Kuzê ki Bíblia dja flaba sobri grandis tremor di téra?
Tudu anu, ta kontise milharis di tremor di téra. Nbóra txeu di es é ka fórti, ten alguns ki ta faze txeu stragu i ta traze sufrimentu i mórti. Alguns di kes tremor di téra ta poi tsunami ta kontise na kes lugar pértu di mar. I kes tsunami ta mata txeu algen na kes lugar. Kuzê ki Bíblia dja flaba sobri grandis tremor di téra?
Na kel artigu li
Bíblia dja flaba ma tremor di téra ta kontiseba?
Jizus pâpia di tremor di téra na un profesia ki sta na Bíblia. Nu pode lé kuzê ki el fla na kes três livru di Bíblia li:
‘Pamodi gentis di un nason ta briga ku gentis di otu nason i reinu ku reinu, ta ben ten falta di kumida i tremor di téra na un lugar tras di kel otu.’ — Mateus 24:7.
‘Un nason ta fika kóntra otu nason i reinu kóntra reinu; Téra ta ben treme na un lugar tras di kel otu; tanbê ta ben ten falta di kumida’. — Marcos 13:8.
‘Ta ben ten grandis tremor di téra, i na un lugar tras di kel otu, ta ben ten falta di kumida i duénsas ki ta spadja’. — Lucas 21:11.
Jizus fla ma ta ben tinha ‘grandis tremor di téra na un lugar tras di kel otu’ i tanbê géras, falta di kumida i duénsas ki ta spadja. Óras ki tudu kes kuza li kontiseba tudu djuntu, ta fikaba klaru ma nu sta ta vive ‘na fin di es sistéma’ ô na ‘ténpu di fin.’ (Mateus 24:3; 2 Timóteo 3:1) Di akordu ku kel ki Bíblia ta fla, ‘ténpu di fin’ kumesa na anu di 1914 i ti inda el ka kaba.
Kes tremor di téra ki sta ta kontise oji, sta ta kunpri profesia di Bíblia?
Sin, kes kuza ki sta ta kontise ta mostra ma kel profesia di Jizus sobri tremor di téra sta ta kunpri oji. Désdi anu di 1914, dja kontise más di 1.950 tremor di téra, ki djuntadu dja mata más di dôs milhon di algen.a Nu ben odja alguns izénplu ki kontise na nos ténpu.
2004 — Osianu Índiku. Un tremor di téra ku forsa di 9.1 poi un tsunami ta kontise na 12 país i mata uns 225 mil algen.
2008 — Xina. Kontise un tremor di téra ku forsa di 7.9 ki distrui zónas i sidadis, i pesoas ta fla ma uns 90 mil algen móre, uns 375 mil panha pankada i milhons di algen fika sen kaza.
2010 — Aiti. Kontise un tremor di téra ku forsa di 7.0, i dipôs kontise otus tremor di téra más fraku ki tudu djuntu mata más di 300 mil algen i más di un milhon di algen perde ses kaza.
2011 — Japon. Kontise un tremor di téra ku forsa di 9.0 i kes tsunami ki kontise pamodi el mata uns 18.500 algen i poi milharis di algen ta bandona ses kaza. Kel Sentral di Fukushima straga i kontise un asidenti nukliar gravi. I 10 anu dipôs, más di 40 mil algen inda ka konsigi volta pa ses kaza ki ta fika pértu di kel lugar, pamodi kel nível altu di radiason ki é prigozu.
Kuzê ki kel profesia sobri tremor di téra ten aver ku nos?
Kel profesia di Bíblia sobri tremor di téra ta djuda-nu fika sienti na kuzê ki ka ta dura ta ben kontise. Jizus fla: ‘Óras ki nhos odja kes kuza li ta kontise, nhos sabe ma Reinu di Deus sta kuazi ta txiga.’ — Lucas 21:31.
Bíblia ta mostra ma Reinu di Deus é un govérnu ki izisti mê na séu i ma Jizus Kristu é se Rei. É sobri kel Reinu li ki Jizus inxina se disiplus pa ora. — Mateus 6:10.
Óras ki Reinu di Deus ben governa Téra, Deus ta ben kaba ku kes dizastri na naturéza, sima tremor di téra ki ta prujudika txeu algen. (Isaías 32:18) Tanbê, Deus ta ben kura pesoas di tudu kuza ki es sta ta sufri oji pamodi kes tremor di téra ki ta kontise. (Isaías 65:17; Apocalipse 21:3,4) Pa bu sabe más sobri kel-li, lé kel artigu ku téma: “O Que É Que O Reino di Deus Realizará?”
a Kes informason li é di Centro Nacional de Dados Geofísicos di Mérka.