Juízis
7 Nton Jerubal, ki é Jidion, i tudu kes algen ki staba djuntu ku el labanta sédu i es arma ses ténda djuntu di nasenti di agu di Arode, timenti kanpamentu di kes midianita staba na nórti di Jidion, pértu di monti Moré, na vali. 2 Jeová fla Jidion: “Bu tene trópas dimás djuntu ku bo pa N intrega midianitas na bu mô. Israel pode ingaba na nha kusta i fla: ‘N vense ku nha própi mô.’ 3 Favor, fla na frenti di tudu algen: ‘Ken ki sta ku medu i ta treme pa el volta pa kaza.’” Nton, Jidion pô-s na próva. Pur isu, 22 mil ómi bai pa kaza i fika 10 mil ómi.
4 Má simé, Jeová fla Jidion: “Inda bu tene trópas dimás. Leba-s ti bera di agu pa N pode pô-s na próva. Óras ki N fla: ‘Kel-li ta bai ku bo’, el ta bai ku bo. Má óras ki N fla: ‘Kel-li ka ta bai ku bo’, el ka ta bai ku bo.” 5 Nton, el leba kes trópa ti txiga bera di agu.
I Jeová fla Jidion: “Bu debe sipara tudu kes ki poi juelhu na txon pa bebe agu di kes ki ka poi juelhu na txon pa bebe agu.”* 6 Kes ki bebe agu ku mô envês di poi juelhu na txon pa bebe éra 300 ómi. I tudu kes otu ómi poi juelhu na txon pa bebe.
7 Jeová fla Jidion: “É ku kes 300 ómi li ki panha agu ku mô i bebe ki N ta salva nhos i ki N ta intrega kes midianita na bu mô. Má tudu kes otu ómi debe volta pa kaza.” 8 Nton, es toma kumida i buzina di kes otu trópa, i el manda-s pa kaza. El fika sô ku 300 ómi. Kes midianita tinha ses ténda armadu más pa baxu, na vali.
9 Na kel noti, Jeová fla Jidion: “Labanta, bai na undi ki es tene ténda armadu i ataka-s, pamodi dja N intrega-s na bu mô. 10 Má si bu tene medu di ataka-s, dixi djuntu ku Pura, bu ajudanti, ti undi ki es sta. 11 Obi kuzê ki es sta ta fla i dipôs bu ta ten koraji* pa ataka-s.” Nton, Jidion i Pura, se ajudanti, bai ti undi ses inimigu tinha ténda armadu.
12 Kes midianita, kes amalekita i tudu kes algen di Orienti, staba ta kubri kel vali sima un núven di gafanhotu, i ses kamelu ka ta daba pa konta. Es éra txeu dimás sima gran di areia na bera-mar. 13 Kantu Jidion txiga, staba un ómi ta konta un sonhu pa se kunpanheru. El staba ta fla: “É kel-li ki N sunha ku el. N odja un pon di sevada rodondu ta ben ta rola i el entra déntu di kanpamentu di kes midianita. El da na un ténda ku tantu forsa ki el kai. Kel ténda vira kabésa pa baxu i el fika na txon.” 14 Nton se kunpanheru fla-l: “Kel-li sô pode ser spada di Jidion, fidju di Joás, kel ómi di Israel. Deus dja intrega Midian i tudu kes trópa na se mô.”
15 Lógu ki Jidion obi kel sonhu i se splikason el inbaxa pa adora Deus. Dipôs, el volta pa undi ki israelitas tinha ténda armadu i el fla: “Nhos labanta, pamodi Jeová dja intrega kes midianita i tudu kes trópa ki sta djuntu ku es na nhos mô.” 16 Nton, el dividi kes 300 ómi na três grupu i el da tudu es un buzina i un jaru grandi. Déntu di kada jaru tinha un pó ku lumi na el. 17 Dipôs el fla-s: “Nhos odja kuzê ki N sta ta faze i nhos faze sima mi. Óras ki N txiga pértu di undi ki es tene ténda armadu, nhos debe faze sima N faze. 18 Óras ki ami i tudu kes algen ki sta djuntu ku mi toka buzina, nhos ta toka buzina tanbê na vólta di undi ki es tene ténda armadu i nhos ta grita: ‘Pa Jeová i pa Jidion!’”
19 Jidion i kes 100 ómi ki staba djuntu ku el txiga pértu di undi ki ses inimigu tinha ténda armadu antis di meia-noti,* lógu dipôs ki es troka guarda. Es toka buzina i es kebra kes jaru grandi ki es tinha na mô. 20 Nton, kes três grupu toka buzina i es kebra kes jaru grandi. Es pega kes pó ki tinha lumi ku mô skerda i es toka buzina ku mô direita i es grita: “Spada di Jeová i di Jidion!” 21 Kada ómi fika paradu na se lugar na vólta di undi ki ses inimigu tinha ténda armadu i tudu ses inimigu kumesa ta fuji, ta kóre i ta grita. 22 Kes 300 ómi kontinua ta toka buzina i Jeová poi ses inimigu ta ataka kunpanheru ku spada, i tudu kes trópa fuji ti Bete-Sita. Di la, es fuji pa Zererá, ti pértu di Abel-Meolá, ki ta fika pértu di Tabate.
23 Kes ómi di Israel di tribu di Naftali, di Azer i di tribu di Manasés txomadu i es bai tras di kes midianita. 24 Jidion manda mensajerus pa tudu kes zóna di Efrain ki ten montanha i el fla: “Nhos dixi i nhos ataka kes midianita. Nhos toma tudu kes lugar ki ta da pa trabesa riu ku pé ti Bete-Bara i ti riu Jurdon.” Nton, es djunta tudu kes ómi di Efrain i es toma tudu kes lugar ki ta daba pa trabesa riu ku pé ti Bete-Bara i ti Jurdon. 25 Tanbê es pega kes dôs prínsipi di Midian, Orebe i Zebe. Es mata Orebe na rótxa di Orebe i es mata Zebe na lugar di faze vinhu di Zebe. Es kontinua ta bai tras di kes midianita i es leba Jidion kabésa di Orebe i di Zebe, pértu di Jurdon.