Juzué
8 Dipôs, Jeová fla Juzué: “Ka bu ten medu nen ka bu fika dizorientadu. Leba djuntu ku bo tudu kes ómi di géra i subi kóntra Ai. Odja, N intrega-u na bu mô rei di Ai, se povu, se sidadi i se téra. 2 Faze ku Ai i se rei kel mésmu kuza ki bu faze ku Jerikó i se rei, má di es bês nhos pode fika ku kes kuza ki es ten i ses animal. Pripara un armadilha tras di sidadi.”
3 Nton, Juzué i tudu kes ómi di géra subi kóntra Ai. Juzué skodje 30 mil trópa balenti i el manda-s di noti. 4 El da-s kel órdi li: “Nhos fika sukundidu tras di sidadi. Ka nhos bai mutu lonji di sidadi, i nhos tudu nhos fika priparadu. 5 Ami i tudu algen ki sta ku mi nu ta txiga pértu di sidadi, i óras ki es ben kóntra nos, sima es fazeba antis, nu ta fuji di es. 6 Óras ki es ben nos tras, nu ta leba-s pa lonji di sidadi, pamodi es ta fla: ‘Es sta ta fuji sima es fazeba antis.’ I nu ta fuji di es. 7 Nton, nhos debe sai di kel lugar ki nhos sta sukundidu i toma kel sidadi. Jeová, nhos Deus, ta da nhos el. 8 Sin ki nhos toma kel sidadi, nhos debe kema-l. Nhos debe faze sima palavra di Jeová. Kes-li é kes órdi ki N da nhos.”
9 Dipôs Juzué manda-s, i es bai pa kel lugar ki es ta ba sukundiba. Es fika entri Betel i Ai, na ladu oésti di Ai, timenti Juzué pasa kel noti ku kes otu trópa.
10 Dipôs ki Juzué labanta sédu palmanhan i el djunta kes trópa, el i kes ansion di Israel leba-s pa Ai. 11 Tudu kes ómi di géra ki staba ku el subi i es bai ti kel párti frenti di sidadi. Es fika na nórti di Ai, ku vali entri es i Ai. 12 Má el skodjeba uns 5 mil ómi i el poba es ta fika sukundidu entri Betel i Ai, na ladu oésti di sidadi. 13 Nton, maioria di kes trópa fika na kanpamentu na ladu nórti di sidadi i kes otu trópa ki staba pa tras fika na ladu oésti di sidadi. Na kel noti, Juzué bai ti metadi di vali.
14 I sin ki rei di Ai odja kel-li, el i kes ómi di sidadi sai lógu sédu palmanhan pa ba géra kóntra Israel na un lugar ki ta fikaba na frenti di dizértu. Má rei ka sabia ma tinha un armadilha kóntra es tras di sidadi. 15 Kantu kes ómi di Ai ataka, Juzué i tudu Israel fuji pa kaminhu ki ta bai pa dizértu. 16 Nton, tudu povu ki staba na sidadi mandadu pa es pirsigi-s, i kantu es pirsigi Juzué es bai pa lonji di sidadi. 17 Ka fika ninhun ómi na Ai i na Betel ki ka bai tras di Israel. Es dexa sidadi sen proteson i es pirsigi Israel.
18 Nton, Jeová fla Juzué: “Stika kel lansa ki bu tene na mô pa Ai, pamodi N ta intrega-u el na bu mô.” Nton, Juzué stika kel lansa ki el tinha na mô pa sidadi. 19 Kantu el stika se mô, kes ómi ki staba sukundidu sai faxi di kel lugar undi ki es staba, es kóre pa sidadi i es toma-l. Lógu es poi kel sidadi lumi.
20 Kantu kes ómi di Ai djobe pa tras, es odja fumu di sidadi ta subi pa séu i es ka teve forsa pa fuji pa ninhun ladu. Nton, kes ki staba ta fuji pa dizértu volta kóntra kes ki staba ta pirsigi-s. 21 Kantu Juzué i tudu Israel odja ma kes ómi ki staba sukundidu toma sidadi i ma fumu staba ta subi di sidadi, es volta i es ataka kes ómi di Ai. 22 I kes ki tomaba sidadi sai pa ba inkontra ku es. Nton, kes ómi di Ai fika na meiu sen saída, ku israelitas di un ladu i di kel otu. Kes israelita mata-s i es ka dexa ningen fika bibu i nen fuji. 23 Má, es pega rei di Ai bibu i es leba-l na Juzué.
24 Kes israelita mata tudu kes trópa di Ai ki staba ta pirsigi-s na dizértu, ti ki kel últimu di es matadu ku spada. Dipôs di kel-la, es volta pa sidadi di Ai i es mata kes ki fika. 25 Na kel dia móre tudu kes algen di Ai, tantu ómi i tanbê mudjer. Es éra 12 mil algen. 26 Juzué fika ku mô stikadu ku lansa ti ki el kaba ku tudu kes algen di Ai. 27 Má, Israel fika ku kes animal i ku kes kuza ki kes algen tinha na sidadi, sima Jeová mandaba Juzué.
28 Nton, Juzué kema Ai i el fika sô un monti di pédra, ti dia di oji. 29 El mata rei di Ai i el pô-l na un staka ti tardinha. Kantu sol staba ta kanba, Juzué manda pa es tra se korpu di kel staka. Nton, es bota-l na entrada di porton di sidadi i es poi un monti di pédra riba di el, ki sta la ti dia di oji.
30 Nton, Juzué faze un altar na monti Ebal pa Jeová, kel Deus di Israel, 31 sima Muizés, kel sérvu di Jeová, mandaba kes israelita i sima sta skrebedu na livru di Lei di Muizés: “Un altar di pédra interu ki ka uzadu ninhun feraménta di féru.” Riba di el es faze oférta kemadu pa Jeová i tanbê kes sakrifisiu di pas.
32 Nton, el skrebe na kes pédra kel Lei ki Muizés skrebeba dianti di kes israelita. 33 Tudu Israel, ses ansion, ses xéfi i ses juís staba di pé na tudu dôs ladu di Arka, dianti di kes saserdóti levita ki staba ta karega Arka di Kontratu di Jeová. Kes stranjeru ki ta mora na ses meiu i tanbê kes israelita staba la. Metadi di es staba dianti di monti Jerizin i kel otu metadi staba dianti di monti Ebal (sima Muizés, kel sérvu di Jeová, dja mandaba), asi pa povu di Israel abensuadu. 34 Dipôs di kel-li, el lé ku vós altu tudu kes palavra di Lei, kes benson i kes maldison, di akordu ku tudu kel ki sta skrebedu na livru di Lei. 35 Ka tinha ninhun palavra di tudu kel ki Muizés mandaba ki Juzué ka lé ku vós altu dianti di tudu kongregason di Israel, i dianti di kes mudjer, kes mininu i kes stranjeru ki ta moraba na ses meiu.