Salmu
Pa diretor di múzika. Pa toka na ton di “Kes líriu”. Salmu di kes fidju di Korá. Maskil.* Kántiku di amor.
45 Nha korason sta txeu kontenti pamodi un kuza bon.
N ta fla: “Nha kántiku* é sobri un rei.”
Pa nha língua ser sima un kanéta* na mô di un algen ki é bon na kôpia.*
2 Ó rei, anho é más bunitu di ki tudu algen.
Palavras sábi ta sai di bóka di nho.
Pur isu, Deus ta abênsua nho pa tudu ténpu.
3 Ó trópa poderozu, poi bu spada na sintura,
Bisti di ónra i glória.
4 I na bu glória, sai i avansa pa vitória.*
Monta bu kabalu i luta pa kes algen umildi, pa verdadi i pa justisa.
Bu mô direita ta faze* kuzas ki ta poi algen ta xinti medu.
5 Ó rei, bus flexa ten pónta gudu, es ta poi povu ta kai bu dianti.
Es ta mete na korason di kes inimigu di rei.
6 Deus é bu tronu pa tudu ténpu.
Vara di bu reinu é vara di justisa.
7 Bu ama justisa i bu ôdia maldadi.
É pur isu ki Deus, bu Deus, skodje-u ku óliu di alegria más di ki bus kunpanheru.
8 Tudu bus ropa ten purfumu di mira, aloés i kásia.
Di bu grandiozu palásiu di marfin, ta sai múzika di instrumentus di kórda ki ta pô-u kontenti.
9 Kes fidju-fémia di kes rei sta entri bus dama di ónra.
Rainha sta di pé na bu direita, infeitadu ku oru di Ofir.
10 Nha fidju-fémia, obi, presta atenson i inbaxa bu obidu.
Skese di bu povu i família di bu pai.
11 Rei ta ben dizeja bu beléza,
El é bu sinhor,
Pur isu, inbaxa se dianti.
12 Povu* di Tiru ta ben traze un prezenti,
Kes ómi más riku ta ben djobe-u pa agrada-u.
13 Fidju-fémia di rei sta bunita dimás déntu di palásiu.*
I se ropa sta infeitadu ku oru.
14 El sta ta lebadu pa rei ku kes ropa más bunitu.*
Kes vírjen ki sta bai djuntu ku el, ki é ses kunpanhera, tanbê sta ta lebadu pa dianti di rei.
15 Es sta ta lebadu ku alegria i ku gritu di alegria.
Es ta entra na palásiu di rei.
16 Ó rei, bus fidju ta ben fika na lugar di bus gentis grandi.
Bu ta ben skodje-s pa es ser prínsipi na téra interu.
17 N ta ben poi bu nómi ta ser konxedu pa tudu kes jerason ki sta pa ben.
Pur isu, povu ta ben lova-u pa tudu ténpu.