Salmu
Pa diretor di múzika. Salmu di kes fidju di Korá. Maskil.*
44 Ó Deus, nu obi ku nos própi obidu,
Kes kuza ki nos gentis grandi konta-nu,
Kes kuza ki bu faze na ses ténpu,
Na kes ténpu antigu.
2 Ku bu mô, bu kóre ku kes nason di ses lugar
I bu poi nos gentis grandi la.
Bu vense kes nason i bu kóre ku es.
3 Nos gentis grandi ka toma kel téra li ku ses spada,
I nen es ka vense pamodi ses brasu.
Má es toma-l pamodi bu mô direita, bu brasu i bu bondadi ki bu mostra-s,*
Pamodi bu ta amaba es.
4 Ó Deus, abo é nha Rei.
Da órdi pa Jakó ten un vitória konplétu.*
5 Ku bu puder, nu ta poi nos inimigu ta fuji.
Na bu nómi, nu ta ganha kes ki fika kóntra nos.
6 Pamodi N ka ta kunfia na nha arku,*
I nha spada ka ta pode salva-m.
7 É bo ki salva-nu di nos inimigu,
É bo ki umilha kes ki ta odia-nu.
8 Ó Deus, nu ta lova-u dia interu,
I nu ta da bu nómi glória pa tudu ténpu. (Selá)
9 Má gósi, bu nega-nu i bu umilha-nu,
I bu ka sta kunpanha nos izérsitu.
10 Bu sta pô-nu ta fuji di nos inimigu.
I kes ki ta odia-nu sta leba tudu kel ki es krê.
11 Bu sta intrega-nu na mô di nos inimigu pa es mata-nu sima ovelha.
Bu spadja-nu na meiu di nasons.
12 Bu sta bende bu povu pa un bakatela.
Bu ka ta ganha nada ku kel-li.*
13 Bu ta poi nos vizinhu ta faze trósa di nos,
Tudu algen na nos vólta sta ta goza ku nos i ta ri di nos.
14 Bu sta poi kes nason ta dispreza-nu,
Kes povu ta sakudi kabésa ta faze trósa di nos.
15 Dia interu N sta xinti umilhadu,
I vergónha sta ta kaba ku mi,
16 Pamodi N sta ta obi nhas inimigu ta faze trósa di mi i ta insulta-m,
Pamodi nos inimigu sta ta vinga di nos.
17 Tudu kel-li kontise ku nos, má simé nu ka skese di bo,
Nen nu ka viola bu kontratu.
18 Nos korason ka disvia.
Nos pasu ka sai di bu kaminhu.
19 Má bu dexa nos inimigu ganha-nu i bu larga-nu na undi ki katxor brabu* ta vive.
I bu kubri-nu ku un sukuru grandi.
20 Si nu skeseba di nómi di nos Deus
Ô si nu stikaba nos mô pa faze orason pa un deus falsu,*
21 Deus ka ta diskubriba kel-li?
El konxe kes segredu di nos korason.
22 Pamodi bo, nu sta na prigu di matadu tudu óra.
Es ta trata-nu sima ovelhas ki sta ba matadu.
23 Ó Jeová, labanta. Pamodi ki bu sta kontinua ta durmi?
Labanta i djuda-nu! Ka bu nega-nu pa tudu ténpu.
24 Pamodi ki bu sta sukundi bu róstu?
Pamodi ki bu sta skese di nos sufrimentu i di nos frónta?
25 Dja nu rabaxadu ti ki dja nu bira sima téra.
Nu sta detadu na txon i nu ka ta pode faze nada.
26 Favor, labanta i ben djuda-nu!
Salva-nu* pamodi bu amor lial.