Deuteronómiu
33 Kel-li é kel benson ki Muizés, kel ómi di Deus verdaderu, fla kes israelita antis di el móre. 2 El fla:
“Jeová ben di Sinai,
I el brilha riba di es désdi Seir.
El brilha ku glória désdi kel lugar di Paran ki ten montanha,
I un monti anju* staba ku el,
Ses gereru staba na se direita.
3 El ama se povu.
Tudu ses santu sta na bu mô.
Es staba xintadu na bu pé,
Es kumesa ta obi bus palavra.
4 (Muizés da-nu un órdi, un lei,
Pa ser di* kongregason di Jakó.)
6 Pa Ruben vive i pa el ka móre,
I pa ses ómi ka bira poku.”
7 I el fla Judá kel benson li:
“Ó Jeová, obi vós di Judá,
I pa bu traze-l otu bês pa se povu.
Ses brasu ta difende* kel ki é di sel,
I pa bu djuda-l kóntra ses inimigu.”
8 El fla kel-li sobri Levi:
“Bu Tumin i bu Urin é di kel ómi ki é lial pa bo,
Kel ki bu poi na próva na Masá.
Bu kumesa ta diskuti ku el djuntu di kes agu di Meribá,
9 Kel ómi ki fla di se pai i di se mai: ‘N ka ten konsiderason pa es.’
Nen ses irmon el ka rekonhese,
I el iginora ses própi fidju,
Pamodi es guarda bu palavra,
I es kunpri bu kontratu.
10 Pa es inxina Jakó na bus mandamentu
I Israel na bu Lei.
Pa es oferese-u* insénsu sima un txeru sábi
I un oférta interu na bu altar.
11 Ó Jeová, abênsua se forsa,
I pa bu fika kontenti ku trabadju di se mô.
Kebra pérna* di kes algen ki ta labanta kóntra el,
Asi pa kes ki ta odia-l ka labanta nunka más.”
12 El fla kel-li sobri Benjamin:
“Pa kel ki Jeová ta ama mora suguru djuntu di el,
Timenti el ta proteje-l dia interu,
El ta mora entri ses onbru.”
13 El fla kel-li sobri Juzé:
“Pa Jeová abênsua se téra
Ku kes kuza bon di séu,
Ku orbadju i ku agu di fonti ki sta dibaxu di téra,
14 Ku kes kuza bon ki sol ta poi ta kria
I ku kes kodjéta bon di kada mês,
15 Ku kes midjór kuza di kes montanha antigu*
Ku kes kuza bon di kes monti pikinoti ki ta dura pa tudu ténpu,
16 Ku kes kuza bon di téra i ku kes kuza ki ta intxi-l,
I ku benson di Kel ki parse na spinheru.
Pa es ben riba di kabésa di Juzé,
Riba di kabésa di kel ki skodjedu na meiu di ses irmon.
17 Se forsa é sima kel di primeru fidju di toru,
I ses txifri é sima kes txifri di un toru brabu.
El ta pintxa otus povu ku es*
Tudu djuntu ti fin di téra.
Es é kes dizéna di milhar di Efrain,
Kes milhar di Manasés.”
18 El fla kel-li sobri Zebulon:
“Ó Zebulon, fika kontenti na bus saída,
I abo, Isakar, na bus ténda.
19 Es ta txoma povu pa bai monti.
Es ta oferese kes sakrifisiu di justisa la.
Pamodi es ta tra txeu rikéza di* mar
I kes tizoru sukundidu di areia.”
20 El fla kel-li sobri Gade:
“Abensuadu é kel algen ki ta bira tiritóriu di Gade más grandi.
El ta deta la sima un lion,
Prontu pa rinka brasu, sin, kabésa di kel ki el kasa.
21 El ta skodje kel primeru párti pa el.
Pamodi é la ki ta guardadu kel párti di kel ki ta da lei.
Kes xéfi di povu ta djunta.
El ta kunpri justisa di Jeová
I mandamentus di Deus pa Israel.”
22 El fla kel-li sobri Dan:
“Dan é fidju di lion.
El ta salta di Bazan.”
23 El fla kel-li sobri Naftali:
“Naftali sta kontenti ku bondadi di Jeová
I xeiu di se benson.
Toma kónta di oésti i sul.”
24 El fla kel-li sobri Azer:
“Azer é abensuadu ku fidju.
Pa ses irmon fika kontenti ku el,
I pa el murgudja* se pé na azeti.
25 Tranka di bus porton é féru i kóbri,
I bu ta fika suguru tudu dia di bu vida.*
26 Ka ten ningen sima kel Deus verdaderu di Jezurun,
Ki ta trabesa séu pa djuda-u
I ki ta ben na núven ku glória.
27 Deus é un proteson désdi ténpu antigu,
Ses brasu ki ta dura pa tudu ténpu sta bu baxu.
El ta tra bus inimigu di bu frenti,
I el ta fla: ‘Kaba ku es!’
28 Israel ta mora na suguransa,
I kel fonti di Jakó ta kóre el sô
Na un téra di serial i di vinhu novu,
Undi ta kai orbadju di séu.
29 Ó Israel, abo é filís!
Ken ki é sima bo,
Un povu ki se salvason ta ben di Jeová,
Bu skudu di proteson
I bu spada grandi?
Bus inimigu ta inkodje di medu bu dianti,
I bu ta piza ses kósta.”*