Apokalipse 21:4 — “El ta linpa tudu lágua di ses odju”

“El ta ben linpa tudu lágua di ses odju, i ka ta ben ten más mórti, nen tristéza, nen txoru nen dór. Kes kuza ki tinha antis ka ta ben ten más.” — Apokalipse 21:4, Traduson di Mundu Novu.

Kuzê ki Apokalipse 21:4 ta siginifika

Deus promete kaba ka sô ku dór i sufrimentu ki pesoas ta pasa pa el oji, má tanbê ku kes kuza ki ta poi kes prubléma li ta izisti.

“El ta ben linpa tudu lágua di ses odju”. Kes palavra li ta konfirma kel promésa di Jeováa ki proféta Izaías skrebe, ki ta fla ma ‘el ta ben linpa lágua di tudu róstu.’ (Isaías 25:8; Apokalipse 7:17) Kel-li ta mostra ma Deus ta preokupa ku tudu kes ki ta txora pamodi un algen ki es ta ama móre ô pamodi kalker otu sufrimentu.

“Ka ta ben ten más mórti”. Kes palavra li tanbê pode traduzidu pa “nunka más ka ta ben ten mórti” ô “mórti ka ta ben izisti nunka más.” Deus promete kaba ku mórti i ku sufrimentu ki ten pamodi mórti. Tanbê, el ta ben resusita mortus. (1 Koríntius 15:21, 22) Asi, mórti ta ben “kabadu ku el.” — 1 Koríntius 15:26.

“Nen tristéza, nen txoru nen dór”. Kel promésa di Deus li, ka krê fla ma pesoas ka ta ben xinti ninhun dór, sima pur izénplu, kel dór ki nu ta xinti na korpu ki ta da-nu sinal di algun prigu. Má envês di kel-li, kel promésa ta mostra ma tudu tipu di dór ki nu pode xinti pamodi pekadub i inperfeison ka ta ben izisti más. — Romanus 8:21, 22.

“Kes kuza ki tinha antis ka ta ben ten más.” Kel últimu frazi li ta mostra kel grandi mudansa ki tudu algen ta ben pasa pa el. Un livru fla: “Manera ki nu ta viveba antis na undi ki mórti, tristéza, txoru i dór ki éra kuzas ki ka ta daba pa skapaba di es, ta ben trokadu pa un novu manera di vive.” Asi, tudu algen ta pode ben vive pa tudu ténpu di manera perfeitu li na téra, sima Deus kreba désdi komésu. — Génesis 1:27, 28.

Kes versíklu antis di Apokalipse 21:4

Na komésu di kapítlu 21, apóstlu Juan pâpia di kuzê ki el odja na un vizon. El fla: “N odja un séu novu i un téra novu”. (Apokalipse 21:1) El pâpia di un grandi mudansa ki tanbê nu ta atxa na otus versíklu di Bíblia. (Isaías 65:17; 66:22; 2 Pedru 3:13) Govérnu di Deus na séu ô “séu novu”, ta ben fika na lugar di tudu govérnu di ómi i el ta ben governa “un téra novu”, kel-li krê fla, kes algen justu ki ta ben fika na téra. — Isaías 65:21-23.

Kuzê ki ta mostra ma kel vizon sta ta pâpia di vida li na téra? Primeru, promésa di Deus ta kumesa ku kes palavra li: “Ténda di Deus sta ku tudu algen.” (Apokalipse 21:3) Pur isu, é ka anjus na séu ki dadu kel promésa li, má pesoas li na téra. Sugundu, kel vizon ta pâpia di un lugar “ki ka ta ben ten más mórti”. (Apokalipse 21:4) Mórti nunka izisti na séu, sô na téra. (Romanus 5:14) Nton, kel versíklu li sta ta pâpia di modi ki vida li na téra ta ben ser na futuru.

Odja kel vídiu li pa bu sabe más sobri livru di Apokalipse.