Juzué
7 Má kes israelita ka faze kel ki Deus mandaba es pa es faze ku kes kuza ki kondenadu pa distruison, pamodi un ómi ki txomaba Akan, di tribu di Judá, furta alguns di kes kuza. Akan éra fidju di Karmi, nétu di Zabdi, di família di Zerá. Nton pamodi el furta kes kuza, Jeová fika txeu xatiadu ku israelitas.
2 Juzué manda kes ómi bai di Jerikó pa Ai, ki ta fika pértu di Bete-Aven i na lésti di Betel, i el fla-s: “Nhos bai i nhos djobe kel téra.” Pur isu, kes ómi bai i es djobe Ai. 3 Kantu es volta pa Juzué, es fla-l: “Ka meste manda tudu trópa. Uns 2 mil ô 3 mil ómi ta txiga pa vense Ai. Ka bu manda tudu trópa pa bu ka kansa-s, pamodi kes algen di la é poku.”
4 Pur isu, uns 3 mil ómi bai pa la, má es tevi ki fuji di kes ómi di Ai. 5 Kes ómi di Ai mata 36 ómi. Es pirsigi kes israelita désdi ladu di fóra di porton ti Sebarin,* i es mata-s na dixida. Pur isu, korason di povu derete i es perde koraji.*
6 Pamodi kel-li, Juzué ratxa se ropa i el inbaxa ku róstu pa txon dianti di Arka di Jeová ti tardinha. Kes ansion di Israel faze mésmu kuza. I es kontinua ta bota téra riba di ses kabésa. 7 Juzué fla: “Ai Jeová, kel Sinhor Más Grandi. Pamodi ki bu pô-nu ta trabesa Jurdon pa bu intrega-nu na mô di kes amoreu pa es distrui-nu? Éra pa nu fikaba kontenti i kontinua na kel otu ladu* di Jurdon! 8 Ó Jeová, diskulpa-m. Kuzê ki N pode fla gósi ki Israel fuji* di ses inimigu? 9 Óras ki kes kananeu i tudu kes algen di kel téra li obi ta papiadu di kel-li, es ta serka-nu i es ta paga nos nómi di téra, i kuzê ki bu ta faze pa bu difende bu nómi ki é grandi?”
10 Jeová responde Juzué: “Labanta! Pamodi ki bu sta inbaxadu ku róstu pa txon? 11 Israel peka. Es viola nha kontratu ki N manda-s pa es guarda. Es tra alguns di kes kuza ki éra kondenadu pa distruison, es furta-s i es pô-s sukundidu na meiu di ses própi kuzas. 12 É pur isu ki israelitas ka ta konsigi vense ses inimigu. Ses inimigu ta pô-s ta fuji, pamodi es debe distruídu. Si nhos ka distrui kel algen ki N fla ma debe distruídu, N ka ta sta más ku nhos. 13 Labanta i santifika povu! Fla-s: ‘Nhos santifika pa manhan, pamodi Jeová, kel Deus di Israel, fla: “Ó Israel, ten un ómi entri nhos ki debe ser distruídu. Si nhos ka distrui-l nhos ka ta pode vense nhos inimigu. 14 Nhos ten ki aprizenta di palmanhan, tribu pa tribu. Kel tribu ki Jeová skodje ta txiga pértu, família pa família. Kel família ki Jeová skodje ta txiga pértu, kaza pa kaza. Kel kaza ki Jeová skodje ta txiga pértu, ómi pa ómi. 15 I kel algen ki atxadu ku kel kuza ki kondenadu pa distruison* ta kemadu na lumi, el i tudu kel ki é di sel, pamodi el viola kontratu di Jeová i pamodi el faze un kuza ki poi Israel na vergónha.”’”
16 Na kel otu dia di palmanhan, Juzué labanta sédu i el poi Israel ta txiga pértu, tribu pa tribu, i tribu di Judá skodjedu. 17 El poi kes família di Judá ta txiga pértu, i família di kes zeraíta skodjedu. Dipôs, el poi família di kes zeraíta ta txiga pértu, ómi pa ómi, i Zabdi skodjedu. 18 Ti ki enfin kes di kaza di Zabdi txiga pértu, ómi pa ómi, i Akan, fidju di Karmi, nétu di Zabdi, familia di Zerá, di tribu di Judá, skodjedu. 19 Nton, Juzué fla Akan: “Favor, nha fidju, onra Jeová, kel Deus di Israel, i konfesa-l bu pekadu. Favor, fla-m kuzê ki bu faze. Ka bu sukundi-m nada.”
20 Akan responde Juzué: “Pa fla verdadi, é mi ki peka kóntra Jeová, Deus di Israel, i é kel-li ki N faze. 21 Kantu N odja na meiu di kes kuza un ropa karu i bunitu di Siniar, dôs kilu* di prata i un bara di oru di meiu kilu,* N xinti vontadi di ten es, i N panha-s. Es sta sukundidu na nha ténda, interadu na txon, i kel prata ku kel oru sta ses baxu.”
22 Kel óra Juzué manda alguns ómi i es bai ta kóre ti ténda. Kel ropa staba sukundidu la na ténda, i kel prata ku kel oru staba se baxu. 23 Nton, es panha kes kuza di ténda i es leba Juzué i tudu kes israelita i es pô-s dianti di Jeová. 24 Nton, Juzué i tudu Israel pega Akan, fidju di Zerá, i tanbê kel prata, kel ropa karu, kel bara di oru, ses fidju matxu, ses fidju-fémia, ses boi, ses buru, ses ovelha, se ténda i tudu kuza ki éra di sel, i es leba pa vali di Akor. 25 Juzué fla: “Pamodi ki bu traze-nu es disgrasa? Oji Jeová ta pô-u na disgrasa* tanbê.” Nton, tudu Israel da-s ku pédra. Dipôs di kel-li, es kema es tudu na lumi. Asi, es tudu dadu ku pédra ti ki es móre. 26 I es poi un monti di pédra riba di el, ki sta la ti dia di oji. I asi, kel grandi raiba di Jeová bira más poku. É pur isu ki kel lugar ta txomadu di vali di Akor* ti dia di oji.