Ajuda pa kes algen ki sta sufri violénsia na família

Organizason Mundial di Saúdi fla: “Violénsia kóntra mudjer sta ta kontise na mundu interu, el sta ta spadja sima un duénsa i é txeu inportanti faze algun kuza pa para-l.” Di akordu ku kónta ki kel organizason li faze, es fla ma kuazi 30 pursentu “di kes mudjer ki staba kazadu ô ta namora, es sotadu ô es sufri violénsia seksual” di ses kunpanheru. I un rilatóriu di Organizason di Nason Unidu fla ma na un anu ki pasa ka dura li, tudu dia 137 mudjer matadu na mundu interu pa ses kunpanheru ô pa un otu algen di ses família.a

Studus pode mostra tamanhu di kel prubléma di violénsia na família, má el ka ta konsigi mostra kes sentimentu i dór di kada un di kes algen ki sta ta sufri.

Bu sta sufri violénsia na família? Bu ta konxe algun algen ki sta sufri pamodi violénsia na família? Si sin, odja alguns kuza ki Bíblia ta pâpia ki pode djuda.

Si bu kunpanheru sta abuza di bo, kel-li é ka bu kulpa

Bu pode atxa ajuda

Bu ka sta bo sô

Violénsia na família ta ben kaba

Modi ki bu pode djuda un algen ki sta sufri violénsia na família

Si bu kunpanheru sta abuza di bo, kel-li é ka bu kulpa

Kuzê ki Bíblia ta fla: “Kada un di nos ta ben presta kónta di nos kabésa pa Deus.” — Romanus 14:12.

Lenbra di kel-li: Kel algen ki sta ta abuza di bo é responsável pa kuzê ki el sta ta faze.

Si bu kunpanheru ta kulpa-u pa abuzu ki el ta faze-u, el sta mariadu. Mudjeris ka merese ser abuzadu di es, es merese ser amadu. — Kolosensis 3:19.

Un algen ki ta abuza di se kunpanheru, pode sta ta sufri di un duénsa mental, talvês el kriadu na un família undi ki alguns algen ta trataba otus ku violénsia ô pode ser ki el ta bebe txeu. Má simé, el ten ki presta kónta na Deus pa manera ki el ta trata-u i el é responsável pa faze kuzê ki meste pa el muda se manera di aji.

Bu pode atxa ajuda

Kuzê ki Bíblia ta fla: “Ku konsedju di txeu algen ta ten bons rezultadu.” — Provérbios 15:22.

Lenbra di kel-li: Si bu ka sta xinti suguru ô bu ka sabe kuzê ki bu ta faze, otus algen pode djuda-u.

Pamodi ki bu pode meste di ajuda di otus algen? Si bu sta sufri violénsia na família ten txeu kuza ki bu ta meste pensa na el. Pode ser difísil pa bu disidi kal ki é midjór kuza ki bu ten ki faze, pamodi bu ka sabe kal di kes kuza li é más inportanti:

• Bu suguransa

• Kuzê ki ta ba ser midjór pa bus fidjus

• Dinheru

• Amor pa bu kunpanheru

• Dizeju di salva bu kazamentu ô bu namoru si bu kunpanheru muda se manera di aji.

É normal bu ka sabe kuzê ki bu ta faze i xinti ma kel situason é txeu konplikadu. Na kenha ki bu pode pidi ajuda?

Un amigu di kunfiansa ô un algen di bu família talvês pode da-u kel ajuda ki bu sta meste. Pâpia ku un algen ki ta preokupa ku bo pode faze txeu diferénsa.

Linha di apoiu pa kes algen ki ta sufri violénsia na família pode da-u kel ajuda lógu. Kes algen ki ta trabadja na kes linha di apoiu pode djuda-u kria un planu di suguransa. Si bu kunpanheru rekonhese se prubléma i di verdadi el krê muda, un linha di apoiu pode djuda-l intende kuzê ki el meste faze pa el para di abuza di bo.

Otus ajuda di imerjénsia pode djuda-u si bu sta na prigu na kel momentu. Kes algen pode inklui dotoris, infermerus ô otus algen ki é trenadu pa kel-li.

Bu ka sta bo sô

Kuzê ki Bíblia ta fla: ‘Jeováb sta pértu di kes ki tene korason maguadu, el ta salva kes ki tene spritu dizanimadu.’ — Salmo 34:18.

Lenbra di kel-li: Deus promete djuda-u.

Jeová ta preokupa txeu ku bo. (1 Pedru 5:7) El ta intende bus pensamentu i bus sentimentu más profundu. El pode konsola-u ku se Palavra, ki é Bíblia. I el ta konvida-u pa bu faze orason pa el. Óras ki bu ta faze orason, bu pode pidi pa el da-u sabedoria i forsa ki bu meste pa bu lida ku bu situason. — Isaías 41:10.

Violénsia na família ta ben kaba

Kuzê ki Bíblia ta fla: ‘Kada un di es ta ben xinta baxu di se pé di figu, i ka ta ten ningen pa pô-s ta xinti medu’. — Miqueias 4:4, nóta di rodapé.

Lenbra di kel-li: Bíblia ta promete ma ka ta dura li kaza ta ben ser un lugar di pas pa tudu algen.

É sô Jeová ki ta pode rezolve pa tudu ténpu kes prubléma ki nu sta pasa pa el. Bíblia ta promete: “El ta ben linpa tudu lágua di ses odju, i ka ta ben ten más mórti, nen tristéza, nen txoru nen dór.” (Apokalipse 21:4) Na kel ténpu la, nu ka ta ben ten más kes mimória kasábi má nu ta ben lenbra sô di kes kuza bon. (Isaías 65:17) É kel futuru di pas li ki Bíblia ta promete pa bo.