N sta kontenti di skodje kel midjór karera ki ten

N kria na interior di Austrália. Nha pai ku nha mai i nhas avó prende verdadi na anus di 1950, antis di N nase. N kumesa ta prega kantu N tinha 6 anu i N batiza ku 13 anu. Txeu bês N ta sirbiba di pioneru ajudanti duránti férias di skóla. N ta amaba Jeová i N krê sirbiba el pa tudu ténpu.

Kantu N tinha 15 anu, nha trenador na skóla repara ma mi éra bon na djuga. Pamodi kel-li dôs reprizentanti di un ekipa profisional oferese-m un bólsa di studu pa N biraba profisional na djuga. N gostaba di kel ideia di biraba un djugador famozu. Má dja N daba nha vida pa Jeová. Nha pai fla-m pa N pensaba na kel promésa ki N fazeba Jeová antis di N disidi si N ta sigiba un karera na disportu. N faze sima nha pai fla-m, i N da kónta ma N ka ta pode sirbiba Jeová dretu i omésmu ténpu ser un djugador famozu. Pur isu, N nega kel bólsa di studu. Uns mês dipôs, Institutu di Disportu di Austrália, na Camberra oferese-m otu bólsa di studu pa N ba trenaba na korida di maratóna, i asi N ta tinha oportunidadi di ba reprizentaba Austrália na Jogus di Commonwealth ô na Jogus Olínpikus. Más un bês N krê kunpriba nha promésa ki N faze pa nha Deus ki N ta ama. Pur isu, N fla nau.

Poku ténpu dipôs, N tirmina skóla i N kumesa sirvisu di pioneru. Kel-li éra un méta ki dja N tinha txeu ténpu ta pensa na el. Má nha família staba ku falta di dinheru. Pur isu, N para sirvisu di pioneru i N kumesa ta trabadja pa ténpu interu ta konduzi un mákina di agrikultura. N tinha uns 18 anu i N ta moraba mi sô. N staba ta sirbi Jeová, má N ka staba konsentradu na el. N staba dizanimadu i nha amizadi ku Jeová ka staba fórti más. N skodje amigus ki ta bebeba dimás, ki ta lebaba un vida mariadu i N xinti tentadu na faze mésmu kuza. N ka staba ta kuida di nha amizadi ku Jeová i N staba ta faze kuzas ki ta poba mi ta xinti sábi sô na kel óra.

N meste fazeba mudansas na vida. Pur isu, N bai pa otus sidadi pa N fikaba lonji di kes maus koléga. N bira más amigu di Jeová i N faze planu pa bira pioneru otu bês. Dipôs N konxe Leann McSharry, ki éra un irman ki tinha txeu vergónha i ki ta moraba na interior. Dja el éra pionera i nu bira amigu. Nu pâpia klaru sobri nos méta i kel-li ta inkluiba ser misionáriu. Nu kaza na anu di 1993. Nos dôs nu kreba pa Jeová giaba nos vida.

Nu sforsa pa alkansa nos méta

Na kel anu, N bira pioneru fíksu sima Leann. Nu staba disididu na kontinua ku vida sinplis i ka faze dívida. Pur isu, nu kunpra un kaza bédju, ki ta mudaba di un lugar pa kel otu (trailer) i nu ta viveba na el. Duránti 6 anu, nu bai pa undi ki organizason di Jeová mandaba nos i nu faze txeu trabadju diferenti pa nu sustenta. Nu prega djuntu ku kongregasons pikinoti na lugaris grandi, planu i séku na interior di Queensland. Txeu bês nu ta fikaba na lugaris izoladu i nu ta sistiba runion na meiu di matu ô na un Salon na kel lugar. Nu staba filís. Má inda nu ta perguntaba: ‘Nu pode faze más pa Jeová?’ Lógu nu tevi respósta.

Organizason di Jeová konvida-nu pa nu ser misionáriu na otu país! Má nu fika nervozu i nu sta xintiba ma nu ka staba kualifikadu. Nu staba ku dúvida si nu ta pode ser bons misionáriu sen resebe trenu di Skóla di Jiliádi. Nu gostaba di pregason. Má pamodi nu ka tinha txeu studu di Bíblia na nos diziginason, na kel lugar lonji, nu ta atxaba ma nu ka éra bon na inxina.

Nu pâpia sobri kuzê ki staba ta preokupa-nu ku Max Lloyd, ki éra un irmon di Kumison di Filial.a El da-nu serteza ma si nu staba dispostu na faze más pa Jeová, sikrê ta xinti ma nu ka staba kualifikadu, Jeová pode daba nos kapasidadi di faze kalker kuza ki el pidi-nu. El da-nu inkorajamentu sima un pai i kel-li djuda-nu seta nos diziginason na Sri Lanka.

Un diziginason ku txeu dizafiu

Na anu di 1999, nu txiga na Colombo, ki é kapital di Sri Lanka. Kel-li éra txeu diferenti di kel pas ki nu tinha na interior di Austrália! Nu lida ku géra sivil, pobréza, algen dimás, pesoas ta pidi zimóla i línguas difísil. Má ten un kuza ki ten txeu valor na Sri Lanka, ki é nos irmons ku irmans bunitu i kes txeu algen umildi ki inda ka konxe Jeová.

