Salmu
Kántiku. Un múzika di kes fidju di Korá.
48 Jeová é grandi i el merese tudu lovor.
Pa el lovadu na sidadi di nos Deus, na se monti santu.
2 Monti Sion, ki sta na ladu nórti,
É sidadi di kel Grandiozu Rei.
El é bunitu pamodi se altura, i el é alegria di téra interu.
3 Na kes tori fórti di sidadi,
Deus mostra ma el é un proteson suguru.*
4 Nhos odja! Kes rei dja djunta.*
Es sta ta ben djuntu pa luta kóntra sidadi.
5 Kantu es odja sidadi, es fika dimiradu.
Medu toma kónta di es i es fuji dizorientadu.
6 La, medu toma kónta di es,
Es fika ta sufri sima un mudjer ki sta ta ten fidju.
7 Ó Deus, bu kebra kes barku di Társis ku un béntu fórti di lésti.
8 Kes kuza ki nu obi ta papiadu di es, gósi nu sta ta odja-s ku nos própi odju
Na sidadi di Jeová di izérsitu, na sidadi di nos Deus.
Deus ta ben poi kel sidadi li ta fika firmi pa tudu ténpu. (Selá)
9 Ó Deus, déntu di bu ténplu,
Nu ta midita na bu amor lial.
10 Ó Deus, sima bu nómi, bu lovor
Ta txiga na kes párti más lonji di téra.
Bu mô direita sta xeiu di justisa.
11 Pa monti Sion fika kontenti,
Pa kes sidadi di Judá grita di alegria, pamodi bu faze justisa.
12 Nhos marxa na vólta di Sion, nhos anda na se vólta.
Nhos konta ses tori.
13 Nhos djobe ku atenson pa ses muralha di proteson.
Nhos djobe dretu ses tori fórti,
Pa nhos pode pâpia di kes kuza li ku kes jerason ki sta pa ben.
14 Pamodi kel Deus li é nos Deus pa tudu ténpu.
El ta gia-nu pa tudu ténpu.*