Kuzê ki N pode faze si nha pai ku nha mai sta ta divôrsia?

Un di kes situason más difísil ki un jóven pode pasa pa el é si se pai ku se mai divôrsia. Modi ki bu pode lida ku es dór?

Na kel artigu li nu ta ben odja:

• Três kuza ki bu ka debe faze

• Três kuza ki bu pode faze

• Kuzê ki otus jóven ta fla

Três kuza ki bu ka debe faze

1. Xinti kulpadu

“Un bês nha mai fla-m ma tudu prubléma di el ku nha pai kumesa kantu N nase, pur isu N pensa ma é pamodi mi ki kazamentu di nha pai ku nha mai ka da sértu.” — Diana.

Lenbra di kel-li: Bu pai ku bu mai ka sta ta divôrsia pamodi bo. Bu pai ku bu mai sta ta divôrsia pamodi es ten prubléma ku kunpanheru. É ka bo ki kria-s prubléma i bu ka ta pode rezolve ses prubléma. É es ki ten responsabilidadi di rezolve prublémas di ses kazamentu.

2. Guarda rankor

“N fika txeu xatiadu ku nha pai pamodi el trai nha mai. Foi difísil pa mi kunfia na el otu bês.” — Rianna.

Lenbra di kel-li: Talvês bu sta xatiadu i ku raiba pamodi kuzê ki kontise entri bu pai ku bu mai i bu ten un bon razon pa kel-li. Má, guarda rankor é ka bon pa bo. El pode prujudika bu korpu i bus sentimentu. É pamodi kel-li ki ta fladu ma guarda rankor é sima toma venénu i spera ma otu algen ta fika duenti.a

3. Duvida ma bu pode ten un kazamentu filís

“N ten txeu medu di faze kuzê ki nha pai faze. N ten medu ma si N kaza i N ten fidju, N ta faze kes mésmu kuza ki poi nha pai ku nha mai ta divôrsia.” — Jessica.

Lenbra di kel li: Sô pamodi kazamentu di bu pai ku bu mai ka da sértu kel-li ka krê fla ma bu kazamentu ka ta da sértu. Na verdadi, bu pode prende alguns lison di spiriénsia di bu pai ku bu mai. Pur izénplu, bu pode fika más atentu sobri kes kualidadi ki bu krê na kel algen ki bu ta pensa na kaza ku el. Pamodi kazamentu di bu pai ku bu mai fadja kel-li pode pô-u ta dizenvolve kualidadis ki ta pô-u ta ser un maridu ô mudjer midjór.

Três kuza ki bu pode faze

1. Pâpia. Pesoas ki ka ta pâpia di ses sentimentu negativu txeu bês pode involve na kuzas ki pode prujudika-s sima bebe dimás ô uza dróga. Envês di bai pa kel kaminhu li, tenta faze kes kuza li:

Pâpia ku bu pai i ku bu mai. Si un di es ô tudu es dôs sta ta tenta involve-u na ses prubléma, ku kalma má di manera firmi splika-s modi ki kel-li sta ta afeta-u. Si bu ta atxa difísil pâpia ku es pesoalmenti, bu pode skrebe un karta pa un di es ô pa tudu es dôs.

Pâpia ku un amigu di kunfiansa. Sô di ten un amigu ki pode obi-u dja ta djuda-u txeu. Bíblia ta fla ma ‘un amigu di verdadi ta ama tudu óra i el é un irmon ki nase pa ténpu di frónta.’ — Provérbios 17:17.

Pâpia ku bu Kriador. Jeová Deus ki é ‘Kel ki ta obi orason’ sénpri ta obi-u. (Salmo 65:2) Bíblia ta mostra ma bu pode “bota tudu [bus] preokupason riba di el, pamodi el ta kuida di [bo].”—1 Pedru 5:7.

• Kal di es, bu pai ô bu mai, ki bu ta pode pâpia ku el di manera kalmu?

• Ki amigu di kunfiansa (un kolega ô un adultu) ki pode faze párti di kes algen ki ta djuda-u?

• Sobri ki asuntu bu pode ora?

2. Adapita ku kes novu mudansa

Divórsiu di bu pai ku bu mai pode iziji pa bu adapita ku un novu kaza, skóla, dinheru ki família ta pasa ta ten ô ti mésmu novus amigu. Ta da pa intende ma kel situason li pode dexa-u stresadu, diziludidu i bu pode xinti ma tudu bu vida fika di kabésa pa baxu. Kuzê ki pode bira kel mudansa más fásil pa bo? Tenta konsentra na modi ki bu pode adapita ku kel novu situason.

• Kal ki é mudansa más grandi ki bu tevi ki faze pamodi bu pai ku bu mai divôrsia?

• Kuzê ki bu pode faze pa adapita ku kel mudansa?

3. Odja kes bon kualidadi ki bu ten

Enbóra divórsiu di bu pai ku bu mai pode pô-u ta xinti txeu ansiadadi, kel-li pode djuda-u odja kes bon kualidadi ki bu ten. Tanbê el pode djuda-u dizenvolve novus kualidadi. Jeremias ki se pai ku se mai divôrsia kantu el tinha 13 anu fla: “Divórsiu di nha pai ku nha mai pô-m ta bira más responsável. Ami éra kel irmon más grandi, pur isu N tevi ki djuda nha mai más txeu i tanbê N tevi ki apoia nha irmon más pikinoti.”

• Ki kualidadis bu pasa ta konxe na bo pamodi situason di bu pai ku bu mai?

• Ki kualidadis bu ta gostaba di dizenvolve?