Pamodi ki Tistimunhas di Jeová ka ta faze fésta di anu?

Tistimunhas di Jeová ka ta faze fésta di anu pamodi es ta kridita ma kel fésta li ka ta agrada Deus. É verdadi ki na Bíblia nu ka ta atxa ninhun órdi ta fla ma nu ka debe faze fésta di anu. Má el ta djuda-nu ntende kuzê ki Deus ta pensa sobri fésta di anu. Nu ben odja kuatu kuza sobri fésta di anu i kuzê ki Bíblia ta fla sobri es.

1. Fésta di anu ben di adorason falsu. Un livrua ki ta pâpia sobri kel asuntu li fla ma fésta di anu kumesa ta fazedu pamodi pesoas ta kriditaba ma kes spritu mau pode atakaba es na dia ki es ta faze anu i ma sta djuntu ku ses amigus i kes “filisidadi” ki es ta dizejadu pode protejeba es. Un otu livrub ta fla ma na pasadu, kel lista di dia ki algen nase éra rei di inportanti pa fazeba síginu ki sta ligadu ku astrolojia. El ta fla tanbê ma pesoas ta kriditaba ma kes véla di fésta di anu ten puder di realiza dizejus.

   Má Bíblia é kóntra majia, dibinhason bruxaria ô ‘kuzas sima kes-li.’ (Deuteronómio 18:14; Gálatas 5:19-21) Un di kes motivu ki poi Deus kondena antigu sidadi di Babilónia é pamodi kes algen di la ta pratikaba astrolojia ki é un tipu di dibinhason. (Isaías 47:11-15) Tistimunhas di Jeová ka ta fika ta djobe di undi ki kada tradison ben, má óras ki Bíblia ta da orientasons klaru, sima kel-li sobri bruxaria, nu ta faze sima el ta fla.

2. Kes primeru kriston ka ta fazeba fésta di anu. Un ensiklopédiac ta fla ma kes kriston ta atxaba, ma faze fésta di anu éra un kustumu di adorason falsu. Bíblia ta mostra ma kes apóstlu i otus algen ki Jizus inxina, dexa un modelu pa tudu kes ki ta sigi Jizus. — 2 Tessalonicenses 3:6.

3. Kel úniku komemorason ki Bíblia ta fla pa kristons lenbra é mórti di Jizus. (Lucas 22:17-20) Kel-li ka ta dexa-nu dimiradu pamodi Bíblia ta fla ma ‘dia di mórti é midjór di ki dia ki algen ta nase.’ (Eclesiastes 7:1) Na fin di se vida li na Téra, Jizus dja fazeba kuzas ki ta poba Deus ta fikaba kontenti ku el i pur isu dia di se mórti foi más inportanti ki dia ki el nase. — Hebreus 1:4.

4. Nu ka ta atxa na ninhun párti di Bíblia ki ta fla ma sérvus di Deus faze fésta di anu. É ka pamodi skesedu di papiadu di el, dja ki Bíblia ta pâpia di dôs algen ki ka éra sérvu di Deus i ki faze fésta di anu. Má na tudu kes dôs fésta kontise kuzas mariadu. — Génesis 40:20-22; Marcos 6:21-29.

I kes fidju di Tistimunhas di Jeová? Es ta atxa ma es sta ta perde algun kuza pamodi es ka ta faze fésta di anu?

Sima tudu pai ku mai ki krê ses fidju txeu, Tistimunhas di Jeová ta mostra ma es ta ama ses fidju, ka sô un bês pa anu má duránti anu interu. Es tanbê, es gosta di da ses fidjus prezentis i di faze féstas. Es ta sforsa pa sigi kel izénplu perfetu di Deus, ki gosta di da kuzas dretu pa ses fidju. (Mateus 7:11) Pur isu, fidjus di Tistimunhas di Jeová ka ta xinti ma es sta ta perde algun kuza. Odja kuzê ki alguns di es fla:

• “É más fixi ganha un prezenti óras ki bu ka sta ta spéra.” — Tammy, 12 anu.

• “N ka ta ganha prezentis na dia ki N ta faze anu, má nha pai ku nha mai ta da-m prezentis na otus dia. N gosta di kel-li pamodi N gosta di surpréza.” — Gregory, 11 anu.

• “Bu ta atxa ma 10 minutu, un bolu i un múzika é un fésta? Bu meste bai nha kaza i odja kuzê ki é un fésta!” — Eric, 6 anu.