Bíblia dja flaba modi ki pesoas ta ben pensaba i konportaba na nos ténpu?

Respósta di Bíblia

Sin. Bíblia dja flaba ma konportamentu di maioria di algen di nos ténpu ta mudaba pa piór. Bíblia ta mostra ma pamodi kel-li, pesoas ka ta tinha kes bon prinsípiu ki ta djudaba es vive na pas ku kunpanheru.a (2 Timóteo 3:1-5) Má Bíblia tanbê ta fla ma é ka tudu algen ki ta tinha kel tipu di konportamentu li. Envês di kel-li, ku ajuda di Deus, es ta sforsaba pa ka dexa kel tipu di konportamentu li influensia-s i es ta prendeba pensa i aji di un manera ki ta dexaba Deus kontenti. — Isaías 2:2, 3.

Na kel artigu li bu ta atxa:

Kuzê ki Bíblia dja flaba sobri manera di pensa i konportamentu di pesoas na nos ténpu?

Bíblia ta pâpia sobri kel konportamentu txeu mariadu ki pesoas ta ben tinha na nos ténpu, prinsipalmenti pamodi es ta ben pensaba sô na ses kabésa. Pesoas ta sérba ‘diskontroladu’, ‘ta ama sô ses kabésa’ i ‘envês di ama Deus es ta krê sô pasa sábi’. — 2 Timóteo 3:2-4.

Nu ta odja kel profesia li ta kunpri pamodi txeu algen na nos ténpu ta pensa sô na ses kabésa, na kuzê ki é bon sô pa es, na kuzê ki ta pô-s ta da dretu na vida, ta xinti sábi i otus kuza sima kes-li. Kel konportamentu li dja bira normal ki txeu algen, gosta di fla si: ‘Primeru é mi, sugundu é mi, tirseru é mi, réstu ta ben dipôs’. Pur isu txeu algen ka ta konsigi mostra bons kualidadi pamodi es ‘ka ta ama kuzas dretu’. Es é ‘ingratu’, pur isu es ka ta mostra gratidon pa kuzas ki es ten ô pa kuzas ki otus algen ta faze pa es. — 2 Timóteo 3:2, 3.

Kel atitudi ki pesoas ten di pensa sô na ses kabésa ta pô-s ta ten otus atitudi ki gósi dja bira normal:

Ganansiozus. Txeu algen ta ‘ama dinheru’. Es ta atxa ma dinheru i kuzas material é ki ta djuda-s ten un vida dretu. — 2 Timóteo 3:2.
Orgulhozus. Txeu algen é ‘konvensidu’ i ‘xeiu di orgulhu’. (2 Timóteo 3:2, 4) Es gosta di da pa bon i es ta pâpia di manera izajeradu sobri ses kapasidadi, kualidadi i dinheru.
Kaluniadoris. Na tudu lugar ki nu bai, nu ta atxa kes algen ki é ‘kaluniador’ ô ki ‘ta konta mintira sobri Deus’ ô sobri otus algen pa suja ses nómi. — 2 Timóteo 3:2, 3.
Temozus. Txeu algen é ‘disleal’, es ‘ka ta krê djobe pas ku kunpanheru’, es é ‘traidor’ i ‘temozus’. (2 Timóteo 3:2-4) Es ta mostra kes atitudi li óras ki es ta nega djobe pas ku kunpanheru, i es ka ta krê rezolve prublémas nen kunpri ku ses promésa.
Violéntus. Txeu algen na nos ténpu é ‘runhu’. Es ta xatia faxi i kel-li txeu bês ta pô-s ta aji ku violénsia i di manera kruel. — 2 Timóteo 3:3.
Ta faze kuzas ki é kóntra lei. Jizus dja flaba ma ‘kuzas ki é kóntra lei ta biraba más txeu’ na nos ténpu. (Mateus 24:12) Tanbê el fla ma ta tinha ‘konfuzon’ ô ‘dizórdi’ txeu dimás. — Lucas 21:9, nóta di rodapé.
Sen amor pa família. Dja ki txeu algen na nos ténpu ‘ka ta obi ku pai ku mai’ i es ‘ka ten amor pa família’, es ka ta kuida di es, es ta abuza di es i maltrata-s. — 2 Timóteo 3:2, 3.
Relijiozus finjidu. Kada bês más txeu algen ki ten un relijion ta sô ‘finji ma es ta adora Deus’. (2 Timóteo 3:5) Envês di es faze vontadi di Deus, es ta faze kel ki xéfis di relijion ta fla-s ki es krê obi. — 2 Timóteo 4:3, 4.

