Salmu
33 Nhos ki é justu, nhos grita di alegria pamodi Jeová.
É bon pa kes algen ki é rétu lova-l.
2 Nhos agradese Jeová ku arpa.
Nhos kanta lovor* pa el ku instrumentu di 10 kórda.
3 Nhos kanta un kántiku novu pa el.
Nhos da nhos midjór na toka arpa i nhos grita di alegria.
4 Pamodi palavra di Jeová é verdadi,
I tudu kuza ki el ta faze é di kunfiansa.
5 El ta ama justisa i kel ki é rétu.
Téra sta xeiu di amor lial di Jeová.
6 Jeová faze séu através di se palavra,
I através di spritu* di se bóka el faze tudu kuza ki ten na el.*
7 El ta djunta agu di mar sima agu na un baraji.
El ta guarda kes agu brabu na un armazén.
8 Pa tudu kes algen ki ta mora na téra ten grandi ruspetu pa Jeová.
Pa tudu kes algen ki ta mora na el ruspeta-l.
9 Pamodi el pâpia i tudu kuza kumesa ta izisti.
El da órdi i tudu kuza fika firmi.
11 Má kes disizon* di Jeová ta kontinua pa tudu ténpu.
Kes pensamentu di se korason ta dura di jerason pa jerason.
12 Filís é kel nason ki se Deus é Jeová,
Kel povu ki el skodje pa ser se propriadadi.
13 La di séu, Jeová ta djobe pa baxu.
El ta odja tudu algen.
14 La di se lugar ki el ta mora,
El ta odja tudu algen na téra.
15 É el ki ta faze korason di tudu algen.
El ta izamina tudu kuza ki es ta faze.
16 Ninhun rei ka ta salvadu pamodi el ten un izérsitu grandi.
Un trópa ka ta salvadu pamodi el ten txeu puder.
17 Ka bu kunfia na kabalu pa bu ganha géra,* pamodi el ta diziludi-u.
Se forsa ka ta da-u garantia ma bu ta skapa.
18 Nhos odja! Odju di Jeová sta sienti na kes ki ten grandi ruspetu pa el,
Kes ki sta spera pa se amor lial,
19 Pa libra-s* di mórti
I pa djuda-s fika bibu na ténpu di fómi.
20 Nos nu ta spera* na Jeová.
É el ki ta djuda-nu i el é nos skudu.
21 Nos korason ta fika kontenti pamodi el,
Nu ta kunfia na se nómi santu.
22 Ó Jeová, kontinua ta mostra-nu bu amor lial,
Timenti nu sta ta spera pa bo.