Juízis
5 Na kel dia, Débura i Baraki, fidju di Abinoan, kanta kel kántiku li:
2 “Nhos lova Jeová
Pamodi kes trópa di Israel dexa ses kabelu largadu,*
I pamodi povu bai géra di livri vontadi!
3 Ó reis, nhos obi! Ó governantis, nhos presta atenson!
N ta kanta pa Jeová.
N ta kanta lovor* pa Jeová, kel Deus di Israel.
4 Jeová, kantu bu sai di Seir,
I bu sai ta marxa désdi tiritóriu di Edon,
Téra treme i txuba kai di séu,
Kes núven baza agu.
5 Kes monti treme* dianti di róstu di Jeová,
Ti mésmu Sinai treme dianti di róstu di Jeová, kel Deus di Israel.
6 Na ténpu di Sangar, fidju di Anate,
I na ténpu di Jael kes strada staba dizértu,
I kes algen ta viajaba na otus kaminhu.
7 Dja ka tinha ningen na kes kanpu na Israel.*
Ka tinha más ningen, ti ki ami, Débura, N labanta,
Ti ki N labanta sima un mai pa djuda Israel.
8 Kantu povu di Israel skodje otus deus,
Tevi géra na kes porton di Israel.
Ninhun di kes 40 mil ómi na Israel
Ka tinha nen skudu nen lansa.
9 Nha korason sta ku kes líder di Israel
Ki oferese di livri vontadi djuntu ku povu.
Nhos lova Jeová!
10 Nhos ki ta anda na kes buru kastanhu,
Ki sta xintadu na kes tapeti finu,
I ki ta anda na strada,
Nhos pensa na kel-li!
11 Pértu di kes lugar di tra agu pa animal, obidu vós di kes ómi ki ta traba agu;
La es pâpia di kes kuza bon ki Jeová faze,
Kes kuza bon ki kes algen di kes kanpu di Israel faze.
Nton, povu di Jeová dixi ti kes porton di sidadi.
12 Korda, korda, Débura!
Korda, korda, kanta un kántiku!
Labanta, Baraki! Ó fidju di Abinoan, leba kes algen ki bu tene prézu!
13 Nton, kes ki resta dixi ti kes líder.
Povu di Jeová ben ti txiga na mi pa luta kóntra kes poderozu.
14 Kes ómi ki staba na vali, éra di Efrain.
Es staba ta bai bu tras, ó Benjamin, es staba djuntu ku bus trópa.
Kes líder ki éra disendenti di Makir dixi,
I kes ómi di Zebulon* éra kes ki ta txomaba kes trópa pa géra.*
15 Kes prínsipi di Isakar staba ku Débura,
Isakar ku Baraki tanbê staba ku el.
Baraki bai apé ti vali.
Na tribu di Ruben txeu algen ka staba ta toma disizon.
16 Pamodi ki bu xinta dibaxu di dôs karga*
Ta obi kes pastor ta toka flauta pa ses ribanhu?
Na tribu di Ruben, txeu algen ka staba ta toma disizon.
17 Jiliade kontinua na kel otu ladu di Jurdon.
Dan, pamodi ki bu fika djuntu di kes barku?
Azer fika xintadu na bera-mar sen faze nada.
I el kontinua djuntu di ses kais.*
18 Zebulon éra un povu ki ta poba ses vida na prigu* mésmu dianti di mórti.
Tanbê Naftali faze mésmu kuza na kes lugar altu.
19 Kes rei ben i es luta.
Nton, kes rei di Kanan luta,
Es luta na Tanaki, pértu di kes agu di Mejidu.
Es ka konsigi leba ninhun kuza di prata.
20 La di séu kes stréla luta,
Di ses kaminhu na séu* es luta kóntra Sízera.
21 Riu Kizon, un riu ki ta izistiba désdi ténpu antigu,
Rasta ses inimigu.
Ó nha alma,* bu piza kes ómi fórti.
22 Nton, kes pé di kabalu poi txon ta treme
Timenti ses kabalu di géra staba ta anda ku raiba.
23 Anju di Jeová fla: ‘Nhos maldísua Merós.
Nhos maldísua kes algen di la,
Pamodi es ka ben djuda Jeová,
Es ka ben djuda Jeová ku ses ómi fórti.’
24 Jael é kel mudjer más abensuada,
Kel mudjer di Éber, kel kineu.
El é más abensuada di ki tudu kes mudjer ki ta mora na ténda.
25 Sízera pidi-l agu, el da-l leti.
Na un tijéla bunitu, el da-l leti pizadu.*
26 El stika mô i el panha kel staka di ténda.
Ku se mô direita, el panha martélu di kes trabadjador.
El finka kel staka na kabésa di Sízera,
El ratxa-l kabésa, el finka-l kel staka ti sai pa kel otu ladu.
27 El kai na txon na pé di Jael i el fika la.
El kai na txon na pé di Jael.
Na kel lugar ki el kai, el móre.
28 Un mudjer staba ta djobe pa janéla.
Éra mai di Sízera ki staba ta djobe si el ta odja-l.
El pergunta: ‘Pamodi ki se karu sta ta dura ki txiga?
Pamodi ki inda N ka sta obi barudju di pé di ses kabalu?’
29 Kes prinséza di se palásiu ki tinha más sabedoria staba ta responde-l,
I el tanbê el staba ta ripiti pa se kabésa:
30 ‘Es debe sta ta dividi kes kuza ki es toma:
Un mudjer,* ô dôs mudjer* pa kada trópa;
Kes panu di kor pa Sízera, kes panu di kor.
Un ropa bordadu, panu di kor, dôs ropa bordadu
Pa poi na piskôs di kes ómi ki toma kes kuza.’
31 Ó Jeová, pa tudu bus inimigu móre,
Má pa kes ki ta ama-u ser sima sol óras ki el ta sai ku tudu se glória.”
I tevi 40 anu di pas* na país.