Pamodi ki sakrifisiu di Jizus ta salva un monti di algen?
Respósta di Bíblia
Deus ta libra ô ta salva algen na Téra di pekadu i di mórti através di sakrifisiu di Jizus. Bíblia ta fla ma kel sangi ki Jizus baza é sima kel présu di un resgati. (Efésios 1:7; 1 Pedro 1:18, 19) É pur isu ki Jizus fla ma el ben pa Téra pa ‘da se vida pa resgata un monti di algen.’ — Mateus 20:28, Tradução do Novo Mundo.
Pamodi ki Jizus tevi ki ‘da se vida pa resgata un monti di algen’?
Kel primeru ómi, Adon, kriadu di manera perfetu ô sen pekadu. El tinha speransa di vive pa tudu ténpu, má el perde kel oportunidadi li pamodi el skodje ka obi ku Deus. (Génesis 3:17-19) Kantu el tevi fidjus, el pasa-s kel pekadu, ki é sima un defetu. (Romanos 5:12) É pur isu ki Bíblia ta fla ma Adon ‘bende’ el ku se fidjus pa ser skravu di pekadu i mórti. (Romanos 7:14) Dja ki tudu kes fidju di Adon éra inperfetu, es ka ta podia rekupera kel ki Adon perde. — Salmo 49:7, 8.
Deus xinti péna di kes disendenti di Adon ki fika sen speransa. (João 3:16) Má dja ki justisa di Deus é perfetu, el ka podia sô finji ma nada ka kontise ô púrdua pekadu di disendentis di Adon sen un bon motivu. (Salmo 89:14; Romanos 3:23-26) Deus ta ama-nu, pur isu el ranja un manera justu pa púrdua ô ti pa paga nos pekadu. (Romanos 5:6-8) Resgati é kel manera justu ki el ranja.
Modi ki resgati ta funsiona?
Na Bíblia, palavra ‘resgati’ ta inklui três kuza:
El é un pagamentu. — Números 3:46, 47.
El ta traze libertason, ô salvason. — Êxodo 21:30.
Valor izatu ô igual di kuzê ki algen krê resgata.a
Odja modi ki kes três kuza li ta aplika na resgati di Jizus Kristu.
Pagamentu. Bíblia ta fla ma kes ki ta sirbi Deus ‘kunpradu pa un présu.’ (1 Coríntios 6:20; 7:23) Kel présu li é sangi di Jizus Kristu ki ‘kunpra pesoas pa Deus, di tudu tribu, língua, povu i nason’. — Apocalipse 5:8, 9.
Libertason. Sakrifisiu di resgati di Jizus ta liberta-nu di pekadu. — 1 Coríntios 1:30; Colossenses 1:14; Hebreus 9:15.
Mésmu valor. Kel sakrifisiu di Jizus ten kel mésmu valor di vida perfetu ki Adon perde. (1 Coríntios 15:21, 22, 45, 46) Bíblia ta fla: ‘Sima txeu algen bira pekador pamodi sô un ómi [Adon] ki dizobidese, tanbê txeu algen ta ben bira justu pamodi sô un [Jizus Kristu] ki obidese.’ (Romanos 5:19) Kel testu li ta splika modi ki mórti di un ómi sô paga resgati pa un monti di pekador. Nton, sakrifisiu di Jizus é ‘un resgati di valor izatu’. Kel sakrifisiu li ta djuda tudu kes algen ki ta faze kuzê ki Deus ta fla. — 1 Timóteo 2:5, 6.
a Na kes língua ki Bíblia skrebedu, kes palavra ki traduzidu pa ‘resgati’ ta da ideia di un présu ô di un kuza ki ten valor i ki ta trokadu pa paga otu kuza. Pur izénplu, vérbu ebraiku ka·pharʹ krê fla “kubri”. (Génesis 6:14) Óras ki kel palavra li ta uzadu, normalmenti el krê fla kubri pekadu. (Salmo 65:3) Un palavra kuazi igual, ki é koʹpher, ta uzadu pa pâpia di présu ki ta pagadu pa kubri kes pekadu ô pa liberta algen. (Êxodo 21:30) Di mésmu manera, kel palavra gregu lyʹtron, ki txeu bês ta traduzidu pa ‘resgati’, alvês tanbê ta traduzidu pa ‘présu di libertason’. (Mateus 20:28; The New Testament in Modern Speech) Alguns skritor gregu uza kel palavra li pa pâpia di valor ki pagadu pa liberta un prézu di géra ô pa liberta un skravu.