Ta izisti un bon govérnu ki pode governa téra? — Kuzê ki Bíblia ta fla?

Govérnus na mundu interu sta xeiu di prubléma. Ti mésmu na kes país ki ta parse ma ka ten prubléma, ta obidu notísia di kuzas mariadu ki pesoas na govérnu ta faze, rezultadu di ileison entri kes partidu ta fika kuazi igual, pesoas ta sta divididu na pulítika i es ta faze revólta.

Bíblia ta mostra ma ten un bon govérnu ki ta pô-nu ta xinti suguru. Talvês dja bu obi sobri kel govérnu li. É kel govérnu ki Jizus pâpia di el na kel orason ki el inxina se disiplus pa faze.

“Nhos debe ora si: ‘Nos Pai ki sta na séu, pa bu nómi ser santifikadu. Pa bu Reinu ben. Pa bu vontadi fazedu na téra, sima na séu.’” — Mateus 6:9, 10.

Kuzê ki Bíblia ta fla sobri kel Reinu li?

Reinu di Deus é un bon govérnu pa téra

Reinu di Deus ta governa téra la di séu.

Jizus txoma kel govérnu li di “Reinu di séu”. (Mateus 4:17; 5:3, 10, 19, 20) Pamodi kel-li, el fla: “Nha Reinu ka ta faze párti di es mundu.” — Juan 18:36.

Reinu di Deus ta ben fika na lugar di tudu kes govérnu di ómis.

Bíblia ta fla: ‘Kel reinu li... ta ben disfaze i el ta ben kaba ku tudu kes reinu [di ómis], i sô el ta ben fika pa tudu ténpu’. — Daniel 2:44.

Reinu di Deus nunka ka ta kaba. Jizus é Rei di kel Reinu li.

Bíblia ta fla: ‘Se govérnu é un govérnu pa tudu ténpu, ki ka ta kaba nunka más, i se reinu ka ta distruídu.’ — Daniel 7:13, 14.

Reinu di Deus ta ben traze pas i suguransa na téra interu.

Bíblia ta fla: ‘Kada un di es ta ben xinta baxu di se pé di uva i baxu di se pé di figu, i ka ta ten ningen pa pô-s ta xinti medu’. — Miqueias 4:4.

Prende más sobri kel Reinu li

Kantu Jizus staba na téra, el uza se ténpu pa “prega kes notísia sábi di Reinu”. (Mateus 9:35) Tanbê el fla:

“Kes notísia sábi di Reinu ta ben pregadu na mundu interu pa sirbi di tistimunhu pa tudu nason, i dipôs fin ta ben.” — Mateus 24:14.

Oji, kes notísia sábi di Reinu di Deus sta ta pregadu na más di 240 país. Nu ta konvida-u pa bu prende más sobri kel govérnu li i modi ki el pode djuda-u.

Favor, odja vídiu Kuzê ki é Reinu di Deus?.