Prugramas di kongrésu ki ta da pa ‘obi i odja’ dretu

Dja ten más di 130 anu ki Tistimunhas di Jeová na nos ténpu ta djunta tudu anu pa sisti kongrésu. Kes prugrama gósi ta inklui más di 40 diskursu i tanbê múzika, entrivista i vídiu. Má pa kel prugrama djuda i inkoraja kes algen ki ta sisti, es ten ki ‘obi i odja’ dretu. (Lukas 2:20) Modi ki bus kontribuison ta uzadu pa garanti ma tudu algen ta tra pruvetu di kes kongrésu, ka ta inporta na undi ki es ta vive?

Kada lugar di kongrésu meste di un sistéma di son ku vídiu diferenti

Na alguns país ten stádius modérnu i otus tipu di lugar ki ten un sistéma di son ku vídiu. Nton óras ki nu ta luga un di kes lugar li pa nos kongrésu, pamodi ki txeu bês nu ta uza nos própi ekipamentu? Davidi, ki ta trabadja pa Dipartamentu di Broadcasting na Sédi Mundial, ta splika: “Maioria di kes lugar ka fazedu di manera ki pesoas ta konsigi obi ku atenson un prugrama di más di 6 óra, ki ten prinsipalmenti pesoas ta faze diskursu. Pur izénplu, kes lugar di faze disportu ta uza sistéma di son prinsipalmenti pa faze avizus kurtu i pa poi pártis di múzika. Ses ekran ta uzadu pa mostra rezultadu di jogu, mostra publisidadi i pa ripiti alguns párti di jogu. Má nos, nu krê pa kes algen ki sta ta sisti konsigi odja kes vídiu más kunpridu i intende dretu kada palavra ki ta fladu di palku.”

Kada lugar di kongrésu é diferenti di kunpanheru, pur isu kada sistéma di son ku vídiu ten ki ser diferenti tanbê. Lógu ki ta skodjedu un lugar, kes Dipartamentu di Broadcasting di kada filial ta analiza kantu algen ki es ta atxa ma ta bai sisti kongrésu i kantu algen ki ta kebe na kel lugar, asi pa es disidi na undi ki pesoas ta bai xinta. Dipôs, kes irmon ta faze kónta pa disidi na undi ki kes koluna di son i kes ekran meste podu i modi ki es ta ligadu. Dipôs, es ta faze un lista di tudu kes ekipamentu ki es meste pa garanti ma tudu algen ta konsigi obi i odja kel prugrama.

Na kes kongrésu ki kel prugrama ta fazedu na más di ki un língua, sistéma di son ku vídiu é más konplikadu inda. Si prugrama ta traduzidu pa un otu língua, kes tradutor meste odja i obi prugrama, i dipôs kel traduson ta transmitidu pa un kanal di rádiu diferenti pa kes algen ki ta intende kel língua. Nu ta uza un prugrama di konputador spesial pa djuda kes algen ki ta sisti konsigi odja vídiu omésmu ténpu, sikrê son sta ta transmitidu na 8 língua diferenti. Davidi fla: “Kes sistéma li é txeu konplikadu i kes algen ki ta trabadja na el meste di txeu trenamentu.”

Maioria di filial ten ekipamentu di son ku vídiu guardadu pa es uza tudu anu. Na kes kazu li, irmons ta organiza pa kes ekipamentu bai di un kongrésu pa kel otu. Pur izénplu, filial di Mérka tudu anu ta gasta más di 200 mil dólaa (más di 20 mil kontu na dinheru di Kabu Verdi) pa manda kes ekipamentu di un kongrésu pa kel otu. Má, kel-li é más baratu di ki kunpra i kuida di otus ekipamentu. Steven, ki é un irmon ki djuda organiza ekipa di son ku vídiu na un kongrésu na Kanadá fla: “Nos ekipa di son ku vídiu faze ses midjór pa garanti ma kada parafuzu, fiu i pésa sta guardadu i prontu pa prósimu kongrésu.”

