géra na séu’, i Satanás i ses dimóni botadu di séu pa téra. — Apo. 12:7-9.

Alguns Studanti di Bíblia ka konkorda ku kel novu intendimentu li. Pur isu kel Sentinéla fla: “Si algun leitor di Sentinéla ka ta konkorda ku kuzê ki li ta fla nton nu ta konsedja-l pa el mostra paxénxa i pa el kunfia na Jeová timenti el ta kontinua ta sirbi-l di manera fiel.”

Tom Eyre, un kolpurtor (ki gósi ta txomadu pioneru) di Gran-Britanha fla modi ki maioria di kes Studanti di Bíblia xinti kantu es lé kel artigu. El fla: “Irmons fika kontenti di obi kel splikason di Apokalipse kapitlu 12. Dja ki nu fika ta sabe ma Reinu dja sta ta governa na séu, nu fika txeu animadu pa nu pâpia di kel notísia sábi li ku otus algen. Kel-li pô-nu ta prega inda más i el djuda-nu odja ma Jeová sta ba fazeba kuzas sábi na futuru.”

TISTIMUNHU SOBRI JEOVÁ

Oji, Tistimunhas di Jeová konxe dretu kes palavra ki sta na Isaías 43:10 ki ta fla: ‘“Anhos é nhas tistimunha,” é Jeová ki fla, “Sin, nha sérvu ki N skodje.”’ Má, antis di anu 1925, nu ta papiaba poku di kel testu li na nos publikason. Má, kel-li muda. Na anu di 1925, Sentinéla pâpia di kel asuntu di Isaías 43:10 i 12 na 11 revista!

Na fin di agostu di 1925, Studantis di Bíblia djunta na un kongrésu na Indianápolis, na stadu di Indiana. Irmon Rutherford skrebe un mensajen na prugrama di kongrésu pa resebe kes delegadu. Kel mensajen, ta flaba: “Nu ta ben pa kel kongrésu li pa resebe forsa di Deus pa nu volta pa nu ba faze trabadju di Deus ku más forsa.” Duránti kes 8 dia di kongrésu tudu kes algen ki sisti inkorajadu na da tistimunhu sobri Jeová na tudu oportunidadi.

Na sábadu, na dia 29 di agostu, irmon Rutherford faze un diskursu ku téma: “Nu txomadu pa aji”. Na se diskursu el pâpia di pamodi ki prega é txeu inportanti. El fla: “Jeová fla se povu: ‘Anhos é nhas tistimunhas i ami é Deus.’ Dipôs el fla kes palavra fórti li: ‘Nhos labanta un sinal pa kes povu.’ Kes úniku algen na téra ki pode da tistimunhu di Jeová é kes ki el ta gia ku se spritu pamodi es é ses tistimunha.” — Isa. 43:12; 62:10.

Dipôs ki irmon Rutherford tirmina se diskursu, el lé un folhetu ku téma: “Mensajen di speransa”. Tudu algen konkorda ku kel mensajen ki ta flaba ma Reinu di Deus é úniku speransa pa resebe bensons di pas, saúdi, vida, liberdadi i filisidadi pa tudu ténpu. Kel mensajen li dipôs traduzidu i inprimidu na txeu língua pa sérba uzadu na pregason. Distribuidu uns 40 milhon di kópia.

Dura alguns anu pa Studantis di Bíblia muda ses nómi pa Tistimunhas di Jeová. Má, poku-poku es kumesa ta intende pamodi ki é inportanti ser se tistimunha.

STUDANTIS DI BÍBLIA KUMESA TA REVIZITA KES ALGEN INTERESADU

Sima Studantis di Bíblia ba ta bira kada bês más txeu na mundu interu, organizason insentiva irmons ka sô pa distribui publikason, má tanbê pa es volta pa ba vizita kes algen ki mostra interesi na notísia sábi. Dipôs di kanpanha pa distribui tratadu Mensajen di speransa, un Boletima da kel orientason li: “Nhos torna ba vizita kes algen ki resebe kel tratadu Mensajen di speransa.”

Boletim di janeru di 1925 tinha tanbê un spiriénsia di un Studanti di Bíblia na sidadi di Planu, na Texas. El fla: “Nu sta dimiradu pamodi óras ki nu ta prega na lugaris ki dja nu pregaba antis nu ta ten midjór rezultadus di ki óras ki nu ta prega na novus tiritóriu. Nu kubri tiritóriu di un sidadi pikinoti sinku bês duránti kes últimu 10 anu. Ka dura li irman Hendrix i nha mai torna kubri kel tiritóriu i es dexa más livru di ki antis.”

Un kolpurtor na Panamá skrebe: “Txeu algen ki ka krê obiba mi kantu N ba vizita-s primeru bês, muda ses atitudi kantu N volta pa sugundu ô tirseru bês. Kel últimu anu li, N pasa más ténpu ta prega pa kes algen ki dja N vizitaba antis i N tevi bons spiriénsia ku alguns di es.”

PLANUS PA FUTURU

Na fin di anu di 1925, irmon Rutherford skrebe un karta pa tudu kolpurtor sima el ta fazeba tudu anu i el pâpia di kuzê ki fazedu na trabadju di pregason na kel anu i kuzê ki es debe fazeba na kes anu ki staba pa ben. El fla: “Duránti kel últimu anu ki pasa nhos tevi priviléjiu di konsola txeu algen ki staba tristi. Kel trabadju li traze nhos txeu alegria... Na prósimu anu nhos ta ben ten txeu oportunidadi di da tistimunhu sobri Deus i sobri se Reinu i mostra pesoas kenha ki ta adora-l di verdadi. ... Djuntu nu ta ben kontinua ta uza nos vós pa lova nos Deus i nos Rei.”

Na fin di anu di 1925 irmons faze planu pa bira Betel na Brooklyn más grandi. Na anu di 1926 ta ba kumesaba kel trabadju di konstruson más grandi ki organizason dja fazeba.