Anton Petrus/Moment via Getty Images
NU MANTE SIENTI!
Sta kuazi ta kontise un géra mundial? — Kuzê ki Bíblia ta fla?
Duránti kes últimu 30 anu, txeu algen atxa ma relason entri kes país di mundu staba bon i ti staba ta midjora. Má kes kuza ki sta kontise ta mostra ma kel-li talvês é ka verdadi.
“Désdi ki Israel i Hezbollah kumesa ta géra ku kunpanheru na frontera di Líbanu, pesoas fika preokupadu ma kel géra di Gaza pode afeta kes país la pértu.” — Reuters, 6 di janeru di 2024.
“Grupus ki Iran ta kontrola sta ta ataka na lugaris diferenti i Iran dja kumesa ta faze kes arma nukliar otu bês. Alén di kel-li, Rúsia i Xina gósi sta apoia-l. Tudu kel-li é más un amiasa pa kes otu país.” — The New York Times, 7 di janeru di 2024.
“Kes ataki di Rúsia sta kontinua ta faze txeu stragu na Ukránia.” — UN News, 11 di janeru di 2024.
“Xina sta ta bira kada bês más fórti pamodi se ikonomia, trópas i armas. Tanbê orgulhu ki povu di Taiuan ten pa ses nason sta ta omenta i Mérka ku Xina sta ta ten prublémas entri es. Pamodi tudu kes kuza li un géra pode kontise na kalker momentu.” — The Japan Times, 9 di janeru di 2024.
Bíblia ta pâpia di kes kuza ki nu sta odja ta kontise na mundu? Ta ben ten un géra na mundu interu?
Bíblia dja flaba sobri kuzas ki sta kontise oji
Bíblia ka ta fla nómi di kes país ki sta na géra oji. Má el ta fla ma géras diskontroladu ta ben markaba nos ténpu i ta traba “pas di téra.” — Apokalipse 6:4.
Livru di Daniel dja flaba ma “na ténpu di fin,” govérnus ‘ta pintxaba kunpanheru’, ô ta lutaba pa manda na mundu. Kel luta li ta involveba izibi puder di ses trópa i gasta txeu “tizoru” ô dinheru. — Daniel 11:40, 42, 43.
Un géra sta kuazi ta kontise
Bíblia ta mostra ma situason di mundu ta piora antis di midjora. Jizus dja flaba: “ta ben ten un grandi tribulason ki sima kel-la nunka ka kontiseba désdi komésu di mundu ti gósi.” (Mateus 24:21) Es “grandi tribulason” ta ben tirmina ku un géra ki ta txomadu di Armajedon, ki é “kel géra di kel grandi dia di Deus, kel Tudu-Poderozu.” — Apokalipse 16:14, 16.
Má, Armajedon ta ben salva mundu, el ka ta ben distrui-l. Através di kel géra li, Deus ta ben kaba ku govérnus di ómi ki sta poi txeu géra ta kontise. Pa bu sabe modi ki Armajedon ta ben traze pas ki ta dura pa tudu ténpu, lé kes artigu li: