Pamodi ki pesoas ka ta pode traze pas? — Kuzê ki Bíblia ta fla?

Kes líder i kes organizason na mundu ka ta konsigi traze pas. Désdi Sugundu Géra na Mundu Interu ti gósi, sta ta kontise más géra di ki antis. Uns 2 bilhon di algen, ki é un kuartu di algen ki ten na mundu, ta vive na kes lugar ki ten géra.

Pamodi ki pesoas ka ta pode traze pas? Kuzê ki Bíblia ta fla?

Três motivu ki ka ta dexa pesoas poi pas na mundu

1. 1. Pesoas sta ta konporta di un manera ki ta inpidi-s ti mésmu di tenta traze pas. Bíblia dja flaba ma na nos ténpu, “ómis ta ben ama sô ses kabésa, ta ama dinheru, ta ser konvensidu, aroganti, . . . disleal, . . . ka ta krê konkorda ku otus, . . . diskontroladu, runhu, . . . temozus, xeiu di orgulhu”. — 2 Timótiu 3:2-4.

2. 2. Un algen ô un grupu di algen, ka ten kapasidadi di rezolve ses prubléma sen ajuda di Jeováa Deus, ki é ses Kriador. Bíblia ta fla ma ómi ‘é ka kapás di gia se kabésa.’ — Jeremias 10:23.

3. 3. Mundu sta influensiadu pa Satanás ki é Diabu, ki é un governanti mau i ki ten txeu puder. El “sta ta ingana téra interu.” (Apokalipse 12:9) Timenti “mundu interu sta na puder di Malvadu”, ta kontinua ta ten géra i prubléma. — 1 Juan 5:19.

Ken ki ta pode traze pas?

Bíblia ta da-nu serteza ma Deus ta ben traze pas. É ka kuzê ki pesoas ta faze ki ta ben traze pas.

• ‘“Jeová fla: ‘N sabe dretu kuzê ki N sta pensa pa nhos. N krê pa nhos ten pas envês di disgrasa. N krê da nhos un futuru i un speransa.’”’ — Jeremias 29:11.

Modi ki Deus ta ben kunpri kel promésa li? “Kel Deus ki ta da pas ta ben pila Satanás”. (Romanus 16:20) Deus ta ben uza un govérnu na séu, ki Bíblia ta txoma di “Reinu di Deus,” pa traze pas na mundu interu. (Lukas 4:43) Óras ki Jizus Kristu, ki é Rei di es Reinu ben governa téra, pesoas ta ben prende vive na pas. — Isaías 9:6, 7.

• Pa bu sabe más, lé artigu “Kuzê ki Reinu di Deus ta ben faze?”