Kunpra i kuida di ekipamentu

Luga ekipamentu di son ku vídiu é txeu karu, i kes ekipamentu txeu bês ka ten un bon kualidadi ô es ka ta funsiona dretu. Pur isu, nu ta kustuma kunpra kes ekipamentu ki nu meste. Gósi, un ekran LED grandi ku sinku métru di largura i três métru di altura ta kusta uns 24 mil dóla (uns 2.400 kontu na dinheru di Kabu Verdi) i ti un fiu di mikrofóni di 15 métru ta kusta uns 20 dóla (uns 2 mil skudu na dinheru di Kabu Verdi). Pur isu, antis di kunpra un ekipamentu, Broadcasting ta trabadja djuntu ku Dipartamentu di Kónpras pa “djobe kantu ki el ta kusta”. (Lukas 14:28) Pur izénplu, kantu algen ki kel ekipamentu ta ba djuda? Kunpra un novu ekipamentu é midjór manera di djuda irmons? Nu ten un bon lugar pa guarda kel ekipamentu, i nu ten feraménta i algen trenadu pa kuida di kel ekipamentu?

Pa kes ekipamentu di son ku vídiu dura más ténpu i pa nu popa kes kontribuison ki nu ta resebe, sénpri nu ta konpo kes párti eletróniku i mekániku di kes ekipamentu. Tanbê, óras ki nu ta manda kes ekipamentu di un lugar pa kel otu, nu ta pô-s déntu di un kaxa spesial pa es ka straga, i di vês en kuandu kes kaxa meste konpodu tanbê.

Un bon tistimunhu i un prugrama klaru

Pesoas ki é ka Tistimunhas di Jeová fika dimiradu ku kualidadi di son ku vídiu na nos kongrésu. Pur izénplu, na un kongrésu, un algen ki ta trabadja pa un di kes inpréza di rádiu i tilivizon más grandi di mundu, ilojia kualidadi di nos prugrama i modi ki el ta aprizentadu. Jonathan, ki é un irmon ki ta djuda na monta i organiza ekipamentu di son ku vídiu na kongrésu, fla kel-li sobri kel algen: “El fika dimiradu kantu el fika ta sabe ma tudu algen di nos ekipa ka ta pagadu i ma es ka ta trabadja na kel ária li. El fla ma se inpréza ta duraba sinku dia pa konsigi monta kes ekipamentu ki nos irmons konsigi monta na un dia i meiu.” Na un otu kongrésu jerenti di kel lugar fla: “Txeu algen ki ta trabadja na múzika ku vídiu dja ben li, má nunka N ka odja algen ki ta trabadja dretu sima nhos!”

Modi ki sistéma di son ku vídiu dja djuda-u na kongrésu? Talvês bu ta xinti sima Davidi ki ta mora na Inglatéra. El fla: “N ten 88 anu i N sisti kongrésu nha vida interu. Má gósi, é mutu más fásil presta atenson na prugrama di kongrésu. Pamodi kes vídiu bunitu, ta parse ma prugrama interu ta bai faxi i kel mensajen sta más klaru i ligadu ku kunpanheru.” Irmon Micheal, ki ta vive na Nijéria, fla: “Dja ki gósi é más fásil obi kel irmon ki sta faze diskursu i odja vídiu, irmons ta konsigi konsentra i es ka ta perde interesi duránti prugrama.”

Óras ki bu sisti bu kongrésu ô un kongrésu spesial di kel anu li, ku téma ‘Pâpia di notísia sábi!’, para i pensa na tudu trabadju ki fazedu pa djuda-u odja i obi kel prugrama. Nu sta kontenti ma bus kontribuison, i kel-li ta inklui kes ki ta fazedu na donate.jw.org, djuda pa kel-li kontise. Obrigadu!