Levítiku

24 Jeová kontinua ta fla Muizés: 2 “Manda kes israelita pa traze-u azeti puru di olivera pa poi na kes kandelabru, asi pa es kontinua sénpri sendedu. 3 Na ténda di runion, di ladu di fóra di kurtina di Tistimunhu, Aron debe mante kes lus sendedu dianti di Jeová di noti ti kel otu dia di palmanhan. Kel-li é un lei pa tudu ténpu pa tudu nhos jerason. 4 El debe mante kes lánpida di kandelabru di oru puru sénpri na se lugar, dianti di Jeová.

5 “Bu ta panha farinha finu i bu ta faze 12 pon ku fórma di anel. Kada pon debe ten dôs kilu.* 6 Bu ta ruma kes pon na dôs grupu di 6 riba di kunpanheru, riba di méza di oru puru, dianti di Jeová. 7 Bu debe poi insénsu branku puru riba di kada grupu di pon. El ta reprizenta* kel oférta interu di pon, i el ta ser un oférta ki fazedu ku lumi pa Jeová. 8 Tudu sábadu el debe poi pon frésku na méza dianti di Jeová. Kel-li é un kontratu pa tudu ténpu ku kes israelita. 9 Es ta ser di Aron i di ses fidju, i es ta kume-s na un lugar santu, pamodi di kes oférta ki fazedu ku lumi pa Jeová, es é kes kuza más sagradu. Kel-li é un lei pa tudu ténpu.”

10 Entri kes israelita tinha un ómi ki éra fidju di un mudjer israelita ku un ómi di Ijitu, i el briga ku un israelita na kanpamentu. 11 Kel ómi ki éra fidju di kel mudjer israelita kumesa ta pâpia mal di Nómi* i ta maldisua-l. Pur isu, es leba-l na Muizés. Se mai txomaba Selomite, ki éra fidju-fémia di Dibri, di tribu di Dan. 12 Es prende-l ti ki es fika ta sabe kuzê ki Jeová disidi.

13 Nton, Jeová fla Muizés: 14 “Leba kel ki maldísua nha nómi pa fóra di kanpamentu, i tudu kes ki obi-l debe poi ses mô riba di se kabésa, i povu interu debe da-l ku pédra. 15 I bu debe fla kes israelita: ‘Si algun ómi maldísua se Deus, el ta paga pa se pekadu. 16 Nton, ken ki pâpia mal di nómi di Jeová debe matadu sen falta. Povu interu debe da-l ku pédra sen falta. Tantu kel stranjeru ki ta mora na nhos meiu i tanbê kel israelita debe matadu, pamodi es pâpia mal di kel Nómi.

17 “‘Si un ómi tra un algen vida,* el debe matadu sen falta. 18 Ken ki mata un animal doméstiku* debe paga pa el, vida pa vida.* 19 Si un ómi da se prósimu pankada, el debe fazedu mésmu kuza ki el faze kel otu. 20 Osu pa osu,* odju pa odju, denti pa denti. El debe dadu kel mésmu tipu di pankada ki el da kel otu algen. 21 Ken ki mata un animal debe paga pa el, má ken ki mata un ómi debe matadu.

22 “‘Debe aplikadu kel mésmu lei, ka ta inporta si é un stranjeru ki ta mora na nhos meiu ô un israelita, pamodi ami é Jeová, nhos Deus.’”

23 Nton, Muizés pâpia ku kes israelita, i es leba kel ómi ki papiaba mal di nómi di Deus pa fóra di kanpamentu, i es da-l ku pédra. Di kel manera li kes israelita faze sima Jeová mandaba Muizés.