Kuzê ki Bíblia ta fla sobri abortu?

Respósta di Bíblia

Bíblia ka ta uza palavra “abortu” pa pâpia di tra mininu di propózitu. Má txeu testu di Bíblia ta djuda-nu ntende kuzê ki Deus ta pensa sobri vida di un algen, i kel-li ta inklui vida di un mininu na bariga di se mai.

Vida é un prezenti di Deus. (Génesis 9:6; Salmo 36:9) Pa el tudu vida ten txeu valor, ti mésmu di un mininu ki inda ka nase. Pur isu, tra vida di un mininu di propózitu é sima mata un algen.

Kel lei ki Deus daba israelitas ta fla: ‘Si ómis sta ta briga ku kunpanheru i es fri un mudjer grávida, i kel mudjer ten fidju antis di ténpu, má ningen ka móre, kel ki é kulpadu ten ki paga présu ki maridu di kel mudjer pidi; el ten ki paga-l através di juízis. Má, si algen móre, ta dadu vida pa vida’. — Êxodo 21:22, 23.a

• Un mininu na bariga di se mai é un algen?

• Deus ta púrdua un algen ki algun bês tra mininu?

• I si vida di kel mai ô di kel mininu sta na prigu?

Un mininu na bariga di se mai é un algen?

Pa Deus, vida di un algen ta kumesa lógu ki se mai fika grávida. Txeu testu di Bíblia ta mostra ma pa Deus, un mininu na bariga di se mai é un vida i un novu algen. Odja alguns izénplu ki ta mostra ma pa Deus, vida di un mininu na bariga di se mai ten mésmu valor di ki di un mininu ki dja nase.

• Ku orientason di spritu santu, rei Davidi fla Deus: ‘Bus odju odja-m mésmu kantu N kumesa ta forma na bariga di nha mai’. (Salmo 139:16) Pa Deus, Davidi éra un algen mésmu antis di el nase.

• Antis di proféta Jeremias nase, Deus dja skodjeba el pa un diziginason spesial. Deus fla Jeremias: ‘Antis di N forma-u na bariga di bu mai, dja N konxeba bo; I antis di bu nase, N bira-u santu. N bira-u un proféta pa nasons.’ — Jeremias 1:5.

• Lúkas, ki éra un skritor di Bíblia i médiku, uza kel mésmu palavra na gregu pa pâpia di un mininu na bariga di se mai i un mininu ki dja naseba. — Lucas 1:41; 2:12, 16.

Deus ta púrdua un algen ki algun bês tra mininu?

Sin, el ta púrdua. Si kes algen pasa ta da vida kel mésmu valor ki Deus ta da, es ka meste xinti kulpadu dimás. Bíblia ta fla: ‘Jeová ten mizerikórdia i konpaxon. Sima undi sól ta sai sta lonji di undi ki sól ta kanba, é si ki el ta poi nos pekadus lonji di nos.’b (Salmo 103:8-12) Jeová ta púrdua tudu kes ki rapende di korason di pekadus ki es faze na pasadu, i kel-li ta inklui pekadu sima tra mininu. — Salmo 86:5.

I si vida di kel mai ô di kel mininu sta na prigu?

Di akordu ku kel ki Bíblia ta fla sobri vida di un mininu na bariga di se mai, ka ten diskulpa pa un algen tra mininu, mésmu ki talvês saúdi di kel mai ô di kel mininu sta na prigu.

I si kontise algun kuza na óra di ten fidju i meste disididu entri salva vida di kel mai ô vida di kel mininu? Na kel situason li, kes algen ki sta nvolvidu debe disidi kal vida ki es krê salva.