Kuzas ki nu ta faze pa djuda nos irmons i tanbê nos planéta

Tistimunhas di Jeová sabe ma ka ta dura Jeová ta ben salva nos planéta di kes algen ki sta straga-l. (Apokalipse 11:18) Má timenti kel-li ka kontise, nu ta faze kel ki nu pode pa nu kuida di nos planéta. Pur izénplu, na kes lugar ki nu ta uza pa adora Jeová nu ta faze txeu prujétu ki ta djuda-nu ka prujudika anbienti.

Ki tipu di prujétu dja nu faze? I modi ki es ta djuda-nu uza kontribuisons di midjór manera?

Kuzê ki nu faze pa un Salon di Asenbleia fika frésku

Salon di Asenbleia di Matola na Mosanbiki é abértu na ladu i kubértu ku xapa di metal. Antis, kel xapa ta kentaba txeu na sol i el ta poba kel Salon di Asenbleia ta fikaba kenti dimás. Un irmon di la fla: “Kalor ta poba nos ta fika tudu suadu! Na fin di prugrama irmons ta saíba faxi pa ba tomaba ar frésku.” Kuzê ki nu pode fazeba pa nos Salon di Asenbleia biraba un lugar más sábi pa nos irmons ku irmans konsentra na prugrama?

Nu disidi rezolve kel prubléma li di un manera ki ka ta prujudika anbienti. Riba di kel kubertura nu poi un tipu di izaustor ki ka meste ligadu na lus, pamodi el ta uza béntu pa trabadja. I baxu di kel kubertura nu poi un material ki ta proteje di kalor. Kel material ta poi ménus kalor di sol ta entra i kes izaustor ta poi ar ta sirkula pamodi es ta puxa kel ar kenti pa fóra. Kada un di kes izaustor é 50 dólaa (uns 5 mil skudu di Kabu Verdi).

Dipôs ki fazedu tudu kes kuza li, kualidadi di ar di Salon di Asenbleia midjora txeu. Dja ki gósi ar ta sirkula, ten ménus umidadi i bulor. Tanbê ten ménus dióksidu di karbonu i mutu más oksijéniu. Pur isu, kes algen ki ta sisti prugrama ta xinti más sábi i es ta konsentra midjór. Kel irmon ki dja nu papiaba di el antis, fla: “Gósi nu ka ta sai lógu dipôs ki prugrama tirmina. Envês di kel-li, nu ta fika duránti intervalu di almosu ta pâpia ku kunpanheru. Óras ki nu ta xinta dibaxu di kel novu kubertura, nu ta xinti frésku sima óras ki nu ta xinta baxu di un arvi grandi!”

Nu ta uza inerjia di sol

Na txeu lugar ki nu ta uza pa adora Jeová, nu poi painel solar ki ta transforma lus di sol, ki é un inerjia ki ka ta kaba, na eletrisidadi. Pur isu, nu ta uza ménus eletrisidadi ki ta ben di kuzas sima karvon, pitróliu i gas. Kel-li ta faze ménus poluison i ta djuda-nu popa dinheru.

Na anu 2023 nu poi painel solar na Betel di Slovénia. El ta da 30 pursentu di lus ki Betel ta uza. Má, si kel lus ki painel ta da é más txeu di ki kel ki Betel meste, kel ki ta resta ta podu na redi di lus di kel sidadi. Nu gasta 360 mil dóla (uns 36 mil kontu di Kabu Verdi) na kes painel solar. Má dja ki gósi Betel ta paga lus más poku, na kuatu anu nu ta popa kel dinheru ki nu gasta pa nu kunpra kes painel.

Na anu di 2024, nu poi painel solar i un bataria grandi na Betel di Sri Lanka. Nu gasta uns 3 milhon di dóla (uns 300 mil kontu di Kabu Verdi) na kel prujétu li. El ta da 70 pursentu di lus ki Betel meste. Na três anu nu ta popa kel dinheru ki nu gasta na kes painel. Na kel mésmu anu, nu poi painel solar na Betel di Olanda. Nu gasta 1 milhon i 100 mil dóla (uns 110 mil kontu di Kabu Verdi) na kel prujétu li. El ta da 35 pursentu di lus ki Betel meste. Na 9 anu nu ta popa kel dinheru ki nu gasta na kes painel.

Tanbê nu poi painel solar na alguns skritóriu di traduson (RTO) na Méxiku. Un di es é RTO di língua taraumara (Sentral) ki ta fika na Xiuaua. Na ténpu friu tenperatura pode fika baxu di zéru i na ténpu kalor el pode pasa di 40 grau! Má dja ki lus é karu, irmons ta ivitaba uza ar kondisionadu i ekipamentu pa kenta kaza. Jonatan, ki é un irmon ki ta trabadja na kel RTO, fla: “Na ténpu friu nu ta uzaba manta i ropa kenti, i na ténpu kalor nu ta abriba janéla.”

Na anu di 2024, nu poi painel solar na kel RTO. Nu gasta 21.480 dóla (uns 2.100 kontu di Kabu Verdi) na kel prujétu. Na sinku anu nu ta popa dinheru ki nu gasta na kes painel. Gósi, nos irmons pode uza ar kondisionadu i kes ekipamentu pa kenta kaza más txeu. Jonatan fla: “Gósi nu sta ta gosta di sta na RTO más txeu i nu ta konsigi faze nos trabadju midjór. Tanbê, nu ta fika kontenti di sabe ma organizason sta ta uza kes kontribuison di nos irmons dretu i di un manera ki ka ta prujudika anbienti.”

Nu ta uza agu di txuba

Na Áfrika é difísil alguns Salon di Reinu ten agu. Pamodi kel-li, alvês irmons ten ki karega agu alguns kilómetru ti txiga Salon di Reinu. Na otus Salon di Reinu irmons ta kunpra agu ki ta lebadu na karu, má kel-li é karu i el ta prujudika anbienti.

Pa djuda nos irmons ten agu, riba di Salon di Reinu nu poi kalha ku tubu ki ta leba agu di txuba pa un tanki grandi. Nu faze kel-li na txeu Salon di Reinu na pártis diferenti di Áfrika. Antis di faze kel trabadju li, irmons ta tenta sabe modi ki klima di kel lugar é, asi pa es odja kal ki é midjór manera di djunta i guarda agu na kada Salon di Reinu. Pa faze kel trabadju li na un Salon di Reinu nu ta gasta entri 600 i 3 mil dóla, (entri uns 60 i 3 mil kontu di Kabu Verdi). Má, kel-li txeu bês ta djuda pa ten ménus dispéza na Salon di Reinu, dja ki irmons ka meste kunpra agu más.

Kel manera li di djunta i guarda agu dja djuda irmons txeu. Noemia, un irman di Mosanbiki, fla: “Antis nu ta ba panhaba agu lonji. I óras ki nu ta txigaba Salon di Reinu nu ta staba kansadu dimás. Tanbê, dja ki tinha poku agu, éra difísil nu mante linpu. Gósi tudu algen pode laba mô. I óras ki nu ta txiga Salon di Reinu, nu ka ta sta kansadu dimás pa presta atenson na runion. Obrigadu di korason!”

Modi ki organizason ta konsigi ranja dinheru pa faze kes prujétu li? Nu ta konsigi kel-li pamodi kes kontribuison ki ta fazedu pa trabadju na mundu interu. Txeu di kes kontribuison ta fazedu através di donate.jw.org. Obrigadu pa kes kontribuison ki nhos ta faze di korason!