Salmu
Pa diretor di múzika. Salmu di kes fidju di Korá. Di akordu ku stilu di Alamote.* Kántiku.
46 Deus é nos proteson i nos forsa,
Un ajuda ki ta atxadu faxi na ténpu di frónta.
2 É pur isu ki nu ka ta ten medu, sikrê téra treme,
Sikrê montis kai na fundu di mar,
3 Sikrê agu di mar faze barudju i faze skuma,
Sikrê mar fika brabu ti ki montis treme. (Selá)
4 Ten un riu ki ses kanal ta poi sidadi di Deus ta fika kontenti,
Kel lugar santu ki kel Deus Más Grandi ta mora.*
5 Deus sta na sidadi, pur isu es sidadi ka pode distruídu.
Deus ta ben djuda-l óras ki kumesa ta manxe.
6 Kes nason fika ajitadu, kes reinu botadu na txon.
Má kantu Deus pâpia, téra treme.
7 Jeová di izérsitu sta ku nos.
Kel Deus di Jakó é nos proteson suguru.* (Selá)
8 Nhos ben i nhos odja kes kuza ki Jeová ta faze,
Nhos odja modi ki el ta faze kuzas grandi na téra.
9 El ta kaba ku géra na téra interu.
10 “Nhos intrega kabésa i nhos fika ta sabe ma mi é Deus.
N ta ben lovadu na meiu di nasons.
N ta ben lovadu na téra interu.”
11 Jeová di izérsitu sta ku nos.
Kel Deus di Jakó é nos proteson suguru. (Selá)