Nu diziginadu pa Kandy, ki é un sidadi ki ta fika riba di un lugar altu ki é serkadu pa plantason di xá i floréstas. Kel sidadi é famozu pamodi kes txeu ténplu budista. Poku algen di la konxe algun kuza sobri ses Kriador ki ta ama-s. Nos kongregason ten irmons ku irmans ki ta pâpia sinhala i otus ki ta pâpia tamil i ta fazedu runion na kes dôs língua li. Foi txeu difísil pa nos prende pâpia sinhala. Má nos kongregason i studantis di Bíblia ta daba txeu valor pa sforsu ki nu ta fazeba, sikrê óras ki es ta riba pamodi nu ta papiaba mariadu!

Má língua ka éra nos prinsipal prubléma. Pa primeru bês na vida nu sufri opozison violéntu pamodi verdadi. Un bês, un grupu di algen ki staba xatiadu serka-nu. Alguns kema nos publikason i otus xuta i sota mi ku otu irmon. Nu ora pa Jeová djuda-nu mante kalmu i pa el lenbraba di nos si nu moreba. Nu xinti aliviadu kantu kel grupu di algen bai ses kaminhu. Nu sai di kel vila ta treme i ta agradese Jeová pamodi el proteje-nu.

Ku ténpu, nu kumesa ta xinti ma Sri Lanka éra nos kaza. Sikrê ku géra ki staba ta dividi país, nu fika kontenti di odja modi ki Jeová staba ta atraiba pesoas sinseru pa se família unidu. Nu ten txeu lenbransa sábi di kel ilha bunitu. Má sô dôs anu dipôs, kes autoridadi faze kuzê ki kes xéfi di relijion kreba, i pur isu maioria di kes misionáriu tevi ki sai di país.

Na kes otu simana N staba konfuzu i txeu preokupadu. Nu staba ta pergunta pa undi ki nu sta baba. Grupu Enkaregadu di Óbra manda-nu pa Papua Nova Giné. Nu txiga na Port Moresby, ki éra kapital di la na setenbru di 2001.

Papua Nova Giné é txomadu di “Téra di kuzas ki nu ka sta ta spera”

Enbóra Papua Nova Giné ta fika pértu di Austrália, ses kultura i ses manera di vive é txeu diferenti. Más un bês, nu meste kustumaba ku kes diferénsa. Nu prende tok pisin, ki é kel língua ki maioria di algen ta pâpia na kel país ki ten más di 800 língua!

Dipôs di três anu na sidadi di Popondetta, nu diziginadu pa vizita kongregason. Nunka nu ka imajinaba ma Jeová podia uzaba nos di kel manera li! N ta dimiraba maduréza, kapasidadi di inxina i orientason di kes enkaregadu di grupu di kongregason, má N ka ta xintiba kualifikadu pa faze kel trabadju li. Nha méta sénpri foi ser misionáriu. Má nunka N ka imajinaba ma N pode biraba un enkaregadu di grupu di kongregason. Ti inda N sta dimiradu pamodi Jeová da-m kel priviléjiu li.

Kes sidadi ki nu vizita ta kustuma tinha lus i agu i un kuartu pa durmi. Na kes zóna di interior txeu bês nu ka ta tinha kes kuza li. Nu ta durmiba na kabanas pikinoti, nu ta kuzinhaba fóra di kaza na lenha i nu ta tomaba banhu na riu, má si tinha krokodilu la pértu, nu ta panhaba agu na baldi i nu ta lebaba pa kabana.

Pa kunpri kel diziginason nu mesteba di más forsa di ki kel ki nu tinha. Má nu tinha serteza ma si nu ‘baba ku kel forsa ki nu tinha’, Jeová ta djudaba nos ten bons rezultadu. (Juízes 6:14) Éra txeu difísil txiga na txeu kongregason i grupu pa ba vizita-s pamodi es ta staba na meiu di florésta, montanhas i na otus lugar difísil di bai. Nu ta viajaba na barku, karus, avion, i txeu bês apé pa nu bai atxa nos irmons ku irmans.b

Pa vizita un kongregason pértu di frontera di Indonézia, nu ta konduziba más di 350 kilómetru (200 milha) na un strada ki maior párti di el ka éra kalsetadu. Nu faze kel viajen más di 200 bês, i nu ta pasaba na rius ki tinha poku ponti. Duránti kes anu, nu ta pasaba txeu óra ta koba i ta pintxa nos karu pa fóra di lama, pa txiga na nos irmons ki staba ta spera-nu ku grandi sorizu i kumida na panéla.

