Juzué

24 Nton, Juzué djunta tudu tribu di Israel na Sikén i el txoma kes ansion di Israel, kes xéfi, kes juís i kes enkaregadu, i es fika dianti di Deus verdaderu. 2 Juzué fla povu interu: “É kel-li ki Jeová, kel Deus di Israel, fla: ‘Nhos gentis grandi, ki ta inkluiba Tera, pai di Abraon i pai di Naor, mora na kel otu ladu di riu Eufratis* dja ten txeu ténpu i es ta sirbiba otus deus.

3 “‘Ku ténpu, N tra Abraon, nhos família, di kel otu ladu di riu Eufratis i N pô-l ta anda tudu téra di Kanan, i N poi se disendenti* ta bira txeu. N da-l Izaki, 4 i Izaki, N da Jakó i Izaú. Dipôs N da Izaú kes zóna di Seir ki ten montanha pa ser di sel, i Jakó i ses fidju dixi pa Ijitu. 5 I dipôs, N manda Muizés i Aron i N kastiga Ijitu ku praga. Dipôs N tra nhos di la. 6 Kantu N tra nhos pai di Ijitu i nhos txiga na mar, kes algen di Ijitu pirsigi nhos pai ku karus di géra i ómis montadu na kabalu ti mar Brumedju. 7 Es kumesa ta grita i ta pidi Jeová ajuda, nton N poi un sukuru entri nhos i kes algen di Ijitu, i N poi* agu di mar ta kai riba di es i ta kubri-s, i nhos própi odju odja kuzê ki N faze na Ijitu. Dipôs nhos mora pa txeu anu* na dizértu.

8 “‘I N leba nhos pa kel téra di kes amoreu ki ta moraba na kel otu ladu* di Jurdon, i es luta kóntra nhos. Má N intrega-s na nhos mô pa nhos toma kónta di ses téra, i N kaba ku es di nhos frenti. 9 Nton Balaki, fidju di Zipor, rei di Moabe, labanta i el géra kóntra nhos. Pur isu, el txoma Balaon, fidju di Beor, pa maldisua nhos. 10 Má N nega obi Balaon. Pur isu, el abênsua nhos txeu bês, i N libra nhos di se mô.

11 “‘Nton, nhos trabesa Jurdon i nhos txiga na Jerikó. I kes líder* di Jerikó, i tanbê kes amoreu, kes perizeu, kes kananeu, kes itita, kes jirgazeu, kes eveu i kes jebuzeu géra kóntra nhos, má N intrega-s na nhos mô. 12 N poi bus inimigu ta xinti dizanimadu, i N tra-s di nhos frenti, sima N fazeba ku kes dôs rei di kes amoreu. Kel-li ka fazedu nen ku nhos spada nen ku nhos arku. 13 Nton, N da nhos un téra ki nhos ka trabadja pa el i sidadi ki nhos ka konstrui, i nhos mora na es. Nhos sta ta kume plantason di uva i di olivera ki nhos ka planta.’

14 “Pur isu, nhos ten grandi ruspetu pa Jeová i nhos sirbi-l ku lialdadi* i di manera fiel. Nhos tra di nhos meiu kes deus ki nhos gentis grandi sirbi kantu es staba na kel otu ladu di riu Eufratis i na Ijitu, i nhos sirbi Jeová. 15 Gósi, si nhos ta atxa ma nhos ka debe sirbi Jeová, nhos skodje oji ken ki nhos ta sirbi, si é kes deus ki nhos gentis grandi sirbi kantu es staba na kel otu ladu di riu Eufratis, ô si é kes deus di kes amoreu ki nhos sta moradu na ses téra. Má ami ku tudu algen di nha kaza, nu ta sirbi Jeová.”

16 Nton, povu responde: “Nunka nu ka ta pensaba na bandona Jeová pa nu ba sirbi otus deus. 17 É Jeová, nos Deus, ki tra-nu nos i nos pai di téra di Ijitu, kel téra ki nos éra skravu. É el ki faze kes grandi milagri li dianti di nos odju i ki proteje-nu na tudu kaminhu ki nu anda entri tudu povu ki nu pasa na el. 18 Jeová tra tudu kes povu ki ta moraba na kel téra li antis di nos, i kes amoreu tanbê. Pur isu, nos tanbê nu ta sirbi Jeová, pamodi el é nos Deus.”

19 Dipôs, Juzué fla povu: “Nhos ka ta pode sirbi Jeová, pamodi el é un Deus santu. El é un Deus ki ta iziji pa adora-l sô el. El ka ta púrdua nhos éru* i nhos pekadu. 20 Si nhos bandona Jeová i nhos sirbi kes deus stranjeru, tanbê el ta fika kóntra nhos i el ta kaba ku nhos, dipôs ki el faze nhos kuzas dretu.”

21 Má povu fla Juzué: “Nau, é Jeová ki nu ta sirbi!” 22 I Juzué fla povu: “Nhos é tistimunha kóntra nhos mê, ma nhos skodje sirbi Jeová di livri vontadi.” Es responde: “Nos é tistimunha.”

23 “Pur isu, nhos tra kes deus stranjeru ki sta na nhos meiu, i nhos volta pa Jeová, Deus di Israel, di tudu nhos korason.” 24 Povu fla Juzué: “Nu ta sirbi Jeová, nos Deus, i nu ta obi ku se vós!”

25 Nton, Juzué faze un kontratu ku povu na kel dia i el da-s un lei i un órdi na Sikén. 26 Nton, Juzué skrebe kes palavra li na livru di Lei di Deus, i dipôs el panha un pédra grandi i el pô-l baxu di kel arvi grandi ki ta fika djuntu di santuáriu di Jeová.

27 Juzué kontinua ta fla povu interu: “Nhos odja! Kel pédra li ta ser tistimunha kóntra nos, pamodi el obi tudu kel ki Jeová fla-nu, i el ta ser tistimunha kóntra nhos, pa nhos ka nega nhos Deus.” 28 Nton, Juzué manda povu bai ses kaminhu, i kada un bai pa se eransa.

29 Dipôs di kes kuza li, Juzué, fidju di Nun i sérvu di Jeová, móre ku 110 anu. 30 I es intera-l na tiritóriu di se eransa na Timnate-Sera, ki ta fika na kes zóna di Efrain ki ten montanha, na nórti di monti Gás. 31 Israel kontinua ta sirbi Jeová duránti tudu ténpu di Juzué i duránti tudu ténpu di kes ansion ki kontinua bibu dipôs di Juzué i ki konxeba tudu kes kuza ki Jeová fazeba pa Israel.

32 Kes osu di Juzé, ki israelitas trazeba di Ijitu, interadu na Sikén, na kel párti di kanpu ki Jakó kunpraba di kes fidju di Emor, pai di Sikén, pa 100 pésa di dinheru. I el bira eransa di kes fidju di Juzé.

33 Eliazar, fidju di Aron, tanbê móre. Es intera-l na kel monti di Fineias, se fidju, na kel monti ki el dadu na kes zóna di Efrain ki ten montanha.