Kuzê ki Bíblia ta fla sobri suguransa di mudjer

“Kantu mi éra mininu, nha irmon ta sotaba mi i ta insultaba mi tudu dia. Dipôs ki N kaza, nha sógra tanbê ta abuzaba di mi. El ku nha sogru ta trataba mi sima un skravu. N ta pensaba na mata kabésa.” — Madu,a India.

Organizason Mundial di Saúdi fla ma “violénsia kóntra mudjer ta kontise txeu na mundu interu” i ma un na kada três mudjer dja sufri pamodi violénsia ô abuzu seksual na algun momentu di ses vida.

Si kel-la dja kontise ku bo, bu pode xinti ma na kalker lugar ki bu bai algen pode insulta-u, sota-u ô faze-u abuzu seksual. Pamodi mudjer ta sufri tudu kes tipu di abuzu li, bu pode xinti ma maioria di algen ta atxa ma ‘mudjer ka ten valor’. Má mudjer ten valor pa Deus?

Kuzê ki Deus ta atxa di mudjer?

Testu di Bíblia: ‘[Deus] kria-s ómi ku mudjer.’ — Génesis 1:27.

Kuzê ki kel-li krê fla: Deus kria ómi i mudjer. El ta atxa ma tantu ómi ku mudjer merese ruspetu. Tanbê, el ta spera ma maridu ta “ama se mudjer sima el ta ama se kabésa”, ma el ka ta tenta kontrola-l, ma el ka ta fla kuzas ki ta magua-l i nen el ka ta ser violéntu ku el. (Efézius 5:33; Kolosensis 3:19) Di serteza, suguransa di mudjer é inportanti pa Deus.

“Kantu ami éra mininu, alguns algen di nha família faze-m abuzu seksual. Kantu N tinha 17 anu, nha patron fla-m ma el ta traba mi di trabadju si N ka fazeba séksu ku el. Dipôs ki N bira grandi, nha maridu, nha pai ku nha mai i nhas vizinhu ta trataba mi sen ruspetu. Má dipôs N prende sobri nos Kriador, Jeováb. El ta ruspeta mudjer. Kel-li da-m serteza ma el ta ama-m i ma N ten valor pa el.” — Maria, Arjentina.

Kuzê ki pode djuda-u xinti midjór?

Testu di Bíblia: ‘Ten un amigu ki ta pega na bo más di ki un irmon.’ — Provérbios 18:24.

Kuzê ki kel-li krê fla: Un amigu di verdadi ta djuda-u. Si bu ta konsigi, pâpia ku un algen di kunfiansa sobri modi ki bu sta xinti.

“Duránti 20 anu N ka konta ningen ma N fazedu abuzu seksual. Pamodi kel-li N ta xintiba tristi, preokupadu dimás i deprimidu. Má kantu N konsigi pâpia sobri kuzê ki N pasa pa el, ku un algen ki staba dispostu na obiba mi, N xinti txeu aliviadu.” — Elif, Turkia.

Testu di Bíblia: ‘Nhos bota tudu nhos preokupason riba di [Deus], pamodi el ta kuida di nhos.’ — 1 Pedru 5:7.

Kuzê ki kel-li krê fla: Óras ki bu ta faze orason, Deus ta obi-u. (Salmo 55:22; 65:2) Pamodi el ta preokupa ku bo, el pode djuda-u intende ma bu ten txeu valor.

“Prende sobri Jeová kumesa ta djuda-m tra kel dór ki N ta xintiba na fundu di nha korason. Gósi N pode faze orason pa Deus i fla-l tudu kel ki N ta xinti. El é sima un amigu ki ta intende nhas sentimentu.” — Ana, Belize.

Algun dia Deus ta ben kaba ku abuzu kóntra mudjer?

Testu di Bíblia: ‘Jeová... ta ben faze justisa pa kes ki é órfon i pa kes algen oprimidu, asi pa ninhun ómi li na téra ka torna pô-s ta xinti medu.’ — Salmo 10:17, 18.

Kuzê ki kel-li krê fla: Ka ta dura Deus ta ben kaba ku tudu injustisa, ki ta inklui kes kuza kruel i violéntu kóntra mudjer.

“Prende ma ka ta dura Jeová ta ben kaba ku tudu maldadi kóntra mudjer i minina, foi sima un ramedi pa mi. Kel-li djuda-m xinti pas déntu mi.” — Roberta, Méxiku.

Pa bu prende más sobri modi ki Bíblia ta da-nu speransa, pamodi ki nu pode kunfia na se promésas i modi ki Tistimunhas di Jeová ta uza Bíblia pa djuda algen, pidi un vizita.

Diskarega un verson di artigu ki fazedu pa inprimi.