Kantu nu ta viajaba pa kes vila ki ta fikaba na kes montanha altu, nu ta baba na avions txeu pikinoti, i kel pilotu tinha ki atxaba un braku na núven pa el djobeba undi ki el ta paraba. Dipôs, el ta buaba baxu riba di kel pista pa djobe si la ka tinha ninhun mininu ô animal. Nu ta priparaba pa dixi na un pista xeiu di lama ki ta fikaba riba di un montanha di 2.100 métru (7 mil pé) di altura. Alvês úniku manera ki nu tinha di sai di kes vila lonji éra panhaba avion na un pista ki ta fikaba na borda di un rótxa.c

Alvês nu ta andaba na montanhas inklinadu ô na lugaris ku txeu agu, na dias kenti i úmidu, ku nos muxila xeiu di publikasons i ku kuzas ki nu mesteba. Pamodi nu ta baba ku irmons i ku irmans fiel, kes kaminhu éra bons oportunidadi pa nu inkorajaba kunpanheru i nu ta riba txeu.

N ta konkorda ku apóstlu Paulu ki fla na 1 Tesalonisensis 2:8: “Dja ki nu ta ama nhos txeu, nu staba disididu. . . na da nos vida pa pode djuda nhos.” Nu odja ma irmons ku irmans tanbê staba dispostu na faze mésmu kuza pa nos i ti es staba prontu pa móre pa proteje-nu di grupus violéntu ki staba armadu. Un bês Leann staba na prigu pamodi un ómi staba ta amiasa-l ku un katana. N ka ta pode djudaba el pamodi N staba na otu ladu di vila. Un irmon lógu fika entri Leann i kel ómi. Nos irmon fika sô ku alguns pankada ki ka éra gravi pamodi otus algen kóre pa ba para kel ómi ki staba xatiadu. Jeová kuida di nos tudu dia na kel país ki staba ta bira kada bês más violéntu, asi pa nu pode djudaba irmons ku irmans di la kuidaba di ses amizadi ku Jeová.

Pamodi Papua Nova Giné ka tinha bons ospital, éra difísil kuidaba di nos saúdi. Na 2010, Leann panha un infeson pamodi un bakitéria i el staba kuazi ta móre. Pur isu, nu tevi ki viaja lógu pa Austrália pa el ba fazeba tratamentu urjenti. Jeová da-nu forsa i el djuda-nu mante kalmu. Dipôs kes dotor atxa un tratamentu ki funsiona. Un di kes dotor fla: “Bu ta trabadja pa Deus. Gósi el sta ta trabadja pa bo.” Txeu mês dipôs nu volta pa nos diziginason.

Nu tinha txeu kuza pa faze na Austrália

Na kel otu anu, nu tevi ki volta pa Austrália pa Leann faze más tratamentu. Na 2012, filial fla-nu pa nu fika la, asi pa nu pode kuidaba di nos saúdi. Dipôs di sta fóra duránti txeu anu, nos prinsipal prubléma ka éra ka konsigi rekupera nos saúdi, má éra muda nos manera di pensa asi pa nu xintiba filís la. Nu xinti tristi pamodi nu dexa nos diziginason i nos irmons ku irmans ki nu ta amaba txeu. Nu ta xintiba ma nu fadja di algun manera i ma Jeová ka ta uzaba nos más. Dipôs di sta fóra duránti txeu ténpu foi difísil odja Austrália sima nos kaza. Nu staba própi ta meste di ajuda di nos irmons ku irmans na kel momentu.

Dipôs ki Leann rekupera, nu bira pioneru spesial na Wollongong, na sul di Sydney, na Nova Gales di Sul. Más ô ménus un anu dipôs, nu fika kontenti di resebe un konviti pa Escola Biblica para Casais Cristãos (ki gósi ta txomadu Skóla pa Pregadoris di Reinu). Dipôs filial di Australázia dizigina-nu pa vizita kongregason. Duránti txeu anu nu vizita kongregasons i grupus na sidadis movimentadu, na sidadis izoladu, i na vilas di piskadoris. Gósi nos diziginason ta inklui kes lugar na noroésti di Austrália ki é sima un dizértu, i tudu Timor-Lésti.

Di nha ladu N ten nha mudjer, ki djuda-m txeu i ki sta konsentradu ta sirbi Jeová. El é un prezenti ki ten txeu valor ki Jeová da-m. Leann nunka nega ninhun diziginason, ka ta inporta modi ki éra difísil ô si el tinha situasons kasábi. Óras ki es ta pergunta-l modi ki el ta lida ku prublémas, el ta fla: “N ta konta Jeová tudu kuza.” Dipôs óras ki el ta lé Palavra di Deus, el ta dexa Jeová inxina-l kal ki é midjór manera di pensa, di xinti ô di aji.

Nunka N ka ta rapende di dexa Jeová orienta nha vida envês di konsigi un karera na disportu na mundu. N odja ma Jeová pode trena-nu pa nu faze kalker kuza ki el krê, si nu sta prontu pa faze kel trabadju ki el da-nu. N prende ma óras ki N ta pasa pa prublémas ô N ten ki toma disizons, primeru N meste faze orason, pidi sabedoria i spritu santu tudu dia. Nos Pai, Jeová, da-nu un vida sábi i ku txeu benson. I nu ten gana di odja kuzê más ki el pode faze ku “vazus di baru” sima nos.—2 Koríntius 4:7.