Juízis

17 Tinha un ómi ki txomaba Mika, ki ta moraba na kes zóna di Efrain ki ten montanha. 2 Un dia, el fla se mai: “Bu ta lenbra di kes 1.100 pésa di prata ki algen furta-u i ki N obi-u ta pidi kel algen praga? É mi ki tene kes prata. É mi ki furta-s.” Se mai fla-l: “Pa Jeová abensua-u nha fidju.” 3 Nton, el torna da se mai kes 1.100 pésa di prata. Má se mai fla-l: “Sen falta, N ta oferese* es prata pa Jeová. N krê pa bu uza-l pa faze un imajen i un státua di metal pa bo. Pur isu, kel prata li gósi é di bo.”

4 Dipôs ki el da se mai kel prata, se mai panha 200 pésa di prata i el leba-s na un algen ki ta trabadja ku prata. El faze un imajen i un státua di metal, i es poi kes imajen na kaza di Mika. 5 Mika tinha un santuáriu. El faze un éfodi* i alguns terafin,* i el skodje* un di ses fidju pa ser se saserdóti. 6 Na kel ténpu, ka tinha rei na Israel. Kada un ta fazeba kel ki el ta atxaba ma éra dretu.

7 Tinha un jóven di Belen, na Judá, ki éra di família di Judá. El éra un levita i dja tinha algun ténpu ki el ta moraba na Belen, na Judá. 8 Kel jóven sai di sidadi di Belen, na Judá, i el ba djobe un otu lugar pa el mora. Duránti se viajen, el txiga na kaza di Mika, ki ta fikaba na kes zóna di Efrain ki ten montanha. 9 Mika pergunta-l: “Di undi ki bu ben?” El responde: “Ami é un levita di Belen, na Judá, i N sta ta djobe un lugar pa N mora.” 10 Nton Mika fla-l: “Fika ku mi i bira nha konsedjeru* i nha saserdóti. N ta da-u 10 pésa di prata pa anu, ropa ki bu meste i kumida.” Nton, kel levita entra na kaza di Mika. 11 Kel levita seta fika na kaza di Mika i el bira sima un fidju pa Mika. 12 Alén di kel-li, Mika poi kel levita ta ser se saserdóti, i el fika ta mora na kaza di Mika. 13 Nton, Mika fla: “Gósi N ten serteza ma Jeová ta ben abensua-m, pamodi nha saserdóti é un levita.”