Salmu
Un múzika di Davidi pa pesoas lenbra.
38 Ó Jeová, ka bu disiplina-m óras ki bu sta ku raiba,
Nen ka bu koriji-m óras ki bu sta xatiadu.
2 Pamodi bus flexa entra fundu déntu di mi,
I bu mô sta pizadu riba mi.
3 Nha korpu interu sta duenti* pamodi bu sta xatiadu ku mi.
Nhas osu sta sen pas pamodi nha pekadu.
4 Pamodi nhas fadja sta riba di nha kabésa.
Es é txeu, sima un karga pizadu dimás pa N karega.
5 Nhas frida sta ta txera mal i ta baza pus
Pamodi N aji sen juís.
6 N sta frontadu i dizanimadu dimás.
N sta anda tristi dia interu.
7 N sta xinti lumi ta kema déntu di mi.
Nha korpu interu sta duenti.
8 N ka sta konsigi xinti más nada i N sta tudu kebradu.
Nha korason sta angustiadu, el ta pô-m ta jeme altu.
9 Ó Jeová, bu konxe tudu nhas dizeju,
I sénpri bu ta obi-m óras ki N ta suspira.
10 Nha korason sta ta bate fórti, N ka tene forsa más,
I nhas odju dja bira fraku.
11 Nhas amigu i nhas kunpanheru sta ivita-m pamodi nha duénsa,
I kes algen más prósimu di mi sta fika lonji di mi.
12 Kes ki krê mata-m* sta faze armadilha pa mi.
Kes ki krê prujudika-m sta pâpia kóntra mi.
Dia interu es ta faze planu pa ingana-m.
13 Má sima un algen surdu, N ka ta obi,
Sima un algen mudu, N ka ta abri nha bóka.
14 N bira sima un ómi ki ka ta konsigi obi.
Nha bóka ka ta abri pa fla nada pa N difende.
15 Pamodi N spera pa bu djuda-m, ó Jeová,
I bu djuda-m, ó Jeová, nha Deus.
16 N fla: “Ka bu dexa-s fika kontenti pamodi nha sufrimentu
Nen ka bu dexa-s umilha-m si N tropesa.”
17 Pamodi N staba kuazi ta kai,
I nha dór staba sénpri ku mi.
18 N konfesa nha éru.
Nha pekadu staba ta tormenta-m.
20 Es paga-m ben ku mal.
Es staba ta tenta inpidi-m di faze kel ki é dretu.
21 Ó Jeová, ka bu bandona-m.
Ó Deus, ka bu fika lonji di mi.
22 Ó Jeová, nha salvason,
Ben faxi i djuda-m.