Salmu
Pa diretor di múzika. Maskil.* Salmu di Davidi, kantu Duegi, kel edomita, ba konta Saul ma Davidi baba pa kaza di Aimeleki.
52 Ó poderozu, pamodi ki bu ta ingaba di kes kuza mariadu ki bu ta faze?
Amor lial di Deus ta dura dia interu.
2 Bu língua moladu sima un nabadja,
Ta faze planu pa faze kuzas mariadu i ingana algen.
3 Bu gosta más di kuzas mariadu di ki kuzas dretu,
Bu ta prifiri konta mintira di ki pâpia verdadi. (Selá)
4 Ó língua ki ta konta mintira,
Bu gosta di tudu palavra ki ta prujudika algen!
5 É pur isu ki Deus ta ben kaba ku bo pa tudu ténpu.
El ta ben panha-u i rinka-u di bu ténda.
El ta ben rinka-u di téra di algen bibu. (Selá)
6 Kes algen justu ta ben odja kel-li i es ta fika dimiradu,
I es ta ben ri di el, ta fla:
7 “Odja, kel-li é un ómi ki ka djobe proteson na Deus,
Má el kunfia na se grandi rikéza
I el pensa ma ses planu pa faze maldadi ta djuda-l.”*
8 Má ami, N ta ser sima un pé di olivera ki ten txeu folha na kaza di Deus.
Nha kunfiansa é na amor lial di Deus pa tudu ténpu.
9 N ta ben lova-u pa tudu ténpu pamodi bu aji.
Na frenti di kes ki é lial pa bo,
N ta kunfia na bu nómi, pamodi bu nómi é bon.