Kuzê ki Bíblia ta fla sobri falta di agu na mundu?
Nos tudu nu meste di agu linpu pa nu pode vive. Má António Guterres, ki é sekretáriu jeral di Nasons Unidu, fla: “Pesoas sta ta gasta agu txeu dimás, pur isu nu sta ku falta di agu na mundu.” Ka sta fásil más pa bilhons di pesoas na mundu interu atxa agu linpu ki ta da pa bebe.
Strdel/AFP via Getty Images
Algun dia nu ta ben ten agu ki ta txiga pa tudu algen? Ô sénpri nu ta ben lida ku falta di agu? Kuzê ki Bíblia ta fla?
Kuzê ki Bíblia ta fla ma ta ben kontise ku agu na futuru
Bíblia ta fla ma na futuru ka ta ben ten falta di agu más. Na verdadi, ta ben ten agu linpu ki ta da pa bebe avontádi.
‘Ta ba ten txeu agu ta baza na dizértu, i agu ta kóre na kes lugar planu i na dizértu. Txon séku ta ben bira un lagoa xeiu di junku, i téra séku ta ben bira fontis di agu.’ — Isaías 35:6, 7.
Pamodi ki nu pode kridita na kel promésa di Bíblia li? Odja kuzê ki Bíblia ta fla sobri modi ki nos planéta téra fazedu.
Kuzê ki Bíblia ta fla sobri téra i siklu di agu?
‘Deus ka kria téra pa nada, má el faze-l pa moradu na el’. — Isaías 45:18.
Deus faze téra pa ten vida na el, pur isu el kria siklus di naturéza pa nu pode ten agu dósi avontádi.
‘Deus ta puxa pa riba kes góta di agu; kel vapor ta bira agu pa forma txuba, nton, kes núven ta baza-l, es ta dispija-l riba di tudu algen.’ — Jó 36:27, 28.
Kel testu li ta mostra ma Deus kria un siklu di agu di naturéza ki ka ta fadja, ki ta linpa i ki ta guarda agu. Kes agu di téra i mar ta bira vapor, kel vapor ta bira agu pa forma txuba, kes núven ta baza-l i ta ten agu linpu i dósi pa algen ku animal. — Eclesiastes 1:7; Amós 5:8.
‘N ta ben da nhos txuba na óra sértu, téra ta ben da kumida i arvis na kanpu ta ben da ses fruta.’ — Levítico 26:4.
Israelitas éra un povu ki ta viveba di agrikultura. I Deus promete ma sénpri el ta abensuaba es ku txeu txuba, asi pa es pode tinha un bon kodjéta. El sabe ma pa téra da kumida nu meste txuba na óra sértu.
Ka ta dura Deus ta ben faze na téra interu kel mésmu kuza ki el faze na Israel. (Isaías 30:23) Má na txeu párti di mundu, falta di agu sta ta bira kada bês más txeu, i falta di txuba é un di kes motivu. Kuzê más ki Bíblia ta fla sobri soluson pa falta di agu ki ten oji?
Modi ki falta di agu ta ben kaba
Bíblia ta mostra ma Deus, ta ben uza se Reinu pa ben rezolve tudu prublémas ki ta prujudika téra, i kel-li ta inklui falta di agu ki ten oji. (Mateus 6:9, 10) Reinu di Deus é un govérnu ki sta na séu ki ta ben governa téra interu. (Daniel 2:44; Apokalipse 11:15) Alén di kel-li, Reinu di Deus ta ben faze kel ki govérnus di ómi ka ta konsigi faze, ki é kaba ku kes kuza ki ta poi ta ten falta di agu.
Prubléma: Mudansa di klima sta poi ta ten txeu prubléma na siklu di agu. Pamodi kel-li, sta ta ten txeu séka i txeia pamodi txuba fórti dimás ô pamodi agu di mar sta ta subi.
Soluson: Reinu di Deus ta ben konpo tudu stragu ki dja fazedu na meiu anbienti, asi pa nos planéta pode rekupera. Deus promete: “Odja! N sta faze tudu kuza novu.” (Apokalipse 21:5) Kes lugar séku ta ben ten txeu agu dósi i ta ben ten vida ti mésmu na kes lugar ki ka ta da pa ten vida oji. (Isaías 41:17-20) Reinu di Deus, ki se Rei é Jizus Kristu, tanbê ta ben kontrola tudu forsa di naturéza.
Kantu Jizus staba na téra, el para un tenporal i di kel manera li el da-nu un izénplu di puder ki Deus da-l. (Markus 4:39, 41) Dja ki Jizus é Rei di Reinu di Deus el ta ben kaba ku dizastris na naturéza. Pesoas ta ben ten pas di verdadi i suguransa, i es ka ta ben xinti medu más di ninhun dizastri na naturéza.
Prubléma: Pesoas ki ka ta pensa na rezultadu di kes kuza ki es ta faze i inprézas ki ten txeu ganánsia, sta polui rius, lagus i kes lugar ki ta guarda agu baxu txon. I pamodi kel-li, falta di agu linpu sta ta omenta.
Soluson: Deus ta ben linpa téra i el ta ben konpo kes stragu ki dja fazedu na kes riu, lagu, mar i txon. Téra ta ben bira un paraízu. Bíblia ta fla: ‘Dizértu i téra séku ta ben fika kontenti, kes lugar planu na dizértu ta ben grita ku txeu alegria i es ta ben da flor sima asafron.’ — Isaías 35:1.
Kuzê ki ta ben kontise ku kes algen ki ka ta inporta ku meiu anbienti ô ku otus algen? Deus promete ma el ta ben “distrui kes ki sta ta distrui téra.” — Apokalipse 11:18, nóta di rodapé; Provérbios 2:21, 22.
Prubléma: Pesoas ka sta uza agu dretu, i pamodi kel-li es sta ta gasta más agu di ki kel ki téra ta pode da.
Soluson: Reinu di Deus ta ben poi ‘vontadi di Deus ta fazedu na téra’, envês di vontadi di ómis ki ta pensa sô na ses kabésa. (Mateus 6:9, 10) Reinu di Deus ta ben da pesoas kel midjór edukason ki ten. Isaías 11:9 ta fla: ‘Téra ta intxi di konhisimentu di Jeová’.a Ku kel konhisimentu li, ki é kel midjór ki ten, i ku un amor fórti pa Deus i pa tudu se kriason, pesoas na téra ta ben kuida dretu di nos planéta bunitu i di kes kuza na naturéza.
Pa sabe más sobri kuzê ki Reinu di Deus ta ben faze, odja artigu “Kuzê ki reinu di Deus ta ben faze?”.
Lé livru di Isaías kapítlu 35, pa bu odja modi ki téra ta ben bira un paraízu.
Odja vídiu Pamodi ki Deus kria Téra? pa bu sabe más sobri vontadi di Deus pa téra i pa pesoas.
a Jeová é nómi di Deus. (Salmo 83:18) Djobe artigu “Ken ki é Jeová?”.