Di kuzê ki livru di Apokalipse ta pâpia di el?
Respósta di Bíblia
Apokalipse, ki é nómi di un livru di Bíblia, ta ben di un palavra gregu ki siginifika “mostra” ô “revela”. Kel nómi li ta mostra kal ki é siginifikadu di Apokalipse. El ta splika asuntus ki staba sukundidu i el ta mostra kuzas ki ta ben kontiseba txeu ténpu dipôs ki es skrebedu. Ten txeu profesia di livru di Apokalipse ki inda sta ben kunpri.
Asuntus di livru di Apokalipse
Intruduson. — Apokalipse 1:1-9.
Mensajen di Jizus pa kes 7 kongregason. — Apokalipse 1:10–3:22.
Un vizon di Deus na se tronu na séu. — Apokalipse 4:1-11.
Alguns vizon ki sta ligadu ku kunpanheru:
7 sélu. — Apokalipse 5:1–8:6.
7 tronbéta, kes três últimu ta da avizu di três “ai” ki sta binha. — Apokalipse 8:7–14:20.
7 tijéla, kada un di es tene un praga ki ta reprizenta julgamentu ki Deus ta ben faze na téra. — Apokalipse 15:1–16:21.
Vizon sobri distruison di kes inimigu di Deus. — Apokalipse 17:1–20:10.
Vizons di kes benson di Deus pa séu i pa téra. — Apokalipse 20:11–22:5.
Konkluzon. — Apokalipse 22:6-21.
Modi ki nu pode intende livru di Apokalipse
Pa kes algen ki ta sirbi Deus, kel asuntu di livru di Apokalipse é puzitivu i el ka ta dexa-s ku medu. Enbóra txeu algen ta liga kel palavra “Apokalipse” ku un grandi dizastri, livru di Apokalipse ta kumesa i ta tirmina ta fla ma kes algen ki ta le-l, ta intende-l i ta aplika se mensajen ta ser filís. — Apokalipse 1:3; 22:7.
Apokalipse ta uza txeu “sinal” ô sinblu ki nu ka debe intende di manera literal. — Apokalipse 1:1.
Txeu di kes personájen inportanti i sinblu ki ten na livru di Apokalipse ten na otus párti di Bíblia:
Jeová: ‘kel Deus verdaderu la di riba na séu’ i Kriador di tudu kuza. — Deuteronómio 4:39; Salmo 103:19; Apokalipse 4:11; 15:3.
Jizus Kristu: “Korderu di Deus”. — Juan 1:29; Apokalipse 5:6; 14:1.
Satanás, ki é Diabu: kel inimigu di Deus. — Jénezis 3:14, 15; Juan 8:44; Apokalipse 12:9.
Babilónia Grandi: sima kel Babilónia antigu (Babel), el é inimigu di Jeová Deus i di se povu i el ta inxina mintira sobri Deus. — Jénezis 11:2-9; Isaías 13:1, 11; Apokalipse 17:4-6; 18:4, 20.
“Mar”: kes algen mau ki é kóntra Deus. — Isaías 57:20; Apokalipse 13:1; 21:1.
Kes obijétu i kes kuza ki es ta fazeba na tabernáklu na ténpu antigu pa adora Deus: ta inklui arka di kontratu, mar di vidru (basia pa laba), lánpida, oférta di insénsu i un altar di sakrifisiu. — Ézudu 25:10, 17, 18; 40:24-32; Apokalipse 4:5, 6; 5:8; 8:3; 11:19.
Kes féra: ta reprizenta govérnus di ómi. — Daniel 7:1-8, 17-26; Apokalipse 13:2, 11; 17:3.
Kes nunbru ta uzadu pa reprizenta otu kuza. — Apokalipse 1:20; 8:13; 13:18; 21:16.
Kes vizon ta kontise duránti “dia di Sinhor”, ki kumesa na 1914 kantu Jizus bira Rei di Reinu di Deus. (Apokalipse 1:10) Pur isu, nu pode spera ma kel párti prinsipal di kes profesia di Apokalipse ta kontise na nos ténpu.
Pa nu intende livru di Apokalipse, nu meste kes mésmu kuza ki ta djuda-nu intende Bíblia interu: sabedoria ki ta ben di Deus i ajuda di kes algen ki ta intende-l. — Atus 8:26-39; Tiagu 1:5.