Salmu
Pa diretor di múzika. Pa kunpanha ku instrumentu di kórda. Maskil.* Salmu di Davidi, kantu kes zefita ba fla Saul: “Davidi sta sukundidu na nos meiu.”
54 Ó Deus, salva-m pamodi bu nómi
I difende-m ku bu puder.
2 Ó Deus, obi nha orason,
Obi kes palavra di nha bóka.
3 Pamodi inimigu sta ta labanta kóntra mi
I ómis mau sta djobe-m pa mata-m.*
Es ka ta ruspeta Deus.* (Selá)
4 Nhos odja! Deus é kel ki ta djuda-m.
Jeová sta ku kes ki ta apoia-m.*
5 El ta ben paga nhas inimigu ku ses própi maldadi.
Nha Deus, kaba ku es* pamodi abo é fiel.
6 N ta ben oferese-u sakrifisiu di livri vontadi.
Ó Jeová, N ta ben lova bu nómi pamodi bu nómi é bon.
7 Pamodi bu ta salva-m di tudu prubléma,
I N ta ben odja nhas inimigu ta vensedu.