Modi ki kes algen ki ta pensa sô na ses kabésa ta ben prujudikaba otus algen?

Dja ki txeu algen ta pensa sô na ses kabésa, kel-li ta poi un monti di algen ta ten prublémas gravi na menti i ta sufri txeu. (Eclesiastes 7:7) Pur izénplu, alguns algen ta ama dinheru i es ta pruveta di otus algen. Kes algen ki ka ten amor pa ses família, alvês ta abuza di es, ta pô-s ta entra na depreson ô ti ta pensa na mata kabésa. I kes algen ki é disleal i traidor ta poi kes algen ki es trai ta sufri txeu i alvês kel dór ta dura pa un monti ténpu.

Pamodi ki maioria di algen ta ben mudaba pa piór?

Bíblia ta splika pamodi ki algen sta si na mundu:

Amor di verdadi pa Deus i pa otus algen sta ta bira kada bês más poku. (Mateus 24:12) Pur isu, kada bês más algen ta pensa sô na ses kabésa.
Satanás ô Diabu, tradu di Séu i el botadu pa Téra. (Apocalipse 12:9, 12) Désdi kel ténpu el sta ta influensia algen na mundu interu pa pô-s ta pensa sô na ses kabésa. — 1 João 5:19.

Kuzê ki nu pode faze pa nu ka dexa konportamentu mariadu di pesoas influensia-nu?

Palavra di Deus ta fla: ‘Di kes tipu di algen li, fika lonji.’ (2 Timóteo 3:5) Kel-li ka krê fla ma nu ten ki ivita otus algen. Envês di kel-li, nu debe ivita ten amizadi fórti ku kes algen ki ka ta ama Deus i ki ta pensa sô na ses kabésa. — Tiago 4:4.

Tudu algen ta ben mudaba pa piór?

Nau. Bíblia dja flaba ma alguns algen ta ben fikaba ‘ta jeme pamodi tudu kes kuza mariadu ki sta fazedu’. (Ezequiel 9:4) Es ta ben ivitaba kel atitudi di pensa sô na ses kabésa i es ta ben dexaba kes mandamentu di Deus gia ses vida. Ses manera di pâpia i di aji ta sérba txeu diferenti di kel di maioria di algen. (Malaquias 3:16, 18) Pur izénplu, es ta ben sforsaba pa mante pas ku tudu algen, es ka ta ben sérba algen violéntu i nen es ka ta ben meteba na géra. — Miqueias 4:3.

Konportamentu di pesoas ta ben pioraba di tal manera ki ka ta tinha soluson más?

Nau. Mundu ka ta ben fika mariadu di tal manera ki ta fika sô konfuzon. Envês di kel-li, ka ta dura Deus ta ben kaba ku tudu kes algen ki ka ta obi ku el. (Salmo 37:38) Ta ben ten un ‘Téra novu’, ki krê fla kes algen ki é mansu ki ta obi ku Deus i ki ta ben vive na pas li na Téra pa tudu ténpu. (2 Pedro 3:13; Salmo 37:11, 29) Kel speransa li é ka sô un sonhu. Mésmu gósi, Bíblia sta ta djuda algen muda ses vida pa es vive di akordu ku kes lei di Deus. — Efésios 4:23, 24.

a Kes profesia di Bíblia i kuzas ki sta ta kontise na mundu ta mostra ma nu sta ta vive na ‘ténpu di fin’ i ma kuzas ta ben fikaba ‘konplikadu’ i ‘difísil di aguenta.’ (2 Timóteo 3:1; Tradução do Novo Mundo) Djobe más informason na “Kuzê ki ta prova ma nu sta ta vive na ténpu di fin?”