Kuzê ki N debe faze si nha mai ku nha pai ka sta dexa-m uza redi sosial?

Talvês tudu bus amigu ta uza redi sosial i tudu óra es ta pâpia sobri kel-li. Talvês ti es ta faze-u trósa pamodi bu ka ten un kónta na internet. Kuzê ki bu debe sabe sobri kel asuntu li? I kuzê ki bu pode faze sobri kel-li?

Kuzê ki bu debe sabe

É ka sô bo. Txeu mai ku pai ka ta dexa ses fidju uza redi sosial. Kel-li pode kontise pamodi es sabe ma uza redi sosial sta ligadu ku kes kuza li:

• depreson i otus prubléma mental.

• odja pornografia, manda ô resebe imajen ki ten aver ku séksu i sufri abuzu di otus algen pa internet.

• prublémas entri amigus sen nisisidadi.

Txeu jóven disidi para di uza redi sosial. Es mê es da kónta ma kel-li staba ta prujudika-s más di ki djuda-s. Odja alguns izénplu:

• Priscilla diskubri ma kel-li staba ta toma-l ténpu ki el podia uzaba na kuzas más midjór.

• Jeremy odja kuzas mariadu na se redi sosial i el ka staba ta konsigi inpidi pa kes kuza ka parseba na se aparelhu eletróniku.

• Bethany diskubri ma kel-li staba ta pô-l ta pensa dimás na kuzê ki otus algen staba ta faze.

“N disidi paga nha aplikativu di redi sosial i N sta kontenti di faze kel-li. Na verdadi nen N ka sta xinti falta di el i N sta kontenti pamodi N tene más ténpu pa N konsentra na kel ki é más inportanti. ” — Sierra.

“N ka ta gostaba di modi ki redi sosial pode poi un algen ta fika visiadu i modi ki N ta fikaba preokupadu ku kuzê ki pesoas ta flaba pamodi kes kuza ki N ta poba. Ka foi fásil paga nha kónta, má kantu N faze kel-li, N xinti más midjór. N sta xinti mutu más pas sen redi sosial.” — Kate.

Kuzê ki bu pode faze

Ruspeta kes régra di bu mai ku bu pai. Mostra-s ma bo é un algen maduru i ma bu ta konsigi vive di akordu ku ses régra sen fika xatiadu ô ta reklama.

Prinsípiu di Bíblia: ‘Algen ki ka ten sabedoria ta mostra tudu se raiba, má algen ki ten sabedoria ta mante kalmu i el ta kontrola-l.’ — Provérbios 29:11.

Alguns algen pode insentiva-u pa bu uza redi sosial sen bu mai ku bu pai sabe ô kria un kónta sukundidu. Kel-li ta sérba un éru gravi! Si bu faze un kuza sukundidu, bu ta fika ta xinti preokupadu dimás i kulpadu. Tanbê si es diskubri, bu pode ten prubléma, i ta sérba difísil pa es kunfiaba na bo.

Prinsípiu di Bíblia: ‘Nu krê konporta ku onestidadi na tudu kuza.’ — Ebreus 13:18.

Poi kel-li ta ser bu disizon. Sima kes jóven ki papiadu di es di riba, bu pode pensa na txeu motivu pa bu ivita redi sosial. Si fika klaru ma uza redi sosial é ka bon pa bo, nton ivita-l ka sô pamodi é un disizon di bu mai ku bu pai, má pamodi é bu disizon tanbê. Asi, si bus koléga pergunta sobri kel-li, bu ka ta fika ku vergónha i nen es ka ta faze-u trósa pamodi kel-li.

Konkluzon: Apoia bu mai ku bu pai i atxa algun kuza ki nhos pode konkorda sobri redi sosial. Asi bu ta xinti ma é bu disizon tanbê. Peloménus pa gósi, bu pode vive sen redi sosial.