Romanos 5:8 — ‘Kantu Kristu móre pa nos timenti nos éra pekador.’

‘Deus mostra-nu se própi amor, kantu Kristu móre pa nos timenti nos éra pekador.’ — Romanos 5:8, Tradução do Novo Mundo.

Kuzê ki Romanos 5:8 ta siginifika

Jeováa Deus mostra ma el ta ama-nu txeu kantu el dexa se Fidju, Jizus Kristu, pa móre pa tudu pekador. (João 3:16) Dja ki nos é pekador, nu ten tendénsia di pensa i aji di un manera ki ta bai kóntra kes lei justu di Deus. (Colossenses 1:21, 22) Má, Deus ranja un manera di nu sta na pas ku el ‘através di mórti di se Fidju’. (Romanos 5:10) Pur isu, nu pode ten oportunidadi di ten un amizadi fórti ku Deus gósi i speransa di ben vive pa tudu ténpu na futuru. — Romanos 5:11; 1 João 4:9, 10.

Kuzê ki kes versíklu antis i dipôs di Romanos 5:8 ta fla

Apóstlu Polu skrebe kes palavra li pa kes kriston ki ta viveba na Roma. Na kel ki gósi é kapítlu 5 di se karta pa romanus, Polu splika pamodi ki kristons pode tinha sertéza i staba kontenti ku ses speransa. (Romanos 5:1, 2) Kel speransa ‘ka ta diziludi-nu’, pamodi el ten bazi na kel grandi amor ki Deus mostra-nu através di Jizus. (Romanos 5:5, 6) Jizus sénpri obi ku Deus, ki é kel kuza ki primeru ómi Adon ka faze. (Romanos 5:19) Dja ki Adon ka obi ku Deus, el pasa pekadu ku mórti pa se disendentis. (Romanos 5:12) Diferenti di Adon, Jizus sénpri foi obidienti i se mórti poi kes algen ki ta obi ku Deus ta ten speransa di vive pa tudu ténpu. — Romanos 5:21.